ডিজিটেল ডেস্কঃ পত্নীক পঢ়ুৱাই চৰকাৰী চাকৰি এটা লাভ কৰাত অশেষ কষ্ট কৰিছিল এগৰাকী স্বামীয়ে৷ পত্নীৰ সংস্থাপনৰ বাবে মাটি বন্ধকত থৈছিল স্বামীয়ে৷ পাছে চৰকাৰী চাকৰি পায়ে পতিক ত্যাগ কৰিবলৈ সিদ্ধান্ত ল’লে পত্নীয়ে। এই কাহিনী ৰাজস্থানৰ এহাল পতি-পত্নীৰ।
ৰাজস্থানৰ কোটাত বাস কৰা মনীষ মীনা নামৰ লোকজনে তেওঁৰ পত্নী স্বপ্না মীনাৰ বিৰুদ্ধে গুৰুতৰ অভিযোগ উত্থাপন কৰিছে। চৰকাৰী চাকৰি পাই পত্নীয়ে তেওঁক এৰি যোৱাৰ অভিযোগ উত্থাপন কৰিছে মনীষ মীনাই। তেওঁ কয় যে তেওঁ স্বপ্নাৰ সপোন পূৰণ কৰিবলৈ বহুত সহায় কৰিছিল আৰু পত্নীৰ পঢ়া-শুনাৰ খৰচো সম্পূৰ্ণ বহন কৰিছিল। আনকি মাটিও বন্ধকত ৰাখিছিল। ১৫ লাখ টকা খৰচ কৰি পত্নীক চাকৰি পোৱাত সহায় কৰিছিল মনীষ মীনাই।
কিন্তু প্ৰতাৰিত হোৱাৰ পাছত পত্নীয়ে কেনেকৈ চাকৰি পালে সেয়া উদঙাই দিলে মনীষ মীনাই। ইয়াৰ পাছতেই স্বপ্না মীনাক চাকৰিৰ পৰা নিলম্বন কৰা হৈছে।
আচলতে স্বামী মনীষ মীনাই অবৈধভাৱে পত্নীক ৰে’লৱেত চাকৰি দিবলৈ লাখ লাখ টকা খৰচ কৰিছিল, কিন্তু চাকৰি পোৱাৰ লগে লগে পত্নীয়ে স্বামীক নিবনুৱা বুলি কৈ তেওঁক এৰি থৈ গ’ল। বিষয়টো পোহৰলৈ অহাৰ পাছত এতিয়া চিবিআইয়ে তদন্ত আৰম্ভ কৰিছে আৰু ৰে’লৱে ভিজিলেন্স বিভাগেও এই বিষয়ত ব্যৱস্থা গ্ৰহণ কৰিছে।
স্বপ্নাৰ খুড়াক চেতনৰামে ইয়াত এটা ডাঙৰ খেল খেলিলে। তেওঁ ৰেলৱেৰ গাৰ্ড ৰাজেন্দ্ৰৰ জৰিয়তে ১৫ লাখ টকাত স্বপ্নাক চাকৰি দিয়াৰ পৰিকল্পনা কৰিছিল। মনীষৰ মতে, স্বপ্নাৰ ঠাইত লক্ষ্মী মীনা নামৰ এগৰাকী ছোৱালীক পৰীক্ষাত অৱতীৰ্ণ কৰাই দিয়া হৈছিল, যিয়ে পৰীক্ষাত ডামি প্ৰাৰ্থী হিচাপে অৱতীৰ্ণ হৈছিল। এই অবৈধ পদ্ধতিৰে ৰে’লৱেত নিৰ্বাচিত হৈছিল স্বপ্না। পত্নীয়ে চাকৰি পোৱাৰ লগে লগে মনীষে অনুভৱ কৰিলে যে এতিয়া তেওঁৰ জীৱনটো সুখৰ হৈ পৰিব কিন্তু তেওঁৰ আশাবোৰ অতি সোনকালেই ছিন্নভিন্ন হৈ পৰিল।
ৰে’লৱেত চাকৰি পোৱাৰ পাছতেই স্বপ্নাই মনীষৰ লগত সম্পৰ্ক ছেদ কৰে। পত্নীৰ এই বিশ্বাসঘাতকতাত আঘাত পাই মনীষে সমগ্ৰ বিষয়টো উদঙাই দিয়াৰ সিদ্ধান্ত লয়। এই কেলেংকাৰী সন্দৰ্ভত তেওঁ ৰে’লৱে ভিজিলেন্স বিভাগ আৰু চিবিআইত এজাহাৰ দাখিল কৰে। মনীষে অভিযোগ কৰে যে এইটো এটা সংগঠিত ৰেকেট, য’ত ৰে’লৱেৰ কৰ্মচাৰীও জড়িত হৈ থাকে, যিয়ে ধন লৈ ডামি প্ৰাৰ্থীৰ জৰিয়তে প্ৰাৰ্থীসকলক উত্তীৰ্ণ কৰায়।
এই ঘটনাই কেৱল এজন স্বামীৰ বিশ্বাসঘাতকতাক উদঙাই দিয়াই নহয়, ৰে’লৱেত চলি থকা দুৰ্নীতিকো উদঙাই দিলে। টকাৰ বিনিময়ত যোগ্য প্ৰাৰ্থীৰ ভৱিষ্যতৰ লগত খেলা কৰা হৈছে। এতিয়া চিবিআইৰ তদন্তত এই কেলেংকাৰিত কাক দোষী সাব্যস্ত কৰা হয় আৰু কি শাস্তি দিয়া হ’ব সেয়া হ’ব লক্ষ্যণীয়।
Continue Reading
