৭০% ভাৰতীয় যুৱ স্নাতক AI বিৰোধী

ডিজিটেল ডেস্ক : কৃত্রিম বুদ্ধিমত্তা (AI), ৭০ শতাংশ ভাৰতীয় স্নাতক ডিগ্রীধাৰী যুৱক-যুৱতীক তেওঁলোকৰ ঈপ্সিত কর্মসংস্থাপন আহৰণ কৰাৰ ক্ষেত্ৰত বাধাৰ প্রাচীৰ হ'ব। বিনিয়োগ পেছাদাৰীসকলৰ বিশ্বজনীন সংস্থা, চি এফ এ ইনষ্টিটিউটে ইয়াৰ 'গ্ল'বেল গ্রেজুৱেট আউটলুক' সমীক্ষা, ২০২৫ত প্ৰকাশ কৰিছে এই উদ্বেগজনক তথ্য।

বৃহস্পতিবাৰে সংস্থাটোৱে প্ৰকাশ কৰা প্রতিবেদনখনত প্রায় ৯০০০ ভাৰতীয়ক সামৰি চলোৱা সমীক্ষা প্রকাশ পাইছে। কেৰিয়াৰ সন্ধানী নতুনকৈ স্নাতক ডিগ্রী লাভ কৰা এইসকল ভাৰতীয় যুৱক-যুৱতীক সামৰি সমীক্ষা চলাই সংস্থাটোৱে প্ৰকাশ কৰিছে যে বিশ্বৰ ভিতৰত গড় হিচাপত বহুতো ভাৰতীয় শিক্ষিত যুৱক-যুৱতীয়ে শংকা প্রকাশ কৰে যে ভাৰতত কৃত্রিম বুদ্ধিমত্তা অথবা স্বয়ংক্রিয় সঁজুলি ব্যৱহাৰৰ ফলত তেওঁলোকে বিচৰা ধৰণে এটা ভাল চাকৰিৰ পৰা বঞ্চিত হ'ব।

আনহাতে, ৫০ শতাংশ ভাৰতীয় স্নাতকে আত্মবিশ্বাস ব্যক্ত কৰে তেওঁলোকে এ আই ফলপ্রসূভাৱে ব্যৱহাৰ কৰিব পাৰিব। চি এফ এই প্রকাশ কৰা প্ৰতিবেদনখনত কোৱা হৈছে যে ভাৰতত এ আইৰ ব্যৱহাৰ মন্থৰ গতিত বৃদ্ধি পাইছে। ২০২৪ চনত এ আইৰ ব্যৱহাৰৰ ক্ষেত্রত ৫৯ শতাংশ হোৱাৰ বিপৰীতে চলিত বৰ্ষত এ আইৰ ব্যৱহাৰ ৬৩ শতাংশ হৈছে। এইটোৱে প্রতিফলন কৰিছে যে সজাগতা আৰু অৱলম্বন কৰাৰ অভাৱৰ বাবেই কৃত্ৰিম বুদ্ধিমত্তাৰ (এ আই) ব্যৱহাৰ ভাৰতত আশা কৰা ধৰণে বৃদ্ধি হোৱা নাই।

চি এফ এ ইনষ্টিটিউট, ভাৰতৰ দেশী মুৰব্বী আৰতি পৰৱালে কয় যে বৰ্তমানৰ প্ৰজন্মৰ বাবে এ আই এটা বিকল্প হৈ থকা নাই। পেছাগত বিকাশৰ বাবে কি প্রয়োজনীয় সেইটো ভাৰতীয় শিক্ষিত যুৱক-যুৱতীয়ে জানে আৰু সেইবাবে প্রাসংগিক কৌশল আহৰণ কৰাত তেওঁলোক আগ্রহী। আনহাতে প্রতিবেদনখনত পুনৰবাৰ কোৱা হৈছে যে একেৰাহে তিনি বছৰ ধৰি ভাৰতীয় স্নাতকসকলে বিত্তীয় খণ্ডত চাকৰি কৰাৰ বাবে অগ্রাধিকাৰ দিছে। ৩৮ শতাংশ ভাৰতীয় স্নাতকে বিত্তীয় খণ্ডত চাকৰি কৰাৰ বাবে আগ্রহী আৰু ৩২ শতাংশ স্নাতকে তথ্য প্রযুক্তি খণ্ডত আৰু ২১ শতাংশই শিক্ষা খণ্ডত চাকৰিৰ বাবে আগ্রহ ব্যক্ত কৰিছে।

উল্লেখযোগ্য যে যোৱা বৰ্ষত প্রকাশ কৰা প্রতিবেদনৰ দৰে এইবাৰো একেই পৰিসংখ্যা প্ৰকাশ কৰা হৈছে। ডি ৱাই পাটিল বিশ্ববিদ্যালয়ৰ অধ্যাপিকা ড° অর্চনা সিঙে মুম্বাইত এই প্রতিবেদন প্রকাশ কৰি কয় যে ভাৰতীয় স্নাতকসকলে বিত্তীয় খণ্ডত চাকৰিৰ বাবে আগ্রহ বেছিকৈ প্ৰকাশ কৰিছে।

এ আই পৰিচালিত প্রযুক্তি ব্যৱহাৰেৰে বিত্তীয় খণ্ডত কাম কৰিবলৈ আগ্রহী হৈছে যুৱক-যুৱতীসকল। আনহাতে, স্নাতক ডিগ্রী লাভ কৰাৰ পাছতেই ৪০ শতাংশ ভাৰতীয়ই কৰ্মসংস্থান পোৱাৰ বাবে আগ্রহী বুলি প্রতিবেদনখনত প্রকাশ পাইছে।

উৎসঃ দৈনিক জনমভূমি