পশ্চিমবংগৰ ৫৭টা মুছলমান অধ্যুষিত সমষ্টিৰ ১২টাত বিজেপিৰ জয়

ডিজিটেল ডেস্ক: পশ্চিম বংগৰ বিধানসভাৰ নিৰ্বাচনত এইবাৰ ভাৰতীয় জনতা পার্টিয়ে (বিজেপি) তৃণমূল কংগ্ৰেছৰ (টি এম চি) দুর্গ হিচাপে পৰিচিত মুছলমান অধ্যুষিত অঞ্চলত প্ৰভাৱ বিস্তাৰ কৰিবলৈ সক্ষম হয়।

শেহতীয়া পৰিসংখ্যা অনুসৰি, ৰাজ্যখনৰ ২৯৩টা বিধানসভা সমষ্টিৰ ভিতৰত ৫৪টা মুছলমান অধ্যুষিত সমষ্টি আছে। মুছলমান ভোটাৰসকলে এই সমষ্টিকেইটাত প্ৰাৰ্থীৰ ভাগ্য নির্ণয় কৰে। এই ৫৪টা সমষ্টিৰ ভিতৰত এইবাৰ নিৰ্বাচনত ৩৩টা টি এম চিয়ে আৰু ১২টাত বিজেপিয়ে জয় সাব্যস্ত কৰে। 

২০২১ চনৰ নিৰ্বাচনতকৈ এইবাৰ বিজেপিয়ে সমষ্টিকেইটাত প্ৰভাৱ বিস্তাৰ কৰিবলৈ সক্ষম হয়। ২০২১ চনত টি এম চিয়ে ৫২টা আৰু বিজেপিয়ে ১টা মুছলমান অধ্যুষিত সমষ্টিত জয়ী হৈছিল। মুখ্যমন্ত্রী মমতা বেনার্জীয়ে এই মুছলমান অধ্যুষিত সমষ্টিকেইটাত দুর্গ অক্ষুণ্ণ ৰখাৰ প্রচেষ্টা কৰিও ব্যর্থ হয়। ২০১১ চনৰ লোকপিয়ল মতে পশ্চিম বংগৰ মুঠ জনসংখ্যাৰ ২৭% হৈছে মুছলমান লোক। আনহাতে, বর্তমান সময়ত ৩৩ শতাংশলৈ বৃদ্ধি পাইছে। মুছলমান অধ্যুষিত জিলাসমূহ হৈছে মুর্শিদাবাদ, মালদহ আৰু উত্তৰ দিনাজপুৰ। 

এই জিলাকেইখনৰ সমষ্টিকেইটাই পশ্চিম বংগৰ নিৰ্বাচনত গুৰুত্বপূৰ্ণ ভূমিকা লৈ আহিছে। আনহাতে, ভোটাৰ তালিকাৰ বিশেষ ব্যাপক সংশোধনীত (এছ আই আৰ) মুৰ্শিদাবাদত ৪.৫ লাখ, মালদহত ২.৩ লাখ ভোটাৰৰ নাম কর্তনে সমষ্টিকেইটাত জনবিন্যাসত প্ৰভাৱ পৰিছে। মালদহৰ ৰাটুৱা, চঞ্চল, মালতিপুৰ আৰু হাবিৰপুৰত মুছলমান ভোটাৰৰ নাম অধিক কর্তন হৈছিল। 

বিজেপিৰ মুখ্যমন্ত্ৰী পদৰ সম্ভাব্য প্রার্থী শুভেন্দু অধিকাৰীয়ে কয় যে এইবাৰ নিৰ্বাচনত টি এম চিৰ শক্তিশালী দখলত থকা দক্ষিণ বংগৰ মুছলমান ভোটক বিজেপিয়ে দুভাগত বিভক্ত কৰাৰ দিশত ভাল প্ৰদৰ্শন কৰিছে। বিশেষকৈ মালদহ, মুর্শিদাবাদ আৰু উত্তৰ দিনাজপুৰত মুছলমান ভোটাৰ দুভাগত বিভক্ত হ'ল। দক্ষিণ বংগ আৰু কোচবিহাৰত মুছলমান ভোটাৰৰ ওপৰত টি এম চিৰ পূৰ্বতে দখল আছিল যদিও বর্তমান সময়ত সেই প্রভার নাইকিয়া হৈছে। আনহাতে, তৃণমূলৰ পৰা বহিষ্কৃত হুমায়ুন কবিৰে নতুন দল গঠন কৰি এইবাৰ টি এম চিৰ মুছলমান ভোট বেংকত পৰোক্ষ আঘাত হানিলে। বহু সমষ্টিত মুছলমান লোক টি এম চি-হুমায়ুন কবিৰৰ দলৰ মাজত বিভাজন হয়।

উৎস: দৈনিক জনমভূমি