ডিজিটেল ডেস্কঃ অষ্ট্ৰেলিয়াৰ বিপক্ষে ভাৰতীয় মহিলা দলত স্থান লাভ কৰিলে অসম কন্যা উমা ছেত্ৰীয়ে। অষ্ট্ৰেলিয়াৰ বিপক্ষে আগন্তুক এদিনীয়া শৃংখলাৰ বাবে ভাৰতীয় মহিলা দলত স্থান লাভ কৰি চৰ্চাত উমা ছেত্ৰী। প্ৰথম অৱস্থাত ঘোষিত দলত স্থান লাভ কৰা নাছিল উমাই। কিন্তু উইকেটকীপাৰ য়স্তিকা ভাটিয়া আঘাতপ্ৰাপ্ত হোৱাত য়স্তিকাৰ স্থানত দলত অন্তৰ্ভুক্ত কৰা হৈছে উমাক। অষ্ট্ৰেলিয়াত চলি থকা মহিলা বিগ বেচ লীগৰ সময়ত য়স্তিকা ভাটিয়া হাতত আঘাত পাইছিল। এই আঘাতৰ বাবে য়স্তিকা আগন্তুক শৃংখলাটোৰ পৰা বাহিৰ হয় আৰু এনে পৰিস্থিতিত ব’ৰ্ডে উমাক দলত স্থান দিয়ে।
অষ্ট্ৰেলিয়াৰ বিপক্ষে শৃংখলৰ বাবে ভাৰতীয় মহিলা দলঃ হৰমনপ্ৰীত কৌৰ (অধিনায়ক), স্মৃতি মান্ধানা (সহ-অধিনায়ক), প্ৰিয়া পুনিয়া, জেমিমাহ ৰ’ড্ৰিগুৱেজ, হাৰলিন দেউল, ৰিচা ঘোষ, তেজল হাছাবনিছ, দীপ্তি শৰ্মা, মিন্নু মণি, প্ৰিয়া মিশ্ৰ, ৰাধা যাদৱ, তিতাছ সাধু, অৰুন্ধতী ৰেড্ডী, ৰেনুকা সিং, ছাইমা ঠাকুৰ, উমা ছেত্ৰী।
উল্লেখ্য যে উমাই ইতিমধ্যে টি-২০ ফৰ্মেটৰ জৰিয়তে জাতীয় দলৰ হৈ আন্তঃৰাষ্ট্ৰীয় ক্ৰিকেটত অভিষেক ঘটাইছে। বিগত জুলাই মাহত দক্ষিণ আফ্ৰিকাৰ বিপক্ষে টি-২০ শৃংখলাত অভিষেক ঘটায় উমাই। তেতিয়াৰ পৰা উমাই জাতীয় দলৰ হৈ চাৰিখন আন্তঃৰাষ্ট্ৰীয় টি-২০ মেচ খেলিছে।
Continue Reading
