ডিমা হাছাওত ভয়ংকৰ পথ দুৰ্ঘটনাত এজনৰ মৃত্যু, এজন গুৰুতৰভাৱে আহত

ডিজিটেল ডেস্ক: ডিমা হাছাওৰ মাইবং অঞ্চলত কালি নিশা এক শোকাৱহ পথ দুৰ্ঘটনা সংঘটিত হয়। এই দুৰ্ঘটনাত এজন লোকৰ মৃত্যু হোৱাৰ লগতে আন এজন গুৰুতৰভাৱে আহত হৈছে। 

মাইবং আৰক্ষী থানাৰ অন্তৰ্গত ২৭ নম্বৰ ৰাষ্ট্ৰীয় ঘাইপথৰ কালাচান্দত এই দুৰ্ঘটনাটো ঘটে। শিলচৰৰ পৰা লংকা অভিমুখে আহি থকা AS 31 C 5409 নম্বৰৰ এখন বলেৰো পিকআপ বাহনে নিয়ন্ত্ৰণ হেৰুৱাই পথৰ পৰা তললৈ বাগৰি পৰে।

নিশা প্ৰায় ১২:৩০ বজাত সংঘটিত এই দুৰ্ঘটনাত বাহনখনৰ চালক ইফতিকাৰ হুছেইন (৩৭) থিতাতে নিহত হয়। তেওঁ লংকাৰ বামুণ গাঁৱৰ বাসিন্দা আছিল।

দুৰ্ঘটনাটোত বাহনখনৰ হেণ্ডিমেনজনো গুৰুতৰভাৱে আঘাতপ্ৰাপ্ত হয়। তেওঁক উদ্ধাৰ কৰি প্ৰথমে মাইবং অসামৰিক চিকিৎসালয়লৈ নিয়া হয় যদিও পৰৱৰ্তী সময়ত উন্নত চিকিৎসাৰ বাবে হোজাইৰ হাম হাস্পতাললৈ প্ৰেৰণ কৰা হয়।

মৃত চালকজনৰ পৰিয়ালৰ লোকে জানিবলৈ দিয়া মতে, ইফতিকাৰ হুছেইনে বলেৰো বাহনখনত শাক-পাচলি লৈ শিলচৰলৈ গৈছিল। কালি নিশা শিলচৰৰ পৰা লংকাৰ নিজ ঘৰলৈ উভতি অহাৰ পথতে এই ভয়ংকৰ দুৰ্ঘটনাই তেওঁৰ প্ৰাণ কাঢ়ি নিয়ে।

বিগত কিছুদিন ধৰি লামডিং-শিলচৰ সংযোগী এই ২৭ নম্বৰ ৰাষ্ট্ৰীয় ঘাইপথটো দুৰ্ঘটনাৰ কেন্দ্ৰবিন্দু হৈ পৰিছে। মাত্ৰ কেইদিনমান পূৰ্বে এই পথৰে হাতীখালি ফৰেষ্ট গেটৰ সন্মুখত সংঘটিত আন এক দুৰ্ঘটনাত শুভম বাউৰী নামৰ এজন ২৫ বছৰীয়া যুৱকৰ মৃত্যু হৈছিল।

ইটোৰ পিছত সিটো দুৰ্ঘটনাৰ বাবে স্থানীয় ৰাইজে পথছোৱাক এতিয়া 'অভিশপ্ত' বুলি অভিহিত কৰিছে। আৰক্ষীয়ে ইতিমধ্যে ঘটনাৰ সন্দৰ্ভত প্ৰয়োজনীয় ব্যৱস্থা গ্ৰহণ কৰিছে আৰু মৃতদেহটো মৰণোত্তৰ পৰীক্ষাৰ বাবে প্ৰেৰণ কৰিছে।