বনকৰা মহিলাই আটাত প্ৰস্ৰাৱ মিহলাই ৰুটী বনাই গৃহস্থৰ পৰিয়ালক খুওৱাৰ কাৰণ আহিল পোহৰলৈ

উত্তৰ প্ৰদেশৰ গাজিয়াবাদত ঘটিছিল এই ঘটনা। প্ৰস্ৰাৱ মিহলোৱা ৰুটী খাই পৰিয়ালটোৰ আটাইকেইজন সদস্যৰ লিভাৰ আৰু পেট বেয়া হৈ পৰিল। এতিয়া তেওঁৰ এই জঘন্য কাণ্ডৰ আঁৰৰ কাৰণ উদঙাই দিছে আৰক্ষীয়ে। থানা ক্ৰছিং ৰিপাব্লিক অঞ্চলৰ এজন ব্যৱসায়ীৰ ঘৰত যোৱা আঠ বছৰ ধৰি ঘৰুৱা সহায়ক হিচাপে কাম কৰি থকা ৩২ বছৰীয়া ৰীনাক ইতিমধ্যে গ্ৰেপ্তাৰ কৰিছে আৰক্ষীয়ে। প্ৰস্ৰাৱ মিহলাই কিয় ৰুটী বনাইছিল ইয়াৰ আঁৰৰ কাৰণ জানিবলৈ আৰক্ষীয়ে তেওঁক তীব্ৰ জেৰা কৰে। অভিযুক্ত মহিলাগৰাকীয়ে প্ৰথমে এই সকলোবোৰ অভিযোগ অস্বীকাৰ কৰিছিল যদিও চিচিটিভিৰ ফুটেজ দেখুওৱাৰ পিছত তেওঁ নিজৰ অভিযোগ স্বীকাৰ কৰে। 

আৰক্ষীৰ জেৰাৰ সময়ত অভিযুক্ত মহিলাগৰাকীয়ে কয় যে তেওঁ যোৱা চাৰিমাহ ধৰি এই লেতেৰা কাম কৰি আহিছে। ৰীনাই কয় যে পৰিয়ালটোৱে প্ৰতিটো বিষয়তে তেওঁক গালি-শপনি পাৰিছিল। কেৱল এয়াই নহয়, তেওঁৰ প্ৰতিটো কৰ্মত খুট উলিয়াইছিল। এই কথাত ৰীনাই অপমানিত অনুভৱ কৰিছিল। অপমানৰ প্ৰতিশোধ ল’বলৈ তেওঁ যোৱা চাৰিমাহ ধৰি খাদ্যত প্ৰস্ৰাৱ মিহলাবলৈ আৰম্ভ কৰিছিল। ৰীনাই কয় যে যেতিয়া তেওঁ প্ৰস্ৰাৱ মিহলোৱা ৰুটী পৰিয়ালটোক পৰিবেশন কৰিছিল আৰু তেওঁলোকে খাইছিল, তেতিয়া তেওঁৰ অপমানৰ প্ৰতিশোধ সম্পূৰ্ণ হৈছিল। এই কথাত তেওঁ অতি সকাহ অনুভৱ কৰিছিল আৰু তেওঁৰ প্ৰতিশোধ সম্পূৰ্ণ হোৱা যেন অনুভৱ কৰিছিল। আৰক্ষী বিষয়াসকলে এই কথা শুনি আচৰিত হৈ পৰিছে। উল্লেখ্য যে অভিযুক্ত ৰীনা উত্তৰ প্ৰদেশৰ বুলন্দশ্বাহৰ জিলাৰ খুৰজাৰ মিৰপুৰৰ বাসিন্দা। 

গাজিয়াবাদৰ থানা ক্ৰছিং ৰিপাব্লিক অঞ্চলৰ ছ’চাইটীত বাস কৰা এজন ৰিয়েল এষ্টেট ব্যৱসায়ী আৰু তেওঁৰ পৰিয়াল যোৱা কেইমাহমানৰ পৰা গুৰুতৰভাৱে অসুস্থ হৈ পৰিছিল। পেট আৰু লিভাৰৰ ৰোগত আক্ৰান্ত হৈ আছিল পৰিয়ালৰ লোক। প্ৰথম অৱস্থাত পৰিয়ালটোৱে ইয়াক স্বাভাৱিক সংক্ৰমণ বুলি ভাবি চিকিৎসকৰ ওচৰত চিকিৎসা কৰাইছিল যদিও অৱস্থাৰ কোনো উন্নতি হোৱা নাছিল।

যেতিয়া তেওঁলোকৰ স্বাস্থ্যৰ অৱনতি ঘটিছিল, তেতিয়া তেওঁলোকৰ খাদ্যাভ্যাসত কিবা ভুল হৈছে বুলি সন্দেহ কৰিছিল। ইয়াৰ পিছত পৰিয়ালৰ লোকে নিজৰ পাকঘৰ আৰু অন্যান্য অংশত চিচিটিভি কেমেৰা স্থাপন কৰে, যাতে খাদ্য প্ৰস্তুতিৰ ওপৰত নজৰ ৰাখিব পৰা যায়। ইয়াৰ পিছতেই চিচিটিভিৰ ফুটেজত ৰীনাই খাদ্যত প্ৰস্ৰাৱ মিহলাই দিয়াৰ ঘটনা পোহৰলৈ আহে। ৰীনাই পাকঘৰৰে এটা বাচনত প্ৰস্ৰাৱ কৰিছিল আৰু সেই প্ৰস্ৰাৱখিনি আটাত ঢালি দিছিল। এই ঘৃণনীয় কাণ্ড দেখি গোটেই পৰিয়ালটো স্তম্ভিত হৈ পৰিল। লগালগ ভুক্তভোগীৰ পৰিয়ালে গোচৰ ৰুজু কৰে আৰু আৰক্ষীয়ে অভিযুক্ত মহিলাগৰাকীক গ্ৰেপ্তাৰ কৰে।