বিয়াৰ পৰা আহোতে খাৱৈত পৰিল বাহন; ১৪জনৰ মৃত্যু

ডিজিটেল ডেস্ক : এক শোকাৱহ পথ দুৰ্ঘটনা সংঘটিত হৈছে উত্তৰাখণ্ডৰ চম্পাৱত জিলাত৷ মঙলবাৰে পুৱা সংঘটিত হোৱা এই দুৰ্ঘটনাত মৃত্যু হয় ১৪জন লোকৰ৷ জিলাখনৰ চুখিধাং ৰীথা চাহিব পথৰ ওচৰত দ’ খাৱৈত বাহন পৰি যোৱাৰ ফলত এই দুৰ্ঘটনা সংঘটিত হয়৷ দুৰ্ঘটনাটোত আহত আন দুজন লোকক চিকিৎসালয়লৈ লৈ যোৱা হয়। উদ্ধাৰকাৰী এটা দল লগে লগে ঘটনাস্থলীত উপস্থিত হৈ অভিযান চলায়৷ কুমাওঁৰ উপ-আৰক্ষী মহাপৰিদৰ্শক নীলেশ আনন্দ ভৰ্ণে জনোৱা মতে দুৰ্ঘটনাত পতিত হোৱা দলটোৱে এখন বিয়াত অংশগ্ৰহণ কৰি উভতি আহিছিল। দুৰ্ঘটনাগ্ৰস্ত বাহনখনত মুঠ ১৬ জন যাত্ৰী আছিল বুলি জানিব পৰা গৈছে। দুৰ্ঘটনাত মৃত্যু হোৱাসকললৈ প্ৰধানমন্ত্ৰী নৰেন্দ্ৰ মোদীয়ে টুইটাৰযোগে সমবেদনা জ্ঞাপন কৰে। মোদীয়ে টুইটযোগে কয়, 'উত্তৰাখণ্ডৰ চম্পাৱত সংঘটিত দুৰ্ঘটনাটো হৃদয়বিদাৰক। এই দুৰ্ঘটনাত মৃত্যু হোৱা লোকসকলৰ পৰিয়াললৈ মই সমবেদনা জ্ঞাপন কৰিছো। স্থানীয় প্ৰশাসনে সাহায্য আৰু উদ্ধাৰৰ কামত নিয়োজিত হৈ আছে।' উল্লেখ্য যে, যোৱা বৰ্ষৰ অক্টোবৰত, একেধৰণৰ দুটা দুৰ্ঘটনাত কেইবাজনো লোকৰ মৃত্যু হৈছিল। উত্তৰাখণ্ডৰ বাগেশ্বৰ জিলাত পশ্চিমবংগৰ পৰা পাঁচজন পৰ্যটক নিহত হয় আৰু ১৫জন আহত হয়৷ তেওঁলোকৰ বাহনখন ফাৰ্চালীৰ বেটপ নলাৰ ওচৰত ওলোটাই আন এখন গাড়ীৰ সৈতে সংঘৰ্ষ হোৱাৰ পাছত খাৱৈত পৰি যায়।