ডিজিটেল ডেস্কঃ মুম্বাইৰ পঞ্চমগৰাকী বলাৰ হিচাপে ৰঞ্জি ট্রফীত হেটত্রিক অৰ্জনৰ কৃতিত্ব অৰ্জন কৰিলে ছাৰ্দুল ঠাকুৰে। মেঘালয়ৰ বিৰুদ্ধে ৰঞ্জি ট্রফীৰ এলিট গ্রুপ 'এ'ৰ খেলখনৰ প্ৰথম দিনা ছাৰ্দুলে হেটত্রিকসহ দখল কৰা ৪টা উইকেটৰ সহায়ত মুম্বায়ে প্রথম দিনাই চালকৰ আসনত বহিছে।
ছাৰ্দুলে দাঙি ধৰা দুৰন্ত প্ৰদৰ্শনেৰে প্ৰথমে বেট ধৰা মেঘালয়ক প্রথম ইনিংছত মাথোঁ ৮৬ ৰানতে সীমিত ৰাখে মুম্বায়ে। পৰৱৰ্তী সময়ত মুম্বায়ে প্রথম ইনিংছ আৰম্ভ কৰি দুটা উইকেট হেৰুৱাই সংগ্ৰহ কৰে ২১৩ ৰান। দিনান্তত সিদ্ধেশ লাড ৮৯ আৰু আজিংক্য ৰাহানেই ৮৩ ৰানত বেট ধৰি থাকে। ইফালে, বেংগালুৰুত অনুষ্ঠিত গ্রুপ 'চি'ৰ খেলখনত হাৰিয়ানাৰ বিৰুদ্ধে প্রথম দিনা কর্ণাটকে প্রথম ইনিংছত সংগ্ৰহ কৰে ৫ উইকেটত ২৬৭ ৰান। ২০২০ চনৰ ফেব্ৰুৱাৰীত শেষবাৰলৈ ঘৰুৱা প্ৰতিযোগিতাখনত খেলা ৰাহুল তিনি নম্বৰত বেট ধৰিবলৈ আহি ৩৭টা বলত ২৬ ৰান কৰি আউট হয়।
আনহাতে, দিল্লীৰ অৰুণ জেটলি ষ্টেডিয়ামত দীর্ঘ ১২ বছৰৰ বিৰতিত তাৰকা বেটাৰ বিৰাট কোহলীয়ে ৰঞ্জি ট্ৰফীৰ খেলত নামে।ৰে'লৱেই ২৪১ ৰানত প্ৰথম ইনিংছ সামৰাৰ পাছত দিল্লীয়ে প্ৰথম দিনৰ সামৰণিৰ পৰলৈকে খেলি এটা উইকেট হেৰুৱাই ৪১ ৰান কৰিছে। দিল্লী তেনেদৰেই ২০০ ৰানত পিছ পৰি আছে।
উৎসঃ দৈনিক জনমভূমি
Continue Reading
