জৱাহৰলাল নেহৰুৰ নামতো আহিব পাৰে ইডিৰ চমন; কাৰ মনত এই আশংকা?

ডিজিটেল ডেস্ক: ‘নেচনেল হেৰাল্ড’ গোচৰত প্ৰৱৰ্তন সঞ্চালকালয়ে (ইডি) কংগ্ৰেছ অধ্যক্ষ ছোনিয়া গান্ধী আৰু তেওঁৰ সাংসদ তনয় ৰাহুল গান্ধীলৈ জাননী জাৰি কৰাৰ পাছত গান্ধী পৰিয়ালৰ পক্ষত থিয় দিছে শিৱসেনাৰ সাংসদ সঞ্জয় ৰাউতে৷ কালি কেন্দ্ৰৰ বিজেপি নেতৃত্বাধীন চৰকাৰক সমালোচনাৰ লক্ষ্য কৰি লয় সঞ্জয় ৰাউটে৷ ৰাউটে কয় যে পণ্ডিত জৱাহৰলাল নেহৰুৱেও ইডি আৰু চিবিআইৰ পৰা জাননী নোপোৱালৈকে কিছুলোকৰ আত্মা পৰিতৃপ্ত নহ’ব৷

শিৱসেনাৰ সাংসদজনে লগতে পিএম কেয়াৰ্ছ ফাণ্ডৰ পৰা বিজেপিৰ ভাণ্ডাৰত জমা কৰা শ শ কোটি টকাক লৈ প্ৰশ্ন উত্থাপন কৰে৷  অকল ইমানেই নহয়, ৰাউটে এখন সংবাদপত্ৰৰ নিয়মীয়া স্তম্ভত লিখিছিল- কংগ্ৰেছে পণ্ডিত নেহৰুৰ সংগঠনটো বজাই ৰাখিবলৈ কিছু লেনদেন কৰিব পাৰে (নেচনেল হেৰাল্ড নেহৰুৰ দ্বাৰা প্ৰতিষ্ঠা কৰা হৈছিল)। সংঘ পৰিয়ালৰ বহুতো সংগঠনে একে ধৰণৰ লেনদেন কৰে। কিন্তু নেহৰুৰ হেৰাল্ড অপৰাধী হৈ পৰিছে। তেওঁ লগতে কয়, এতিয়া এই ক্ষেত্ৰত যদি নেহৰুক জাননী জাৰি কৰা হয় আৰু তেওঁৰ স্মাৰকত পেষ্ট কৰা হয়, তেন্তে আচৰিত হ’বলগীয়া একো নাথাকিব৷

নেচনেল হেৰাল্ড লাভৰ বাবে আৰম্ভ কৰা হোৱা নাছিল কিন্তু স্বাধীনতা আন্দোলনৰ অংশ হিচাপে আৰম্ভ কৰা হৈছিল। এই প্ৰক্ৰিয়াটোত কোনো ধন ৰপ্তানি হোৱা নাই৷ তৎস্বত্ত্বেও, ইডি গোচৰটোৰ সৈতে জড়িত হৈ পৰিছে৷ ইফালে, শিৱসেনাৰ নেতাগৰাকীয়ে দেওবাৰে প্ৰশ্ন কৰে যে প্ৰধানমন্ত্ৰী নৰেন্দ্ৰ মোদীয়ে বৰ্তমান কাশ্মীৰৰ পৰিস্থিতিৰ ওপৰত ভিত্তি কৰি ‘কাশ্মীৰ ফাইলছ’ৰ চিকুৱেলৰ প্ৰচাৰ কৰিব নেকি? মুখ্যমন্ত্ৰী উদ্ধৱ ঠাকৰেয়ে হিন্দু আৰু কাশ্মীৰী পণ্ডিতসকলৰ হত্যা সম্পৰ্কে উদ্বেগ প্ৰকাশ কৰাৰ এদিন পাছতে ৰাউতৰ প্ৰতিক্ৰিয়া জানিব পৰা গৈছে৷