ডিজিটেল ডেস্ক : জ্ঞানৱাপী মছজিদ বিতৰ্কই এতিয়া অধিক ব্যাপক ৰূপ লোৱা দেখা পোৱা গৈছে। মছজিদটোৰ অভ্যন্তৰত শিৱলিংগ থকাৰ বুলি কৰা দাবীক কেন্দ্ৰ কৰি তীব্ৰ হৈ পৰিছে বিতৰ্ক। আজি জ্ঞানৱাপী মছজিদ গোচৰৰ শুনানি উচ্চতম ন্যায়ালয়ত অনুষ্ঠিত হয়। এই শুনানিৰ সময়ত আদালতে নিৰ্দেশ দিয়ে যে মছজিদত জৰীপৰ সময়ত শিৱলিংগ উদ্ধাৰ হোৱা অঞ্চলটোৰ নিৰাপত্তা নিশ্চিত কৰিব লাগে। আদালতে এই সন্দৰ্ভত বাৰাণসীৰ জিলা দণ্ডাধীশক নিৰ্দেশ দিছে।
একে সময়তে, উচ্চতম ন্যায়ালয়ে উল্লেখ কৰে যে, মুছলমানসকলে কোনো বাধা অবিহনে যাতে জ্ঞানৱাপী মছজিদত নামাজ অব্যাহত ৰাখিব পাৰে সেয়া নিশ্চিত কৰিব লাগে। একে সময়তে, শীৰ্ষ আদালতখনে আবেদনকাৰী হিন্দু ভক্তসকলক জাননী জাৰি কৰে। এতিয়া, মছজিদ সমিতিৰ আৱেদনৰ শুনানিৰ তাৰিখ ১৯ মে' নিৰ্ধাৰণ কৰিছে ন্যায়ালয়ে।
সোমবাৰে, বাৰাণসী জিলাৰ এখন আদালতে মছজিদৰ যিটো অংশত শিৱলিংগ পোৱা বুলি দাবী কৰা হৈছিল সেই অংশটো জিলা প্ৰশাসনক ছীল কৰিবলৈ নিৰ্দেশ দিছিল। একে সময়তে, আদালতে কৈছিল যে শিৱলিংগ উদ্ধাৰ হোৱা বুলি দাবী কৰা ঠাইত মানুহৰ প্ৰৱেশ নিষিদ্ধ কৰা উচিত আৰু মাত্ৰ ২০জন লোকক মছজিদত প্ৰাৰ্থনা কৰিবলৈ অনুমতি দিব লাগে। অৱশ্যে নিম্ন আদালতৰ এই নিৰ্দেশ উচ্চতম ন্যায়ালয়ে স্থগিত কৰিছে।
উল্লেখ্য যে, জ্ঞানৱাপী মছজিদ চৌহদৰ জৰীপৰ কাম ১৪ৰ পৰা ১৬ মে'ৰ ভিতৰত সম্পন্ন কৰা হৈছিল। এই সময়ছোৱাত, এই শিৱলিংগটো উদ্ধাৰ হোৱা বুলি দাবী কৰা হৈছিল। ইয়াৰ পাছতে নিম্ন আদালতে নামাজত অংশগ্ৰহণকাৰী লোকৰ সংখ্যা সীমিত কৰি তোলাৰ নিৰ্দেশ দিছিল।
একে সময়তে, জ্ঞানৱাপী মছজিদ কৰ্তৃপক্ষই নিম্ন আদালতৰ সিদ্ধান্তৰ বিৰুদ্ধে উচ্চতম ন্যায়ালয়লৈ যায়। কৰ্তৃপক্ষই নিম্ন আদালতৰ ৰায়ত স্থগিতাদেশ বিচাৰি আবেদন কৰিছিল। এই আবেদনৰ শুনানি গ্ৰহণ কৰি আজি সৰ্বোচ্চ ন্যায়ালয়ে ইয়াৰ শুনানি গ্ৰহণ কৰে। উচ্চতম ন্যায়ালয়ে নিম্ন আদালতৰ শুনানিত প্ৰতিবন্ধকতা আৰোপ কৰা নাই।
Continue Reading
