তামুলপুৰত ভূপেন হাজৰিকাৰ মৃত্যুবাৰ্ষিকী অনুষ্ঠানত অসুস্থ কেইবাগৰাকী ছাত্ৰ-ছাত্ৰী

ডিজিটেল ডেস্কঃ তামুলপুৰত ভাৰতৰত্ন সুধাকণ্ঠ ড° ভূপেন হাজৰিকাৰ চতুৰ্দশ মৃত্যুবাৰ্ষিকী উপলক্ষে আয়োজিত অনুষ্ঠানত আজি কিছু বিশৃঙ্খল পৰিস্থিতিৰ সৃষ্টি হয়। অনুষ্ঠানটোত অংশগ্ৰহণ কৰিবলৈ আহি কেইবাগৰাকী ছাত্ৰ-ছাত্ৰী অসুস্থ হৈ পৰাৰ ঘটনাই উদ্বেগৰ সৃষ্টি কৰে।

উল্লেখযোগ্য যে তামুলপুৰ জিলা প্ৰশাসনে আয়োজন কৰা অনুষ্ঠানটো বিয়লি ১১ বজাৰ পৰা আৰম্ভ হোৱাৰ কথা আছিল। সেই মৰ্মে বিভিন্ন বিদ্যালয়ৰ ছাত্ৰ-ছাত্ৰীক পুৱাই ৭ বজাৰ ভিতৰতে তামুলপুৰ উচ্চতৰ মাধ্যমিক বিদ্যালয়ৰ খেলপথাৰত উপস্থিত হ’বলৈ নিৰ্দেশ দিয়া হৈছিল। ফলস্বৰূপে দীৰ্ঘ সময় ধৰি ৰ'দত থিয় হৈ থকাত বহু ছাত্ৰ-ছাত্ৰী অসুস্থ হৈ পৰে।

অনুষ্ঠানটোৰ মুখ্য অতিথি আছিল তামুলপুৰৰ অভিভাৱক মন্ত্ৰী জয়ন্ত মল্ল বৰুৱা, সেয়ে মন্ত্ৰীলৈ ৰৈ ৰৈ ছাত্ৰ-ছাত্ৰী সকলক অসুস্থ পৰে । মন্ত্ৰী ১২ বজাত আহি পোৱাতহে অনুষ্ঠানটো আৰম্ভ হয় । এই পৰিস্থিতিয়ে অভিভাৱকসকলৰ মাজতো তীব্ৰ প্ৰতিক্ৰিয়াৰ সৃষ্টি কৰিছে।

ছাত্ৰ-ছাত্ৰীসকলৰ অভিযোগ অনুসৰি অনুষ্ঠানটোৰ সময়সূচী সঠিকভাৱে পৰিকল্পনা নকৰাৰ ফলত এনে ঘটনা ঘটিছে। অসুস্থ ছাত্ৰ-ছাত্ৰীক প্ৰাথমিক চিকিৎসা প্ৰদান কৰা হৈছে বুলি জিলা প্ৰশাসনে জনাইছে।