ডিজিটেল ডেস্কঃ প্ৰেমে একো বাধা নামানে। প্ৰেমৰ বাবে অসম্ভৱকো সম্ভৱ কৰিবলৈ মন যায়। কেৰেলাৰ এক কাহিনীয়ে সকলোৰে দৃষ্টি আকৰ্ষণ কৰিছে। এই কাহিনী পূৰ্ণিমা আৰু সন্দীপৰ। পূৰ্ণিমা তৃতীয় লিংগৰ। সন্দীপ এগৰাকী শাক-পাচলি বিক্ৰেতা। তৃতীয় লিংগৰ পূৰ্ণিমাৰ প্ৰেমত পৰে সন্দীপ। সন্দীপে সমাজ আৰু আইনী বাধাক অৱজ্ঞা কৰি বিয়া পূৰ্ণিমাক বিয়া কৰাইছিল আৰু প্ৰেমৰ কোনো সীমা নাথাকে বুলি প্ৰমাণ কৰিছিল। এই ভেলেণ্টাইন ডে’ত তেওঁলোকৰ কাহিনীয়ে সকলোৰে মন জয় কৰিছে।
শাক-পাচলিৰ দোকানখনলৈ আহোতে পূৰ্ণিমাৰ সৈতে পৰিচয় হৈছিল সন্দীপৰ। লাহে-লাহে দুয়োৰে মাজত বন্ধুত্ব গঢ় লৈ উঠে আৰু সেই বন্ধুত্বই অতি সোনকালেই লয় প্ৰেমৰ ৰূপ। দুয়ো বিবাহৰ সিদ্ধান্ত লয়। তেওঁলোকৰ মাজত শক্তিশালী বান্ধোন থকাৰ পিছতো তেওঁলোকৰ পথটো প্ৰত্যাহ্বানৰে ভৰি পৰিছিল। পূৰ্ণিমা তৃতীয় লিংগৰ হোৱা বাবে সকলোৱে এই বিবাহত বাধা দিছিল।
কেৱল পৰিয়ালৰ পৰাই নহয়, তৃতীয় লিংগৰ সম্প্ৰদায়ৰ ভিতৰত বিবাহ পঞ্জীয়নৰ ক্ষেত্ৰত আইনী ব্যৱস্থা নথকা বাবেও এই দম্পতীয়ে কঠোৰ বিৰোধিতাৰ সন্মুখীন হ’বলগীয়া হৈছিল।
তেওঁলোকে যেতিয়া আইনী বিবাহৰ বাবে আৱেদন কৰিছিল তেতিয়া দেখিছিল মেৰেজ ফৰ্মত কেৱল আছিল পুৰুষ আৰু মহিলাৰ ভাগ। তৃতীয় লিংগৰ বাবে কোনো ব্যৱস্থা নাছিল। তৃতীয় লিংগৰ অন্তৰ্ভুক্তিৰ বাবে যুঁজিছিল স্বামী সন্দীপে। অৱশেষত জয় হয় সন্দীপৰ। মেৰেজ ফৰ্মত তৃতীয় লিংগৰ বাবেও ব্যৱস্থা কৰা হয়। এয়া তৃতীয় লিংগৰ বাবে আছিল জয়ৰ প্ৰতীক।
২০২১ চনৰ ১৭ নৱেম্বৰত নীলেশ্বৰ পৌৰসভাত পঞ্জীয়ন কৰা এক অনুষ্ঠানত বিবাহপাশত আবদ্ধ হোৱাৰ লগে লগে পূৰ্ণিমা আৰু সন্দীপৰ প্ৰেম কাহিনীয়ে সফল ৰূপ পায়।
পূৰ্ণিমা আৰু সন্দীপৰ এই প্ৰেমে সকলোকে আপ্লুত কৰে, দুয়োৰে মাজত আছে মৰম-আন্তৰিকতা, বিশ্বাস, বুজাপৰা।
Continue Reading
