আহোম ৰাজত্বকালত নাও চলোৱা ‘ৰংদৈ’ এতিয়া নিস্তব্ধ; যোৰহাটত এখন নৈক হত্যা

ডিজিটেল ডেস্ক: আহোম ৰাজত্বৰ সময়ছোৱাত গাঁও তথা নগৰসমূহ স্বৰ্গদেউসকলে সুশৃংখলিত, পৰিকল্পিতভাৱে নিৰ্মাণ কৰি পৰিৱেশ গঠনৰ আৰ্হি দেখুৱাই গৈছে। কিন্তু দিন বাগৰাৰ লগে লগে মানৱ সমাজে নিজৰ স্বাৰ্থ সিদ্ধিৰ বাবে পৰিৱেশ তন্ত্ৰৰ ওপৰত কুঠাৰাঘাত কৰি সমাজ জীৱনলৈ ভয়াৱহতাৰ ইংগিত কঢ়িয়াই আনিছে। 

যোৰহাটৰ উপকণ্ঠৰ বৃহত্তৰ ৰংদৈ-নিমাতী অঞ্চলত মানুহৰ জিংঘাসাৰ বলি হৈ এখন নৈ আৰু দুখনকৈ জানৰ অপমৃত্যু হোৱাৰ ফলত অঞ্চলটোৰ পৰিৱেশৰ ওপৰতো ব্যাপক প্ৰভাৱ পৰিছে। আহোম ৰাজত্বৰ কালত ডা-ডাঙৰীয়াসকলে নাও চলোৱা ঐতিহ্যমণ্ডিত 'ৰংদৈ' এতিয়া মৰাসুঁতিত পৰিণত হৈছে। এসময়ত সম্ভাৱনাৰ দুৱাৰ মুকলি কৰা 'ৰংদৈ' এতিয়া মানুহৰ চৰম অৱহেলাৰ বলি হৈ অপমৃত্যু হয়। ঐতিহাসিক অঞ্চলটোৰ লাহদৈগড়ৰ কাষেৰে বৈ অহা ৰংদৈ এতিয়া বোৱঁতী নৈ নহয়। 

বৃহত্তৰ অঞ্চলটোৰ এ টি ৰ'ডৰপৰা লাহদৈগড়, কাকজান, মেলেং আদি অঞ্চলৰ পানীধাৰা এই বোৱঁতী নৈ 'ৰংদৈ'ৰে বৈ আহি পটীয়া চৰলাত পৰি ওলাই যায়। বৃহত্তৰ অঞ্চলটোৰ চাৰিগাঁও, হাতীগড়, চাওখাট মৌজাৰ শতাধিক গাঁৱৰ বৃহৎ পানীধাৰা ৰংদৈয়েদি ওলাই অঞ্চলবাসীক কৃত্রিম বানৰপৰা পৰিত্ৰাণ কৰিছিল। কিন্তু ১৯৭০চনত ৰংদৈখনক ভেটি ভগনীয়া মথাউৰি নিৰ্মাণ কৰাত বোৱঁতী নদীখনক হত্যা কৰাৰ প্ৰক্ৰিয়া আৰম্ভ হয়। পানীৰ উৎসতে বন্ধ কৰি দিয়াত ৰংদৈৰ জলধাৰা ক্রমান্বয়ে স্তিমিত হৈ আহে। 

বর্তমান ৰংদৈ নদীখনৰ এতিয়া নামটোহে আছে। ক্রমান্বয়ে হাবি- জংঘলে আৱৰি ধৰি মৃত্যুৰ ক্ষণ গণিছে। বোৱঁতী নদীখনৰ নিমাতী পথত কাঠৰ দলং আছিল। কিন্তু কাঠৰ দলংখনৰ ঠাইত লোক নির্মাণ বিভাগে পকী পুল বহুৱাই দিয়াৰেপৰা পানীৰ নিষ্কাশনৰ ক্ষমতাও হেৰুৱাই পেলায়। নদীখনৰ এতিয়া কিছু অংশ মানুহে মুকলি ডাষ্টবিনলৈ পৰিণত কৰিছে। আনহাতে, ঠাইভেদে মাটি মানুহে নিজৰ কৰি লোৱা প্ৰৱণতাও বৃদ্ধি পাইছে। ৰংদৈখনত বেদখল কৰি নিজৰ সীমাৰ ভিতৰুৱা কৰি লৈছে বহুজনে। ইফালে ৰংদৈৰ কাষতে দোকান ঘৰ বহুৱাই জাবৰ- আৱৰ্জনাৰে পুতি পেলোৱাৰ দৃশ্যও সততে সুলভ হৈ পৰিছে। 

ইতিহাস প্রসিদ্ধ ৰংদৈ অঞ্চলটোৰ বোৱঁতী নদীখন বন্ধ হৈ পৰাত বালিচাপৰিৰ বৃহত্তৰ অঞ্চলটোৰ লাহদৈগড়ৰ কাষৰ আৰু বৰমুকলি পথাৰৰ সমীপৰ মানুহৰ ঘৰত কৃত্ৰিম পানী সোমাই অনিষ্ট সাধন কৰি আহিছে। আহোম ৰাজত্বৰ কালত নাও চলোৱা নদীখনৰ অপমৃত্যুৰ পাছতো কোনো জনপ্রতিনিধিয়ে আজিকোপতি গুৰুত্ব প্ৰদান কৰা নাই। ৰংদৈক খনন কৰি সম্পদলৈ ৰূপান্তৰ কৰিব পাৰে যদিও বাস্তৱসন্মত ধাৰণাৰে আগবাঢ়ি আহোঁতা এতিয়া কোনো নাই। যোৰহাট জিলা প্রশাসনে নদীখনৰ গুৰুত্বতা উপলব্ধি কৰি বিজ্ঞানসন্মতভাৱে খনন কৰি লাহদৈগড়ৰ কাষেৰে বোৱাই নিব পাৰিলে অঞ্চলটোৰ পৰিৱেশৰ ক্ষেত্ৰত ভাল ফল আশা কৰিব পাৰি। বিশেষকৈ কৃত্রিম বানৰপৰা হাত সৰাৰ লগতে এই জলধাৰাই ৰংদৈ পথাৰৰ কৃষি ক্ষেত্রখনতো আশা কৰিব পৰাকৈ সফলতা লাভ কৰিব। 

ৰংদৈক খনন কৰিব পাৰিলে মীনপালন কৰিও নিবনুৱা সংস্থাপনৰ যথেষ্ট থল আছে। আনহাতে, নিমাতীকে ধৰি দাঁতি-কাষৰীয়া অঞ্চলসমূহত পৰ্যটকৰ আকৰ্ষণ ভূমি হিচাপে গঢ়ি তোলাত মৃত ৰংদৈক ব্যৱহাৰ কৰিব পাৰে। ৰাজ্য চৰকাৰৰ অলেখ আঁচনি আছে যদিও 'ৰংদৈ'ক বচাবলৈ ৰজা ঘৰ তথা প্ৰজাঘৰে ব্যৱস্থা গ্ৰহণ কৰিবনে-এতিয়া পৰিৱেশপ্রেমীসকলৰ বাবে ই ডাঙৰ প্ৰশ্ন হৈ উঠিছে। টীয়ক বিধানসভা সমষ্টিৰ নৱ-নিৰ্বাচিত বিধায়কগৰাকীয়ে 'ৰংদৈ'ক সম্পদলৈ ৰূপান্তৰৰ ব্যৱস্থা কৰি তেওঁৰ তৎপৰতা আৰু বিচক্ষণতা দেখুৱাব বুলি ৰাইজে আশা কৰিছে। তেতিয়াহে এসময়ত নাও চলোৱা 'ৰংদৈ'য়ে ৰং সলাই পূৰ্বৰ ৰূপ পাব।

উৎস: দৈনিক জনমভূমি