ডিজিটেল ডেস্কঃ শান্তিনিকেতনৰ বিশ্ব-ভাৰতী বিশ্ববিদ্যালয়ৰ অসমীয়া বিভাগৰ বাবে এক উল্লেখযোগ্য সাফল্যত বিশ্ববিদ্যালয় অনুদান আয়োগে বিভাগটোক পূৰ্ণাংগ উচ্চ শিক্ষাৰ এককলৈ উন্নীতকৰণৰ অনুমোদন জনাইছে।
এই বিকাশৰ লক্ষ্য হৈছে অসমীয়া অধ্যয়নত শৈক্ষিক আৰু সাংস্কৃতিক কাৰ্যকলাপ বৃদ্ধি কৰা।
প্ৰস্তাৱিত ছটা শিক্ষক পদৰ ভিতৰত তিনিজন সহকাৰী অধ্যাপক আৰু এজন সহযোগী অধ্যাপককে ধৰি চাৰিটাত অনুমোদন জনাইছে ইউজিচিয়ে। আনুষ্ঠানিক অনুমোদন ইমেইলৰ জৰিয়তে বিশ্ব ভাৰতীৰ পঞ্জীয়কলৈ প্ৰেৰণ কৰা হয়।
বিশ্ববিদ্যালয়খনে যোৱা বছৰৰ মাৰ্চ মাহত ইউজিচিৰ ওচৰত প্ৰস্তাৱ দাখিল কৰিছিল, য’ত ছটা শিক্ষক আৰু ছটা অশিক্ষক পদৰ সৈতে এটা ব্যাপক অসমীয়া বিভাগ স্থাপনৰ বাবে অনুৰোধ জনাইছিল। ১৯৭৯ চনত এজন অধ্যাপকৰ সৈতে প্ৰতিষ্ঠা হোৱা অসমীয়া বিভাগটোৱে চাৰি বছৰৰ পাছত সোণালী জয়ন্তী উদযাপন কৰিবলৈ সাজু হৈছে। এই অনুমোদন ইয়াৰ ইতিহাসৰ এক উল্লেখযোগ্য মুহূৰ্ত, যিয়ে অধিক শক্তিশালী শৈক্ষিক গাঁথনিৰ ভেটি স্থাপন কৰিছে।
পৰৱৰ্তী পদক্ষেপত বিত্ত মন্ত্ৰালয়ৰ পৰা চূড়ান্ত অনুমোদন লাভ কৰাটো জড়িত হৈ আছে, যিটো অনুমোদিত সম্প্ৰসাৰণ কাৰ্যকৰী কৰিবলৈ অতি গুৰুত্বপূৰ্ণ।
ইউজিচিৰ এই অনুমোদনে গৱেষণা, পাঠদান আৰু সাংস্কৃতিক কাম-কাজৰ নতুন বাট মুকলি কৰিব, যাৰ ফলত বিশ্ব-ভাৰতিত অসমীয়া ভাষা-সাহিত্যৰ ঐতিহ্য আৰু অধিক সমৃদ্ধ হ’ব বুলি আশা কৰা হৈছে।
এই সন্দৰ্ভত মুখ্যমন্ত্ৰী ড° হিমন্ত বিশ্ব শৰ্মাই ছ’চিয়েল মিডিয়া এক্সত প্ৰতিক্ৰিয়া প্ৰকাশ কৰিছে ৷ তেওঁ লিখিছে,‘শান্তিনিকেতনৰ বিশ্ব ভাৰতী বিশ্ববিদ্যালয়ত পূৰ্ণাংগ অসমীয়া বিভাগ স্থাপনৰ অনুমোদন জনাইছে। আমি আমাৰ ধ্ৰুপদী ভাষাক বহু দূৰলৈ লৈ যোৱাৰ লগতে ইয়াৰ ব্যৱহাৰক প্ৰসাৰিত কৰিবলৈ প্ৰতিশ্ৰুতিবদ্ধ।’
Continue Reading
