ডিজিটেল ডেস্কঃ ৰাষ্ট্ৰীয় সন্মিলনৰ নেতা ওমৰ আব্দুল্লাই বুধবাৰে অৰ্থাৎ আজি কেন্দ্ৰীয় শাসিত অঞ্চল জম্মু-কাশ্মীৰৰ প্ৰথমটো মুখ্যমন্ত্ৰী হিচাপে শপত গ্ৰহণ কৰে। আনহাতে মুখ্যমন্ত্ৰী হোৱাৰ লগে লগে তেওঁ জম্মু-কাশ্মীৰৰ ডিজিপিক দিলে কঠোৰ নিৰ্দেশ ৷ তেওঁ কয় যে তেওঁৰ কনভয়ৰ বাবে কোনো সাধাৰণ জনতাই কোনো সমস্যাৰ সন্মুখীন হ’ব নালাগে। পথেৰে যাতায়ত কৰাৰ সময়ত তেওঁলোকৰ বাবে কোনো সেউজ কৰিড’ৰ নিৰ্মাণ কৰিব নালাগে বুলি তেওঁ কৈছে।
)
ছ’চিয়েল মিডিয়াত তেওঁ লিখিছে, “মই ডিজিৰ সৈতে কথা পাতিছো যে যেতিয়া মই পথেৰে যিকোনো ঠাইলৈ যাওঁ তেতিয়া কোনো গ্ৰীণ কৰিড’ৰ নিৰ্মাণ কৰিব নালাগে বা যাতায়ত বন্ধ কৰিব নালাগে ৷ ৰাজহুৱা অসুবিধা কম কৰিবলৈ আৰু চাইৰেনৰ ব্যৱহাৰ কম কৰিবলৈ তেওঁলোকক মই নিৰ্দেশ দিছো।’’
তেওঁ কয় যে, “যিকোনো ধৰণৰ লাঠি চাৰ্জ বা আক্ৰমণাত্মক ইংগিতৰ ব্যৱহাৰ সম্পূৰ্ণৰূপে পৰিহাৰ কৰিব লাগে। মই মোৰ কেবিনেট সহকৰ্মীসকলকো একে আদৰ্শ অনুসৰণ কৰিবলৈ কৈছো। সকলো কামতে আমাৰ আচৰণ জনসাধাৰণৰ অনুকূল হ’ব লাগে। আমি ইয়াত জনসাধাৰণৰ সেৱা কৰিবলৈ আহিছো, তেওঁলোকৰ অসুবিধাৰ সৃষ্টি কৰিবলৈ নহয়।’’
উল্লেখ্য যে জম্মু-কাশ্মীৰৰ উপ-ৰাজ্যপাল মনোজ সিনহাই বুধবাৰে ওমৰ আব্দুল্লাক মুখ্যমন্ত্ৰী হিচাপে শপত গ্ৰহণ কৰায়। আব্দুল্লাই দ্বিতীয়বাৰৰ বাবে মুখ্যমন্ত্ৰী হিচাপে পৰিগণিত হৈছে আৰু তেওঁৰ দাদা শ্বেখ আব্দুল্লা আৰু পিতৃ ফাৰুক আব্দুল্লাৰ পিছত এই পদত অধিষ্ঠিত হোৱা আব্দুল্লা পৰিয়ালৰ তৃতীয় প্ৰজন্ম। ওমৰ আব্দুল্লাৰ লগতে ৫জন মন্ত্ৰী - ছাকিনা মাছুদ, জাভেদ দাৰ, জাভেদ ৰাণা, সুৰিন্দৰ চৌধুৰী আৰু সতীশ শৰ্মাইও শপত গ্ৰহণ কৰিছে।
২০১৯ চনত ৩৭০ অনুচ্ছেদ বাতিলৰ পিছত কেন্দ্ৰীয় শাসিত অঞ্চলত এইখনেই প্ৰথম নিৰ্বাচিত চৰকাৰ। শেহতীয়াকৈ অনুষ্ঠিত হোৱা বিধানসভা নিৰ্বাচনত ৰাষ্ট্ৰীয় সন্মিলনে ৯০খন আসনৰ ভিতৰত ৪২খন আসন লাভ কৰাৰ বিপৰীতে মিত্ৰজোঁটৰ অংশীদাৰ কংগ্ৰেছে ৬খন আসন লাভ কৰে। আপে ১ খন আসন লাভ কৰিবলৈ সক্ষম হয়।
Continue Reading
