সপ্তমীৰ দিনটোতে ইছৰোই পৰীক্ষণ কৰিব গগনযান, কাইলৈ কোন বোৰ বিষয় পৰীক্ষা কৰি চাব ইছৰোই? জানো আহক

কাইলৈ  ঐতিহাসিক সফলতাৰ বাবে ইছৰোই 'বিফলতা'ৰ মাজৰে সফলতাৰ সপোন দেখিছে।  ভাৰতীয় মহাকাশ গৱেষণা সংস্থা ইছৰোৰ  মতে, গগনযান মিছনৰ প্ৰথম 'টেষ্ট ফ্লাইট' (টেষ্ট ভেহিকেল এবৰ্ট মিছন-১) সপ্তমীৰ দিনা অনুষ্ঠিত কৰা হ'ব।পুৱা ৭ৰ পৰা ৯ বজাৰ ভিতৰত সম্পন্ন কৰা হ’ব এই পৰীক্ষণ।  পৰীক্ষামূলক উৰণৰ জৰিয়তে ইছৰোৱে জানিব বিচাৰিব যে প্ৰকৃত গগনযান অভিযানৰ সময়ত কোনো সমস্যা হ'লে মহাকাশচাৰীসকলৰ সুৰক্ষা কেনেদৰে নিশ্চিত কৰা হ'ব। বিশেষজ্ঞসকলৰ মতে ইছৰোৱে প্ৰথম পৰীক্ষামূলক উৰণৰ সময়ত কৰ্মচাৰীৰ সুৰক্ষিত অৱতৰণৰ প্ৰণালীৰ বিষয়ে  পৰীক্ষা কৰিব।

 মহাকাশযানখনে  অভিযানৰ পিছত পুনৰ পৃথিৱীলৈ  ঘূৰি আহিব।  ইছৰোৰ মতে ক্ৰু মডিউল আৰু ক্ৰু এস্কেপ মডিউল ভূপৃষ্ঠৰ পৰা প্ৰায় ১৭  কিলোমিটাৰ ওপৰলৈ গৈ  পৃথক হৈ পৰিব। ইয়াৰ পিছতে যান খনত থকা একাধিক পেৰাচুট খোল খাই যাব। সেই পেৰাছুটৰ সহায়তে যান খনে  লাহে লাহে পৃথিৱীলৈ নামি আহিব। যান খনক  সাগৰত অৱতৰণ কৰোৱা হ'ব।যান খনে ক'ত অৱতৰণ কৰিব সেই স্থানো ইছৰোৱে নিৰ্ধাৰণ কৰি ৰাখিছে। টিভি-বি-১ ক্ৰু মডিউলটো অন্ধ্ৰ প্ৰদেশৰ শ্ৰীহৰিকোটাৰ উপকূলৰ পৰা ১০ কিলোমিটাৰ দূৰত বংগোপসাগৰত অৱতৰণ কৰিব।পিছত যান খন ভাৰতীয় নৌসেনাই উদ্ধাৰ কৰিব। সেই উদ্দেশ্যে এখন জাহাজ সুৰক্ষিত দূৰত্বত সাজু কৰি ৰখা  হৈছে। জাহাজ খনত সুদক্ষ ডুবাৰু থাকিব। তেওঁলোকেই  ক্ৰেইনৰ সহায়ত ক্ৰু মডিউলটো পানীৰ পৰা উঠোৱাত সহায় কৰিব।

 মিছনটোৰ প্ৰকল্প সঞ্চালক আৰ হাটনেকিছুদিন পূৰ্বে সংবাদমাধ্যমক জনাইছিল যে  ভাৰতীয় মহাকাশ গৱেষণা সংস্থাই (ইছৰো) বৰ্তমান চাৰিজন মহাকাশচাৰীক মহাকাশলৈ প্ৰেৰণৰ বাবে প্ৰশিক্ষণ দি আছে আৰু ভৱিষ্যতে   মানৱ অভিযানৰ লক্ষ্যৰ বাবে দলটো সম্প্ৰসাৰিত কৰিব বিচাৰিছে ।