ৰূপহীহাটত ড্ৰাগছৰ বিৰুদ্ধে আৰক্ষীৰ সফল অভিযান; ড্ৰাগছসহ আটক দুই সৰবৰাহকাৰী

ডিজিটেল ডেস্ক: ৰাজ্যজুৰি অব্যাহত থকা ড্ৰাগছ বিৰোধী অভিযানৰ অংশ হিচাপে ৰূপহীহাট আৰক্ষীয়ে পুনৰ এক বৃহৎ সাফল্য লাভ কৰিবলৈ সক্ষম হৈছে। এক গোপন সূত্ৰৰ পম খেদি ৰূপহীহাট আৰক্ষীৰ এটা দলে গেৰেকী অঞ্চলত এক তীব্ৰ অভিযান চলায়। এই অভিযানকালতে ড্ৰাগছ সৰবৰাহ কৰি থকা অৱস্থাত এখন ই-ৰিক্সা বাহন জব্দ কৰাৰ লগতে বুজন পৰিমাণৰ ড্ৰাগছসহ দুজন সৰবৰাহকাৰীক আটক কৰে আৰক্ষীয়ে।

আৰক্ষীৰ জালত পৰা ধৃত ড্ৰাগছ সৰবৰাহকাৰী দুটা হৈছে লিতন দাস (বাসস্থান: কাঞ্চনপুৰ, ৰূপহীহাট) আৰু বিক্ৰম ৰয় (বাসস্থান: কাঞ্চনপুৰ, ৰূপহীহাট)।

আৰক্ষীয়ে সৰবৰাহকাৰী দুটাৰ জিম্মাৰ পৰা ৩০ টাকৈ ড্ৰাগছ ভৰ্তি কণ্টেইনাৰ জব্দ কৰে। জব্দকৃত ড্ৰাগছখিনিৰ মুঠ ওজন প্ৰায় ৪৫.৪৮ গ্ৰাম বুলি জানিব পৰা গৈছে। ড্ৰাগছ কঢ়িয়াবলৈ ব্যৱহাৰ কৰা ই-ৰিক্সাখনো আৰক্ষীয়ে নিজৰ জিম্মাত লৈছে।

বৰ্তমান ৰূপহীহাট আৰক্ষীয়ে ধৃত লিতন দাস আৰু বিক্ৰম ৰয়ক থানাত ৰাখি তীব্ৰ জেৰা অব্যাহত ৰাখিছে। এই ড্ৰাগছ ব্যৱসায়ৰ সৈতে আন কোনো ডাঙৰ চক্ৰ জড়িত হৈ আছে নেকি, সেই সন্দৰ্ভত আৰক্ষীয়ে অধিক তথ্য লাভৰ বাবে তদন্ত ক্ষিপ্ৰতৰ কৰি তুলিছে।