যশপ্ৰীত বুমৰাহ; পুনৰ আই চি চি পুৰুষৰ টেষ্ট বলাৰ ৰেংকিঙৰ শীৰ্ষত

আই চি চি ৱৰ্ল্ড টেষ্ট চেম্পিয়নশ্বিপ ছিৰিজৰ অন্তৰ্গত বৰ্ডাৰ-গাভাস্কাৰ ট্ৰফীৰ প্ৰথমখন খেলত ভাৰতে ২৯৫ ৰানত জয়লাভ কৰে৷মেচখনত বুমৰাহে ৮টা উইকেট দখল কৰিবলৈ সক্ষম হয়। আৰু মেচখনত ‘প্লেয়াৰ অৱ দ্য মেচ’ লাভ কৰে। এই দুৰ্দান্ত প্ৰদৰ্শনৰ বাবেই বুমৰাহৰ পুৰণি ৰেংকিঙৰ পৰা দুটা স্থান উন্নিত হৈ আই চি চি ৰেংকিঙত শীৰ্ষ স্থানত উপনিত হয়। দক্ষিণ আফ্ৰিকাৰ বেগী বলাৰ কাগিছ’ ৰাবাডা আৰু অষ্ট্ৰেলিয়াৰ বেগী বলাৰ জোছ হেজলউডক পিছপেলাই শীৰ্ষস্থানত উপনিত হয়। 

উল্লেখযোগ্য যে ইংলেণ্ডৰ বিৰুদ্ধে বিশাখাপট্টনম টেষ্টত ৯টা উইকেট দখল কৰি ২০২৪ চনৰ ফেব্ৰুৱাৰী মাহত বুমৰাহে প্ৰথমবাৰৰ বাবে আই চি চি পুৰুষৰ টেষ্ট বলাৰ ৰেংকিঙত শীৰ্ষস্থান দখল কৰিছিল। ইয়াৰ পিছত অক্টোবৰ মাহত বাংলাদেশৰ বিৰুদ্ধে শৃংখলাত পুনৰ শীৰ্ষস্থান দখল কৰিছিল যদিও বিগত কেইটামান সপ্তাহত কাগিছ’ ৰাবাদাই বুমৰাহক পিছপেলাই ৰেংকিঙত আগবাঢ়ি আছে।

টিম ইণ্ডিয়াৰ আন এজন বেগী বলাৰ মহম্মদ ছিৰাজেও এই ৰেংকিঙত অগ্ৰগতি লাভ কৰিছে।সোঁহাতৰ বেগী বলাৰ মহম্মদ ছিৰাজে পাৰ্থত অষ্ট্ৰেলিয়াৰ বিৰুদ্ধে ৫টা উইকেট দখল কৰিবলৈ সক্ষম হৈছিল। যাৰবাবে খেলুৱৈগৰাকী তিনিটা স্থান আগোৱাই ২৫ নম্বৰ স্থানত উপনীত হৈছে।

ইফালে ইংলেণ্ডৰ অভিজ্ঞ খেলুৱৈ জো ৰুট এতিয়াও আই চি চি পুৰুষৰ টেষ্ট বেটছমেনৰ ৰেংকিঙত ১ নম্বৰত আছে। শেহতীয়াকৈ যশস্বী জয়ছৱালে এতিয়া ইংলেণ্ডৰ খেলুৱৈগৰাকীক ৰেংকিঙত প্ৰত্যাহ্বান জনাইছে।যশস্বী জয়ছোৱাল শেহতীয়া আই চি চি পুৰুষৰ টেষ্ট ৰেংকিঙত ২ নম্বৰ স্থানত আছে। অষ্ট্ৰেলিয়াৰ বিৰুদ্ধে দ্বিতীয় ইনিংছত তেওঁ এক উজ্জ্বল শতক অৰ্জন কৰে। যিটো পাৰ্থ টেষ্টৰ টাৰ্নিং পইণ্ট হিচাপে পৰিগণিত হোৱাৰ লগতে ইনিংছৰ বাবেই তেওঁ দুটা স্থান আগোৱাই দ্বিতীয় স্থান লাভ কৰে আৰু কেৰিয়াৰৰ শ্ৰেষ্ঠ ৰেটিং পইণ্ট ৮২৫ পইণ্টো লাভ কৰে

উল্লেখনীয় যে পাৰ্থত ৮৯ ৰানৰ ইনিংছ খেলি অষ্ট্ৰেলিয়াৰ বাওঁহাতৰ বেটছমেন ট্ৰেভিছ হেডে তিনিটা স্থান আগোৱাই দশম স্থানত উপনিত হৈছে। একে সময়তে বিৰাট কোহলীয়ে টেষ্টত ৩০ সংখ্যক শতক অৰ্জন কৰাৰ পিছত ৯টা স্থান আগোৱাই ত্ৰয়োদশ স্থানত উপনিত হৈছে। টেষ্ট অলৰাউণ্ডাৰৰ ৰেংকিঙত ভাৰতীয় যুটি ৰবীন্দ্ৰ জাডেজা আৰু ৰবিচন্দ্ৰন অশ্বিন শীৰ্ষ ২টা স্থানত আছে।