ডিজিটেল ডেস্কঃ উচ্চতম ন্যায়ালয়ে স্থাপন কৰিছে ‘লেডী অৱ জাষ্টিছ’ অৰ্থাৎ ন্যায়ৰ দেৱীৰ নতুন প্ৰতিমূৰ্তি। এই মূৰ্তিটোৰ চকুৰ ক’লা ৰঙৰ কাপুৰখন আঁতৰাই পেলোৱা হৈছে, যিয়ে এতিয়ালৈকে আইনখন অন্ধ হোৱাৰ ইংগিত দিছিল। একে সময়তে তৰোৱালৰ সলনি তেওঁৰ হাতত সংবিধানৰ কিতাপ এখনো দিয়া হৈছে। এই প্ৰতিমূৰ্তি উচ্চতম ন্যায়ালয়ৰ ন্যায়াধীশৰ পুথিভঁৰালত স্থাপন কৰা হৈছে।
সংবাদ মাধ্যমৰ খবৰ অনুসৰি এই নতুন প্ৰতিমূৰ্তি চিজেআই অৰ্থাৎ ভাৰতৰ মুখ্য ন্যায়াধীশ ডি ৱাই চন্দ্ৰচুদে নিৰ্দেশনা জাৰি কৰিছে । ইয়াৰ উদ্দেশ্য হৈছে দেশৰ আইন অন্ধ নহয় আৰু ই শাস্তিৰ প্ৰতীক নহয় বুলি বাৰ্তা প্ৰেৰণ কৰা। পুৰণি প্ৰতিমূৰ্তিটোৰ ওপৰত চকুৰ ক’লা পট্টাডালেই দেখুৱাইছিল যে আইনৰ দৃষ্টিত সকলো সমান। আনহাতে তৰোৱাল আছিল কৰ্তৃত্ব আৰু অন্যায়ৰ শাস্তি দিয়াৰ ক্ষমতাৰ প্ৰতীক।
কিন্তু সমাজত ভাৰসাম্যৰ প্ৰতীক হোৱাৰ বাবে মূৰ্তিটোৰ সোঁহাতত পাল্লাখন ৰখা হৈছে। এই পাল্লাখনে দেখুৱাই যে আদালতে কোনো সিদ্ধান্তত উপনীত হোৱাৰ আগতে দুয়োপক্ষৰ তথ্য আৰু যুক্তিবোৰ জোখে। এই প্ৰতিমূৰ্তিটোক ব্ৰিটিছ শাসনৰ উত্তৰাধিকাৰে এৰি যোৱাৰ প্ৰয়াস হিচাপে দেখা গৈছে। শেহতীয়াকৈ ভাৰত চৰকাৰে ব্ৰিটিছ শাসনৰ সময়ত বলবৎ থকা ভাৰতীয় দণ্ডবিধিৰ (আই পি চি) আইনৰ পৰিৱৰ্তে ভাৰতীয় ন্যায়িক সংহিতা (বিএনএছ) আইন কাৰ্যকৰী কৰিছিল। লেডী অৱ জাষ্টিছৰ মূৰ্তিত পৰিৱৰ্তন কৰাটোও এই আইনৰ অধীনত গ্ৰহণ কৰা পদক্ষেপ হিচাপে বিবেচনা কৰিব পাৰি।
চিজেআইৰ কাৰ্যালয়ৰ সৈতে জড়িত বিশিষ্ট সূত্ৰই জনোৱা মতে, চিজেআইয়ে বিশ্বাস কৰে যে ভাৰতে ব্ৰিটিছৰ উত্তৰাধিকাৰৰ পৰা আগবাঢ়িব লাগে। তেওঁৰ মতে আইন অন্ধ নহয়, ই সকলোকে সমদৃষ্টিৰে চায় । অৰ্থাৎ আদালতে সমাজত ধন, ধন-সম্পত্তি আৰু অন্যান্য আধিপত্যৰ পৰিমাপসমূহ নাচায়। এই কাৰণেই চিজেআইয়ে লেডী অৱ জাষ্টিছৰ ৰূপ সলনি কৰাৰ কথা কৈছিল। তেওঁ কয় যে প্ৰতিমূৰ্তিৰ হাতত তৰোৱাল নহয়, এহাতত সংবিধান থাকিব লাগে, যাতে সংবিধান অনুসৰি ন্যায় দিয়া হৈছে বুলি দেশে বাৰ্তা লাভ কৰে। তৰোৱাল হিংসাৰ প্ৰতীক যদিও আদালতে সাংবিধানিক আইন অনুসৰি ন্যায় প্ৰদান কৰে।
Continue Reading
