দেশত অবৈধ অনুপ্ৰৱেশকাৰীৰ আতংক; ১৬ জনকৈ অবৈধ অনুপ্ৰৱেশকাৰী আটক মহাৰাষ্ট্ৰত

জানিব পৰা মতে বাংলাদেশৰ পৰা অবৈধভাৱে ভাৰতত প্ৰৱেশ কৰি অনুপ্ৰৱেশকাৰীৰ দলে মহাৰাষ্ট্ৰৰ বিভিন্ন চহৰত থাকিবলৈ আৰম্ভ কৰিছিল। মহাৰাষ্ট্ৰ আৰক্ষীৰ সন্ত্ৰাসবাদ বিৰোধী শাখাৰ বিশেষ অভিযানত শুকুৰবাৰে ১৬ জন বাংলাদেশী অনুপ্ৰৱেশকাৰীক গ্ৰেপ্তাৰ কৰে। গ্ৰেপ্তাৰ হোৱাসকলৰ ভিতৰত কমেও ৬ গৰাকী মহিলাও অন্তৰ্ভুক্ত আছে। আৰক্ষীৰ সূত্ৰ অনুসৰি তেওঁলোকৰ হাতত ভাৰতত প্ৰৱেশ বা থাকিবলৈ কোনো নথি-পত্ৰ পোৱা নগ’ল। মহাৰাষ্ট্ৰৰ নৱী মুম্বাই, থানে, সোলাপুৰ আৰু জালনা অঞ্চলৰ পৰাও গ্ৰেপ্তাৰ কৰা খূবৰ আহিছে।

আৰক্ষীৰ সূত্ৰ অনুসৰি বন্দীসকলে অবৈধভাৱে ভাৰতত প্ৰৱেশ কৰি কেনেবাকৈ ভুৱা আধাৰ কাৰ্ড আৰু অন্যান্য ভাৰতীয় পৰিচয় পত্ৰ ক্ৰয় কৰে।

বাংলাদেশী অনুপ্ৰৱেশকাৰীক বিচাৰি উলিয়াবলৈ বিগত কেইদিনমানৰ পৰা মহাৰাষ্ট্ৰ আৰু দিল্লীৰ বিভিন্ন প্ৰান্তত আৰক্ষী অভিযান চলি আছে। যোৱা বুধবাৰে মহাৰাষ্ট্ৰ আৰক্ষীৰ উগ্ৰপন্থী বিৰোধী শাখাই মুম্বাই, নৱী মুম্বাই, থানে আৰু নাছিকৰ স্থানীয় থানাৰ সহযোগত ১৭ জনকৈ বাংলাদেশী অনুপ্ৰৱেশকাৰীক গ্ৰেপ্তাৰ কৰে। গ্ৰেপ্তাৰ হোৱাসকলৰ ভিতৰত ১৪ জন পুৰুষ আৰু তিনিগৰাকী মহিলাও আছে। তেওঁলোকৰ পৰা ভুৱা আধাৰ কাৰ্ড আৰু পেন কাৰ্ডো উদ্ধাৰ কৰা হৈছে আৰক্ষীৰ সূত্ৰই প্ৰকাশ কৰিছে।

শেহতীয়াকৈ দিল্লী আৰক্ষীয়েও কেইবাটাও অভিযান চলাই যোৱা সপ্তাহত ভাৰতত অবৈধভাৱে বসবাস কৰাৰ অপৰাধত দিল্লীৰ পৰা ৫ বাংলাদেশী নাগৰিকক গ্ৰেপ্তাৰ কৰিছিল। আৰক্ষীয়ে জনোৱা মতে, তেওঁলোকে ভাৰতত থাকিবলৈ কোনোধৰণৰ বৈধ নথি দেখুৱাব নোৱাৰিলে। মুঠ ১১ জন লোকক আৰক্ষীয়ে গ্ৰেপ্তাৰ কৰা বুলি সদৰি কৰিছে। ইয়াৰে পাঁচজন বাংলাদেশী আৰু বাকীসকলে ভুৱা নথি-পত্ৰ তৈয়াৰ কৰাত সহায় কৰা বুলি অভিযোগ উত্থাপন কৰিছে। সম্প্ৰতি দেশত পুনৰ অবৈধ বাংলাদেশী অনুপ্ৰৱেশকাৰীৰ সমস্যাই উদ্বেগৰ সৃষ্টি কৰিছে।