প্ৰৱঞ্চনাৰ গোচৰৰ পৰা সকাহ পালে গৌতম গম্ভীৰে

পূৰ্বে ৰিয়েল ইষ্টেট ফাৰ্ম ৰুদ্ৰ বিল্ডৱেল ৰিয়েলটি প্ৰাইভেট লিমিটেডৰ ফ্লেটৰ গ্ৰাহকক প্ৰৱঞ্চনা কৰাৰ গোচৰত গৌতম গম্ভীৰক নিৰ্দোষী বুলি আদালতে ৰায়দান কৰিছিল ৷ পিছে আদালতে প্ৰদান কৰা এই ৰায়দানক স্থগিত ৰখাৰ নিৰ্দেশ দিয়ে দিল্লী উচ্চ ন্যায়ালয়ে ৷ ন্যায়াধীশ মনোজ কুমাৰ ওহৰিৰ বিচাৰপীঠে দিয়ে এই স্থগিতাদেশৰ নিৰ্দেশ ৷

কোম্পানীটোৱে ফ্লেট ক্ৰেতাসকলৰ পৰা প্ৰৱঞ্চনাৰে ধন লোৱাৰ অভিযোগ উত্থাপিত হৈছে । অৰ্থনৈতিক অপৰাধ শাখাই ফ্লেটত বিনিয়োগকাৰীসকলৰ অভিযোগৰ ওপৰত গোচৰ ৰুজু কৰিছে । অভিযোগ কৰা হৈছে যে, কোম্পানীটোৱে গৌতম গম্ভীৰৰ নামত বিনিয়োগকাৰীসকলৰ পৰা ধন লয় যদিও ফ্লেটৰ মালিকীস্বত্ব প্ৰদান কৰা নাছিল ৷ ফ্লেটৰ ক্ৰেতাসকলে অভিযোগ কৰিছে যে, তেওঁলোকে ২০১১ চনত গাজিয়াবাদৰ ইন্দিৰাপুৰমত কোম্পানীটোৰ এটা ৰিয়েল ইষ্টেট প্ৰকল্পত ফ্লেট বুক কৰিছিল ৷ কিন্তু তেওঁলোকে ফ্লেটবোৰ পোৱা নাছিল । দিল্লী আৰক্ষীৰ অভিযোগপত্ৰত কোৱা হৈছে যে, কোম্পানীটোৱে ২০১৩ চনৰ ৬ জুনত ক্ৰেতাসকলক ফ্লেটবোৰ দিয়াৰ প্ৰতিশ্ৰুতি দিয়াৰ পিছতো ২০১৪ চনলৈকে দিয়া নাছিল ৷ ১৫ এপ্ৰিল ২০১৫ ত কৰ্তৃপক্ষই প্ৰকল্পটোৰ অনুমোদন বাতিল কৰে ।