ডিজিটেল ডেস্কঃ পঞ্জাবৰ মুখ্যমন্ত্ৰী ভগৱন্ত মানে ৰাজ্যৰ স্বাস্থ্য মন্ত্ৰী বিজয় চিংলাক তেওঁৰ বিৰুদ্ধে দুৰ্নীতিৰ অভিযোগত বৰ্খাস্ত কৰিলে। মানে কৈছিল যে মন্ত্ৰীজনে নিবিদাৰ বাবে এক শতাংশ কমিছন দাবী কৰিছে বুলি গম পোৱাৰ পিছত তেওঁ এই সিদ্ধান্ত লৈছিল।
ভগৱন্ত মানে কয় যে "মই মন্ত্ৰীজনৰ বিৰুদ্ধে কঠোৰ ব্যৱস্থা গ্ৰহণ কৰিছো। মই তেওঁক মন্ত্ৰীসভাৰ পৰা আঁতৰাই দিছো," মুখ্যমন্ত্ৰীয়ে এটা ভিডিঅ' বাৰ্তাত এই কথা কয়। ভগৱন্ত মনে লগতে আৰক্ষীক বৰ্খাস্ত মন্ত্ৰীজনৰ বিৰুদ্ধে গোচৰ ৰুজু কৰিবলৈ নিৰ্দেশ দিছে।
ইয়াৰ পাছতে আপৰ সাংসদ ৰাঘৱ চাধাই টুইট কৰে। তেওঁ কয় "আম আদমী পাৰ্টি হৈছে একমাত্ৰ দল যাৰ দুৰ্নীতিৰ বিৰুদ্ধে ব্যৱস্থা লোৱাৰ সততা, সাহস আৰু সৎতা আছে। পূৰ্বতে আমি ইয়াক দিল্লীত দেখিছিলো, এতিয়া আমি ইয়াক পঞ্জাবত প্ৰত্যক্ষ কৰি আছো। দুৰ্নীতিৰ বাবে শূণ্য সহনশীলতা পদক্ষেপ গ্ৰহণ কৰা মুখ্যমন্ত্ৰী ভগৱন্ত মানৰ পদক্ষেৰ প্ৰশংসনীয়।
মন্ত্ৰীসভাৰ পৰা বৰ্খাস্ত হোৱা চিংলা মানছাৰ এজন বিধায়ক। তেওঁ পেছাত এজন দন্ত চিকিৎসক আৰু চহৰখনত এখন দন্ত চিকিৎসালয় চলায়। চিংলাই প্ৰায় সাত বছৰ আগতে আপত যোগদান কৰিছিল।
দেশৰ ইতিহাসত এইটো কেৱল দ্বিতীয়বাৰৰ বাবে যে এজন মুখ্যমন্ত্ৰীয়ে তেওঁৰ নিজৰ মন্ত্ৰীসভাৰ সহকৰ্মীৰ বিৰুদ্ধে এনে কঠোৰ ব্যৱস্থা গ্ৰহণ কৰিছে। ২০১৫ চনত, আপৰ আহ্বায়ক আৰু দিল্লীৰ মুখ্যমন্ত্ৰী অৰবিন্দ কেজৰিৱালে তেওঁৰ এজনক বৰ্খাস্ত কৰিছিল আৰু এতিয়া পঞ্জাবৰ মুখ্যমন্ত্ৰীয়ে এই পদক্ষেপ গ্ৰহণ কৰিছে।
উল্লেখ্য যে দেশৰ লগতে ৰাজ্যৰ বিভিন্ন প্ৰান্তৰ মন্ত্ৰী-বিধায়কৰ বিৰুদ্ধে বিয়াগোম কেলেংকাৰীৰ অভিযোগ থকাৰ পাছতো কোনো এজন মুখ্যমন্ত্ৰী বা প্ৰধানমন্ত্ৰীয়ে অভিযুক্তৰ বিৰুদ্ধে কঠোৰ ব্যৱস্থা গ্ৰহণ কৰা পৰিলক্ষিত নহল, কিন্তু পঞ্জাবৰ মুখ্যমন্ত্ৰীয়ে এইক্ষেত্ৰত এক যুগান্তকাৰী পদক্ষেপ গ্ৰহণ কৰি সকলোৰে দৃষ্টি কাঢ়িবলৈ সক্ষম হৈছে।
Continue Reading
