একেটা পৰিয়ালৰ ৫ জনৰ চিপ লৈ আত্মহত্যা! কিয় ল'লে এই ভয়ংকৰ সিদ্ধান্ত?

মনোজ ঝাই পত্নী সুন্দৰ মণি, মাতৃ সীতা দেৱী আৰু সন্তান সত্যম আৰু শিৱমৰ সৈতে বাস কৰিছিল। মনোজৰ দুগৰাকী কন্যাও আছে। এগৰাকী কন্যাৰ নাম নিভা। নিভা স্বামীৰ সৈতে পিতৃগৃহলৈ ফুৰিবলৈ আহিছিল। আত্মহত্যাৰ ঘটনাটো হোৱাৰ দিনা নিভাই স্বামীৰ সৈতে আন এটা কোঠাত শুইছিল। ৰাতিপুৱা সাৰ পাই নিভাই দেখে যে কাষৰ কোঠাটো খোলা আছে আৰু ঘৰৰ পাঁচজন সদস্য চিপ লৈ ওলমি আছে। এই ভয়ংকৰ দৃশ্য দেখি নিভাই চিঞৰিবলৈ ধৰে। নিভাৰ চিঞৰ শুনি ওচৰ-চুবুৰীয়া তাত গোট খায়। স্থানীয় লোকে লগে লগে আৰক্ষীক খবৰ দিয়ে। আৰক্ষীয়ে পাঁচটা মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। 

এই ঘটনাৰ পিছতে অঞ্চলটোত হুলস্থূলৰ সৃষ্টি হয়। সেই স্থানৰ ওচৰতে জনসমাগম হয়। আৰক্ষীয়ে অতি কষ্টৰে ভিৰ আঁতৰাবলৈ সক্ষম হৈছিল। দলসিংহছাৰাৰ আৰক্ষী অধীক্ষক হৃদয়কান্তই জনোৱা মতে মৰণোত্তৰ পৰীক্ষাৰ প্ৰতিবেদনলৈ অপেক্ষা কৰা হৈছে। তেতিয়াহে মৃত্যুৰ প্ৰকৃত কাৰণ জানিব পৰা যাব। 

প্ৰাৰম্ভিক তদন্তত পোহৰলৈ আহিছে যে পৰিয়ালটোত বহুত ধাৰ আছিল। ছোৱালীজনীৰ বিয়াৰ বাবেও মনোজ ঝাই বহু লোকৰ পৰা ধাৰ লৈছিল। পৰিয়ালটোৰ ওপৰত ধাৰৰ হেঁচা আছিল যাৰ বাবে তেওঁলোক অতিশয় চিন্তাত দিন কটাইছিল। ওচৰ-চুবুৰীয়াই জনোৱা মতে আৰ্থিক অসুবিধাৰ বাবে পৰিয়ালটো যথেষ্ট অসুবিধাত আছিল। এই ঘটনাটোৱে সমগ্ৰ অঞ্চলজুৰি তীব্ৰ চাঞ্চল্যৰ সৃষ্টি কৰিছে।