ডিজিটেল ডেস্কঃ মানুহৰ অপৰিসীম মানসিক শক্তি থাকিলে অসাধ্যও সাধন কৰিব পাৰে। ইচ্ছাশক্তি প্ৰবল হ'লে ভাঙি পেলাব পাৰি সকলো বাধাৰ প্ৰাচীৰ।
কেৰালাত ই চি বিনোদ নামৰ ৫০ বছৰীয়া লোকজনে সকলোৰে মনত যোগাইছে উৎসাহ, জগাইছে প্ৰেৰণা। থ্ৰিছুৰত তেওঁ মাৰাথনত পাঁচ কিলোমিটাৰ দৌৰি সকলোকে অবাক কৰি তোলে কাৰণ সেই লোকজনে এখন ভৰিৰেই দৌৰিছিল। সোঁ ভৰিখন কেন্সাৰ ৰোগত হেৰুৱাইছিল ই চি বিনোদে।
থ্ৰিছুৰৰ আৰিমপুৰৰ বাসিন্দা বিনোদ এগৰাকী মাৰাথন দৌৰবিদ। অৱশ্যে দুবছৰ আগতে কেন্সাৰ ৰোগে তেওঁৰ জীৱন সলনি কৰি পেলালে। মুম্বাই মাৰাথনত সপোনৰ দৌৰৰ বাবে প্ৰস্তুতি চলাই থাকোঁতে তেওঁৰ কৰ্কট ৰোগ ধৰা পৰে, আৰু তেওঁৰ সোঁ ভৰিখন আঁঠুৰ ওপৰত কাটিবলগীয়া হয়।
প্ৰত্যাহ্বানৰ মাজতো বিনোদে হাৰ মানিবলৈ অস্বীকাৰ কৰিলে। অংগচ্ছেদৰ পিছত তেওঁ নিজৰ চাকৰি আগবঢ়াই নিব নোৱাৰিলে কিন্তু তেওঁৰ অদম্য ইচ্ছাশক্তি আৰু দৃঢ়তাই তেওঁক জীৱন বাটত আগুৱাই লৈ যায়। অ’ভিএছ ফাউণ্ডেশ্যনৰ সহযোগত বিনোদে ইলেক্ট্ৰিক অটো চলাবলৈ আৰম্ভ কৰে আৰু পুনৰ কৰ্মসংস্থাপনৰ বাট মুকলি কৰে।
যদিও তেওঁৰ শাৰীৰিক ক্ষমতা সীমিত আছিল, তথাপিও বিনোদে দৌৰৰ প্ৰতি থকা আকৰ্ষণক হ্ৰাস নকৰিবলৈ বদ্ধপৰিকৰ আছিল। তেওঁ প্ৰতিদিনে পুৱা আৰু গধূলি প্ৰশিক্ষণ লৈছিল, অসম্ভৱক সম্ভৱ কৰি তুলিবলৈ তেওঁ নিজকে প্ৰস্তুত কৰিছিল।
১৬ ফেব্ৰুৱাৰী দেওবাৰে বিনোদে কোনেও কল্পনা কৰিব নোৱাৰা কামটো সাধন কৰিলে: এখন ভৰিৰেই পাঁচ কিলোমিটাৰ দৌৰ ৫০ মিনিটত সম্পূৰ্ণ কৰিলে বিনোদে। তেওঁৰ জয়ে প্ৰমাণ কৰিলে মানুহে কৰিম বুলি ভাবিলে কৰিব নোৱাৰা কাম একোৱেই নাই।
Continue Reading
