ডিজিটেল ডেস্কঃ অত্যধিক আনন্দই কাল হ’ল কেইবাজনো লোকৰ বাবে। দেশত এতিয়া চলি আছে শাৰদীয় দুৰ্গোৎসৱ। ঠাই বিশেষে উদ্যাপন কৰা হৈছে শাৰদীয় নানান উৎসৱ । গুজৰাটত নৱৰাত্ৰি উপলক্ষে আয়োজন কৰা হৈছে গৰবা নত্যৰ। কিন্তু গৰবা নৃত্য কৰি থকাৰ সময়তে ৰাজ্য খনত বিগত ২৪ ঘণ্টাত ১০ জনকৈ লোকে প্ৰাণ হেৰুওৱাৰ ঘটনাত সমগ্ৰ দেশতে শোকৰ ছাঁ পৰিছে।
গৰবা নৃত্য কৰি থাকোতে মৃত্যু ঘটাৰ শেহতীয়া ঘটনাটো ঘটিছে গুজৰাটৰ কাপদভাঞ্জৰত। তাত গৰবা নৃত্য কৰি থাকোতে এজন ১৭ বছৰীয়া যুৱকৰ মৃত্যু হৈছে। নৱৰাত্ৰিৰ ছটা দিনত গৰবা নৃত্যৰ সময়ত কেৱল হৃদৰোগত আক্ৰান্ত হৈয়েই ৰাজ্য খনত ১০ জন লোকে প্ৰাণ হেৰুৱাইছে। এই দিন কেইটাত ১০৮ জৰুৰীকালীন এম্বুলেন্সলৈ ৫২১ টা হৃদৰোগত আক্ৰান্ত হোৱাৰ কল গৈছে।
শেহতীয়াকৈ গৰবা নৃত্য কৰি থাকোতে মৃত্যু ঘটা ১৭ বছৰীয়া যুৱক জনৰ নাম বীৰ শ্বাহ। নাচি থাকোতেই তেওঁ হৃদৰোগত আক্ৰান্ত হৈছিল ।
বীৰ শ্বাহক তৎক্ষণাৎ চিকিৎসাৰ বাবে চিকিৎসালয়লৈ লৈ যোৱা হৈছিল যদিও চিকিৎসকে তেওঁক মৃত বুলি ঘোষণা কৰে। তেওঁৰ আকস্মিক মৃত্যুৰ ফলত পৰিয়ালটোকে ধৰি সমগ্ৰ গাওঁখনত শোকৰ পৰিৱেশ বিয়পি পৰিছে।
বীৰৰ মৃত্যুৰ পিছত গৰবাৰ আয়োজকসকলে গৰবা নৃত্য কাৰ্যসূচী বাতিল কৰিছে। প্ৰশ্ন হৈছে আনন্দৰ সময়তে মানুহ কিয় প্ৰায়ে হৃদৰোগত আক্ৰান্ত হয়? বিশেষজ্ঞসকলে কৈ আহিছে যে কৰ্মবিমুখ লোক আৰু ধূমপায়ী লোকৰ মাজত হৃদৰোগত আক্ৰান্ত হোৱাৰ আশংকা বৃদ্ধি পায়। অত্যধিক মানসিক চাপৰ বাবেও হৃদৰোগ হ’ব পাৰে। আনন্দৰ সময়ত তেজৰ চলাচল বৃদ্ধি পায়। কিন্তু কৰ’নেৰী ধমনীয়ে সঠিকভাবে তেজ চলাচল কৰাত ব্যৰ্থ হ’লে হৃদৰোগত আক্ৰান্ত হোৱাৰ আশংকা বৃদ্ধি পায়। সেয়ে অত্যধিক আনন্দও বেয়া বুলি বহুতে কৈ আহিছে।
Continue Reading
