ডিজিটেল ডেস্কঃ জাপানক ২-০ত পৰাস্ত কৰি মহিলা এছিয়ান চেম্পিয়নছ ট্ৰফীৰ ফাইনেলত প্ৰৱেশ কৰিছে ভাৰতে। এতিয়া ভাৰতীয় দলে ফাইনেলত মুখামুখি হ’ব চীনৰ বিৰুদ্ধে, যিটো দলে প্ৰথমখন ছেমি ফাইনেলত মালয়েছিয়াক ৩-১ত পৰাস্ত কৰে।
এই চেম্পিয়নছ ট্ৰ’ফীৰ ভাৰত বনাম চীনৰ ফাইনেল খেলখন বিহাৰৰ ৰাজগীৰত ২০ নৱেম্বৰত অনুষ্ঠিত হ'ব । জাপানৰ বিৰুদ্ধে ছেমি ফাইনেলৰ ৰোমাঞ্চকৰ খেলখনত নৱনীত কৌৰ আৰু লালৰেমছিয়ামীয়ে শেষ কোৱাৰ্টাৰত নিজৰ সুন্দৰ প্ৰদৰ্শনেৰে ভাৰতীয় দলৰ জয় নিশ্চিত কৰে।
এই ছেমি ফাইনেল মেচখন ইমানেই ৰোমাঞ্চকৰ আছিল যে ১৫ মিনিটৰ প্ৰথম তিনিটা কোৱাৰ্টাৰত দলৰ একো বিশেষ প্ৰদৰ্শন নাছিল যদিও শেষৰ ১৫ মিনিটত জাপানৰ দলটোৰ অৱস্থা বেয়া কৰিলে ভাৰতীয় দলে। শেষৰ কোৱাৰ্টাৰ আৰম্ভ হোৱাৰ মাত্ৰ ২ মিনিট পিছতে ভাৰতে পেনাল্টি ষ্ট্ৰ’ক লাভ কৰে, যিটো নৱনীত কৌৰে গ’ললৈ ৰূপান্তৰিত কৰি ভাৰতীয় দলে ১-০ গ’লত অগ্ৰগতি লাভ কৰে। খেলখন শেষ হ’বলৈ মাত্ৰ ৪ মিনিট বাকী আছিল, ৫৬ মিনিটত লালৰেমচিয়ামীয়ে জাপানী গ’লৰক্ষকক ডজ কৰি এটা গ’ল দি ভাৰতক ২-০ গ’লত অগ্ৰগতি প্ৰদান কৰে।
এতিয়া মহিলা এছিয়ান চেম্পিয়নছ ট্ৰফীৰ ফাইনেলত ভাৰতে চীনৰ বিৰুদ্ধে খেলিব। এই সংঘৰ্ষ অহা ২০ নৱেম্বৰত বিহাৰৰ ৰাজগীৰত সংঘটিত হ’ব। এফালে জাপানক ২-০ গ’লত পৰাস্ত কৰি ভাৰতে ফাইনেলত প্ৰৱেশ কৰাৰ বিপৰীতে চীনে মালয়েছিয়াক ৩-১ গ’লত পৰাস্ত কৰি খিতাপৰ সংঘৰ্ষত প্ৰৱেশ কৰে।
মহিলা হকী এছিয়ান চেম্পিয়নছ ট্ৰফীৰ ইতিহাসত ভাৰতীয় দলটোৱে পঞ্চমবাৰৰ বাবে ফাইনেলত প্ৰৱেশ কৰিছে আৰু ভাৰতীয় দলটোৱে বৰ্তমানলৈকে তিনিবাৰকৈ এই খিতাপ দখল কৰিছে। ২০২৩ চনত অনুষ্ঠিত চেম্পিয়নছ ট্ৰফীত ভাৰতীয় দলে ফাইনেলত জাপানক ৪-০ গ’লত পৰাস্ত কৰি খিতাপ অৰ্জন কৰে। যোৱা তিনিবাৰ তৃতীয় স্থানতে সন্তুষ্ট হ’বলগীয়া হৈছিল কিন্তু এইবাৰ অৱশেষত ফাইনেলত প্ৰৱেশ কৰাৰ সুযোগ পালে চীনে ৷
Continue Reading
