ডিজিটেল ডেস্কঃ পাপকৰ্মই আগুৰিছে সময়। মানুহে ইমানেই পাপ কৰিবলৈ ধৰিছে যে বলি হৈছে নিজ সন্তানো। এগৰাকী মাতৃয়ে পৰকীয়া প্ৰেমত মত্ত হৈ হত্যা কৰিলে নিজ সন্তানক।
উত্তৰ প্ৰদেশৰ বৰেলীত সংঘটিত হৈছে এই ঘৃণনীয় ঘটনা। আনম নামৰ মহিলাগৰাকীয়ে প্ৰেমিকৰ লগত ফোনত কথা পাতিছিল। সেই সময়তে তেওঁৰ দুবছৰীয়া ছোৱালীজনীয়ে প্ৰেমালাপত বাধা দি অশান্তি দিছিল। এই কথাত বিৰক্ত হৈ ছোৱালীজনীক ছাদৰ পৰা পেলাই দিয়ে মাতৃয়ে।
পৰিয়ালৰ লোকে প্ৰথমে ইয়াক দুৰ্ঘটনা বুলি গণ্য কৰিছিল। কিন্তু চুবুৰীয়াৰ চিচিটিভিৰ জৰিয়তে মহিলাগৰাকীৰ কুকাৰ্য পোহৰলৈ আহে। বৰ্তমান আৰক্ষীয়ে মহিলাগৰাকীক গ্ৰেপ্তাৰ কৰিছে।
কন্যাক হত্যা কৰাৰ পাছত আনমে ইয়াক দুৰ্ঘটনা যেন দেখুৱাবলৈ চেষ্টা কৰিছিল। ছোৱালীজনীৰ মৃত্যু হৈছে বুলি দুখত কান্দি-কাটি আউলী-বাউলী হৈছিল। কিন্তু তেওঁৰ এই অভিনয় সোনকালেই পোহৰলৈ আহিল।
ঘটনাটো পোহৰলৈ অহাৰ পাছতেই পত্নী আনমৰ বিৰুদ্ধে স্বামী মুৰ্ছিদে এজাহাৰ দাখিল কৰে। জেৰাৰ অন্তত আৰক্ষীয়ে গ্ৰেপ্তাৰ কৰে অভিযুক্ত মহিলাগৰাকীক।
এটা কাৰখানাত ৱেল্ডাৰ হিচাপে কাম কৰা মুৰ্ছিদ ঘটনাটো ঘটাৰ সময়ত ঘৰত নাছিল। এই সময়ছোৱাত পত্নী আনমে কন্যাক ঘৰৰ ওপৰৰ ছাদৰ পৰা তললৈ পেলাই দিয়ে আৰু স্বামীক কন্যা আহত হোৱাৰ কথা অৱগত কৰে। এই তথ্য লাভ কৰাৰ লগে লগে মুৰ্ছিদে ঘৰলৈ দৌৰি গৈ কন্যাক চিকিৎসালয়লৈ লৈ যায় আৰু তাতেই কন্যাক চিকিৎসকে মৃত ঘোষণা কৰে। সকলোৱে প্ৰথমে ইয়াক দুৰ্ঘটনা বুলি ভাবিছিল যদিও চিচিটিভিয়ে সকলো কাণ্ড পোহৰলৈ আনি সত্য উদঙাই দিয়ে।
Continue Reading
