গুৰুগ্ৰামৰ সৈতে আমেৰিকাৰ প্ৰাক্তন ৰাষ্ট্ৰপতি জিমি কাৰ্টাৰৰ বিশেষ সম্পৰ্ক; তেওঁৰ নামত আছে ভাৰতৰ এখন গাঁও

হাৰিয়ানাৰ গুৰুগ্ৰামৰ কাৰ্টাৰপুৰী গাঁৱৰ নামটো আমেৰিকাৰ প্ৰাক্তন ৰাষ্ট্ৰপতি জিমি কাৰ্টাৰৰ নামেৰেই "কাৰ্টাৰপুৰী" ৰখা হৈছিল। আগতে এই গাঁওখনৰ নাম আছিল দৌলতপুৰ নাছিৰাবাদ। তেওঁৰ মৃত্যুৰ খবৰ পোৱাৰ লগে লগে গুৰুগ্ৰামৰ "কাৰ্টপুৰী" গাঁৱতো তেওঁক স্মৰণ কৰা হয়। আমেৰিকাৰ ৰাষ্ট্ৰপতি হৈ থকাৰ সময়তে জিমি কাৰ্টাৰে ১৯৭৮ চনৰ ৩ জানুৱাৰীত পত্নী ৰোজালিন কাৰ্টাৰৰ সৈতে মাকৰ ইচ্ছা পূৰণৰ বাবে এই গাঁওখনলৈ আহিছিল। সেই সময়ত গাঁৱৰ মানুহে তেওঁক হাৰিয়ানৱী পোছাক উপাহৰ দিছিল যিটো কাৰ্টাৰে পৰিধান কৰিছিল। আৰু ইয়াৰ পাছতে গুৰুগ্ৰামৰ ২৩ নং ছেক্টৰৰ সমীপত অৱস্থিত দৌলতপুৰ নাছিৰাবাদ গাঁৱৰ নাম সলনি কৰি কাৰ্টাৰপুৰী কৰা হয়। কাৰ্টাৰপুৰী গাঁৱত বসবাস কৰা লোকসকলে জনোৱা মতে সেই সময়ত গাঁৱত দীপাৱলীৰ দৰে এটা উৎসৱ পালন কৰা হৈছিল।

উল্লেখযোগ্য যে জিমি কাৰ্টাৰৰ মাতৃ বেছি লিলিয়ান কাৰ্টাৰে ১৯৬০ চনত তেতিয়াৰ দৌলতপুৰ নাছিৰাবাদ গাঁৱত পিছ কৰ্পছৰ সৈতে স্বাস্থ্য স্বেচ্ছাসেৱী হিচাপে কাম কৰিছিল। জিমি কাৰ্টাৰ ভাৰত ভ্ৰমণলৈ যোৱাৰ কথা গম পাই তেওঁ লগতে দৌলতপুৰ নাছিৰাবাদ গাঁওখনো চাবলৈ ইচ্ছা প্ৰকাশ কৰিছিল।

আটাইতকৈ বেছি দিন জীয়াই থকা আমেৰিকাৰ প্ৰাক্তন ৰাষ্ট্ৰপতি কাৰ্টাৰে ১৯৭৭ চনৰ পৰা ১৯৮১ চনলৈকে এই পদত কাৰ্যনিৰ্বাহ কৰিছিল। ‘ৱাটাৰগেট’ কেলেংকাৰী আৰু ভিয়েটনাম যুদ্ধৰ পিছত ৰাষ্ট্ৰপতি নিৰ্বাচনত জয়লাভ কৰিছিল প্ৰাক্তন ৰাষ্ট্ৰপতিগৰকী।