ডিজিটেল ডেস্কঃ আৰক্ষীৰ চকুত ১৩ বছৰে ধূলি দি চুৰি কাৰ্যত লিপ্ত থকা এজন চোৰ সদ্যহতে পৰিল আৰক্ষীৰ জালত। চোৰটোৰ এখন ভৰি বেয়া অথচ তেওঁ চুৰিবিদ্যাত আছিল পাকৈত। এই ঘটনা পাটনাৰ।
পাটনা আৰক্ষীয়ে গ্ৰেপ্তাৰ কৰিছে কোটিপতি চোৰটোক। এই চোৰটোৱে বিগত ১৩ বছৰ ধৰি পাটনাৰ বিভিন্ন অঞ্চলত কোটি কোটি টকাৰ চুৰিকাৰ্য সংঘটিত কৰি আহিছে। দেওবাৰে পাটলীপুত্ৰ থানা এলেকাৰ নেহৰু নগৰত চোৰটো ধৰা পৰে। স্থানীয় লোকে আৰক্ষীক খবৰ দিয়ে, তাৰপাছতে তেওঁক গ্ৰেপ্তাৰ কৰা হয়। এতিয়া চুৰি হোৱা সামগ্ৰী উদ্ধাৰ কৰাত ব্যস্ত আৰক্ষী।
পাটনা আৰক্ষীয়ে কয় যে ‘‘আমি এজন শাৰীৰিকভাৱে অক্ষম চোৰক ধৰিবলৈ সক্ষম হৈছোঁ। তেওঁৰ এখন ভৰি অচল। চোৰটোৱে পাটনাৰ প্ৰতিটো অঞ্চলতে চুৰি কৰিছে। এতিয়ালৈকে তেওঁ অকলেই কোটি কোটি দামৰ গহনা আৰু নগদ ধন চুৰি কৰিছে। দেওবাৰে সন্ধিয়া পাটনাৰ নেহৰু নগৰ অঞ্চলৰ এটা ঘৰৰ পৰা চুৰি কৰি থকা অৱস্থাত তেওঁ ধৰা পৰে। আমি গোচৰ ৰুজু কৰি তেওঁৰ বিৰুদ্ধে ব্যৱস্থা গ্ৰহণ কৰিছোঁ।’’
চোৰটোৱে নিজৰ নাম দীনেশ ওৰফে লেংৰা বুলি সদৰী কৰিছে। আৰক্ষীয়ে জনোৱা মতে, অভিযুক্ত চোৰটো পাটনাৰ ৰামকৃষ্ণ নগৰত ভাড়াঘৰত বাস কৰে। তেওঁৰ পৰিয়ালত কোনো নাই।
আৰক্ষীয়ে সদ্যহতে দীনেশৰ পৰা ২.৫ লাখ টকাৰ গহনা উদ্ধাৰ কৰিছে। যোৱা ১৩ বছৰত কোটি কোটি টকা চুৰি কৰিছে যদিও আৰক্ষীয়ে এতিয়াও সেই ধন উদ্ধাৰ কৰিবলৈ সক্ষম হোৱা নাই। তেওঁ এদিনতে পাটনাৰ কেইবাটাও অঞ্চলত ২৫ লাখ টকাৰ গহনা আৰু নগদ ধন চুৰি কৰিছে।
Continue Reading
