আগন্তুক ১০ দিনত অসমত ‘মমতা মেজিক’! সুস্মিতাই ক’লে-খেলা হ’বে

ডিজিটেল ডেস্কঃ ত্ৰিপুৰা-মেঘালয়ৰ পাছত এইবাৰ তৃণমূলৰ লক্ষ্য হৈ পৰিছে অসম। আগন্তুক ১০ দিনৰ ভিতৰত অসমতো তৃণমূলত যোগদান কৰিবলৈ নেতাৰ হেতা-ওপৰা লাগিব বুলি তৃণমূল ৰাজ্যসভাৰ সাংসদ সুস্মিতা দেৱে ইংগিত দিছে।  দেওবাৰে অসমৰ প্ৰভাৱশালী কংগ্ৰেছ নেতা ৰিপুন বৰাই কলকাতালৈ উপস্থিত হৈ তৃণমূল কংগ্ৰেছত যোগদান কৰাৰ পাছতে উচ্ছসিত হৈ পৰিছে সুস্মিতা দেৱ। কংগ্ৰেছৰ বাবে এয়া এক ডাঙৰ আঘাত বুলি মন্তব্য কৰি সুস্মিতাই কয়, ‘অনাগত ১০ দিনত অসমত মমতা মেজিক চলাতো খাটাং। বহুতে তৃণমূলৰ  সৈতে যোগাযোগ কৰিছে আৰু যোগদান কৰিবলৈ আগ্ৰহ প্ৰকাশ কৰিছে। আমি শীৰ্ষ নেতৃত্বৰ সৈতে কথা পাতিম আৰু আগন্তুক ১০ দিনৰ ভিতৰত তেওঁলোকক গুৱাহাটীতে দলত অন্তৰ্ভুক্ত কৰা হ’ব।’ কেৱল সেয়াই নহয় অসমৰ ৰাইজে মমতাৰ নেতৃত্বতে বিজেপিৰ বিৰুদ্ধে যুঁজ দিব বিচাৰে বুলিও মন্তব্য তৃণমূলৰ সাংসদগৰাকীৰ।

তৃণমূল সূত্ৰৰ খবৰ অনুসৰি, দলটোৱে এসপ্তাহৰ ভিতৰতে গুৱাহাটীত ৰাজ্যিক মুখ্য কাৰ্যালয় মুকলি কৰিবলৈ যো-জা চলাব। সুস্মিতা দেৱৰ দাবী, তৃণমূলৰ নতুন ৰাজ্যিক কাৰ্যালয় মুকলি হোৱাৰ পিছত, আন দলৰ নেতাসকল তাত যোগদান কৰিব। দৰাচলতে, ২০১৬ চনত ক্ষমতা হেৰুওৱাৰ পাছত উত্তৰ-পূবৰ দৰে বৃহত্‍ ৰাজ্যখনত কংগ্ৰেছ ক্ৰমান্বয়ে নিচিহ্ন হৈ আহিছে। বিগত বিধানসভা নিৰ্বাচনত এআইইউডিএফৰ সৈতে মিত্ৰতা কৰা স্বত্বেও বিজেপিক ৰুধিব নোৱাৰিলে। কংগ্ৰেছৰ এই দুৰ্বলতাই ৰাজ্যখনৰ তৃণমূলৰ পথ আৰু সুগম কৰি তুলিছে।

উল্লেখ্য যে, বিগত বৰ্ষৰ ৰাজ্যখনৰ বিধানসভা নিৰ্বাচনত বিজেপিক পৰাস্ত কৰাৰ পাছত তৃণমূলে উত্তৰ-পূবৰ ৰাজ্যসমূহত নিজৰ সংগঠনৰ সম্প্ৰসাৰণৰ কাম আৰম্ভ কৰিছে। ত্ৰিপুৰা আৰু মেঘালয়ৰ কেইবাজনো নেতাই ইতিমধ্যে তৃণমূলত যোগদান কৰিছে। এইবাৰ সুস্মিতা আৰু ৰিপুন বৰাৰ আঙুলিত ধৰি অসমতো কংগ্ৰেছ বিভাজন হোৱাৰ সম্ভাৱনাই প্ৰবল ৰূপত ধৰা দিছে। ২০২৪ চনৰ লোকসভা নিৰ্বাচনৰ প্ৰতি লক্ষ্য ৰাখিয়েই অসমত তৃণমূল কংগ্ৰেছে সংগঠনৰ ভেটি সম্প্ৰসাৰণ কৰিবলৈ লাগিছে সেয়া স্পষ্ট।