আত্মহত্যা নে হত্যা? মৃত্যুৰ পূৰ্বে ছুৰাটৰ বিজেপি নেত্ৰীয়ে নিজৰ সংগীক কৰিলে ফোন

ঘটনাস্থলীৰ পৰা কোনো ছুইচাইড নোট বিচাৰি পোৱা নাই আৰক্ষীয়ে। দীপিকা পেটেলৰ আত্মহত্যাৰ পিছত গুজৰাটত সৃষ্টি হৈছে হুলস্থুল। আৰক্ষীয়ে এই বিষয়টোক বিশেষ গোচৰ হিচাপে লৈ অধিক তদন্ত আৰম্ভ কৰিছে। দীপিকাৰ মৃত্যুৰ পিছত তেওঁৰ এগৰাকী সহকৰ্মীৰ সৈতে হোৱা কথা-বতৰা আৰক্ষীয়ে প্ৰকাশ কৰিছে, য’ত বিজেপি নেতাগৰাকীয়ে মানসিক চাপৰ মাজেৰে পাৰ হৈ যোৱাৰ কথা স্বীকাৰ কৰিছিল। আৰক্ষীৰ মতে, ঘটনাৰ পূৰ্বে দীপিকা পেটেলে ৩০ নং ৱাৰ্ডৰ কাউন্সিলাৰ চিৰাগ সোলংকীক ফোন কৰি মানসিক চাপত থকা আৰু জীৱন শেষ কৰিব বিচৰা বুলি কয়। চিৰাগ লগে লগে দীপিকাৰ ঘৰ উপস্থিত হয়। তেওঁ বাৰে বাৰে দুৱাৰত টোকৰ মাৰিলে যদিও ভিতৰৰ পৰা কোনো সঁহাৰি নাপালে। ইয়াৰ পিছতে দুৱাৰখন ভাঙি দিয়াত দীপিকাৰ মৃতদেহ ফেনত ওলমি থকা অৱস্থাত দেখা পায় ।

ঘটনাৰ সময়ত দীপিকাৰ স্বামী ঘৰৰ বাহিৰত আছিল। দীপিকাৰ মৃতদেহ দেখা পাই লগে লগে চিৰাগ সোলংকিয়ে তেওঁক চিকিৎসালয়লৈ লৈ যায়। কিন্তু তাত থকা চিকিৎসকে তেওঁক মৃত বুলি ঘোষণা কৰে। মৰণোত্তৰ পৰীক্ষাৰ প্ৰতিবেদনত ফাঁচী লৈ মৃত্যু হোৱা বুলি নিশ্চিত কৰা হৈছে। আৰক্ষীয়ে তেওঁৰ আত্মহত্যাৰ আঁৰৰ কাৰণ জানিবলৈ তেওঁৰ মোবাইল ফোনটো জব্দ কৰি ফৰেনছিক পৰীক্ষাৰ বাবে প্ৰেৰণ কৰিছে। আনহাতে, মৃতকৰ এজন আত্মীয়ই কয় যে দীপিকা দীৰ্ঘদিন ধৰি বিজেপি কৰ্মী আছিল আৰু সমাজসেৱাও কৰি আছিল। তেওঁৰ পৰিয়ালে সদায় দীপিকাৰ হত্যাৰ আশংকা কৰিছিল। আত্মীয়জনে কয় যে ই হত্যাও হ’ব পাৰে। এই বিষয়ে আৰক্ষীয়ে গুৰুত্বসহকাৰে তদন্ত কৰিব লাগে।

এই কথা সদৰী কৰে উপ আৰক্ষী আয়ুক্ত বিজয় সিং গুৰজাৰে। আলথানাৰ ৩০ নং ৱাৰ্ডৰ বিজেপি মহিলা মৰ্চাৰ সভানেত্ৰী আছিল দীপিকা। বৰ্তমান আত্মহত্যাৰ আঁৰৰ কাৰণ জানিব পৰা হোৱা নাই। পৰিয়াল আৰু ঘনিষ্ঠ লোকক জেৰা অব্যাহত ৰাখিছে আৰক্ষীয়ে। দীপিকা পেটেলৰ মৃত্যুত ছুৰাট আৰু গুজৰাটৰ ৰাজনৈতিক মহলত শোক আৰু উদ্বেগৰ ঢৌৰ সৃষ্টি হৈছে। মানসিক চাপৰ কাৰণ আৰু আন যিকোনো চাপৰ দিশৰ ওপৰত অনুসন্ধান চলি আছে। হত্যাৰ কোণৰ পৰাও এই গোচৰৰ তদন্ত অব্যাহত আছে।