নিজৰ সুবিধা অনুসৰি ষ্টেডিয়াম ব্যৱহাৰ: দিল্লীৰ আইএএছ বিষয়াক শাস্তিমূলক বদলি

ডিজিটেল ডেস্ক: দিল্লী চৰকাৰৰ দ্বাৰা পৰিচালিত ত্যাগৰাজ ষ্টেডিয়ামৰ খেলুৱৈ আৰু প্ৰশিক্ষকসকলে তেওঁলোকৰ প্ৰশিক্ষণ সোনকালে সামৰিবলৈ বাধ্য হোৱাৰ অভিযোগ কৰি আহিছিল৷ কিয়নো দিল্লীৰ প্ৰধান সচিব (ৰাজহ) আইএএছ বিষয়া সঞ্জীৱ খিৰৱাৰে তেওঁৰ সুবিধা অনুযায়ী তেওঁৰ কুকুৰটোক খোজ কঢ়াবলৈ লৈ যায়। সংবাদ মাধ্যমত প্ৰকাশিত খবৰ অনুসৰি, খেলুৱৈসকলে কমেও এঘণ্টা সোনকালে খেলপথাৰ এৰিব লাগিব যাতে খিৰৱাৰে তেওঁৰ কুকুৰৰ সৈতে মাটিত খোজ কাঢ়িব পাৰে। সঞ্জীৱ খিৰৱাৰ আৰু তেওঁৰ পত্নী ৰিংকু ডুগ্গাৰ সেই কাৰ্যই প্ৰতিক্ৰিয়াৰ সৃষ্টি কৰিছিল দিল্লীৰ লগতে ছ’চিয়েল মিডিয়াত৷ আৰু আইএএছ বিষয়া দুগৰাকীৰ এই কাৰ্যৰ বিৰুদ্ধে শাস্তিমূলক ব্যৱস্থা গ্ৰহণ কৰিছে দিল্লী চৰকাৰে৷ 

আইএএছ বিষয়া আৰু তেওঁৰ পত্নী ৰিংকু ডুগ্গাক লাডাখ আৰু অৰুণাচল প্ৰদেশলৈ বদলি কৰা হৈছে৷ এক নিৰ্দেশনাযোগেত গৃহ মন্ত্ৰণালয়ে কয় যে ১৯৯৪ বৰ্ষৰ আইএএছ বিষয়া সঞ্জীৱ খিৰৱাৰক তাৎক্ষণিকভাৱে লাডাখ আৰু তেওঁৰ পত্নীক অৰুণাচল প্ৰদেশলৈ বদলি কৰা হৈছে। 

চৰকাৰী সূত্ৰ অনুসৰি, গৃহ মন্ত্ৰণালয়ে দিল্লীৰ মুখ্য সচিবৰ পৰা খিৰৱাৰ আৰু তেওঁৰ পত্নীৰ দ্বাৰা ত্যাগৰাজ ষ্টেডিয়ামত সুবিধাৰ অপব্যৱহাৰৰ বিষয় সম্পৰ্কত প্ৰতিবেদন বিচাৰিছিল।

মুখ্য সচিবে বৃহস্পতিবাৰে সন্ধিয়া গৃহ মন্ত্ৰণালয়ক এক প্ৰতিবেদন দাখিল কৰে, যাৰ ফলত মন্ত্ৰণালয়ে তেওঁলোকক বদলিৰ নিৰ্দেশ দিয়ে।

সঞ্জীৱ খিৰৱাৰ বৰ্তমান দিল্লীত প্ৰধান সচিব (ৰাজহ) হিচাপে কৰ্মৰত৷ আনহাতে, দিল্লীৰ মুখ্যমন্ত্ৰী অৰবিন্দ কেজৰিৱালে সকলো ষ্টেডিয়াম খেলুৱৈৰ বাবে নিশা ১০ বজালৈকে মুকলি ৰাখিবলৈ নিৰ্দেশ দিয়ে। তেওঁ কয়, এইটো মোৰ দৃষ্টিগোচৰ হৈছে যে খেলুৱৈসকলে গৰমৰ বাবে সমস্যাৰ সন্মুখীন হৈছে আৰু সন্ধিয়া ৬ বা ৭ বজাৰ ভিতৰতে ষ্টেডিয়ামসমূহ বন্ধ হৈ যায়। আমি নিৰ্দেশনা জাৰি কৰিছোঁ যে সকলো ক্ৰীড়া সুবিধা নিশা ১০ বজালৈ খোলা থাকিব লাগে যাতে খেলুৱৈসকলে সেইবোৰ ব্যৱহাৰ কৰিব পাৰে৷