ডিজিটেল ডেস্ক: ওদালগুৰিৰ ডিমাকুছিত এক হৃদয়বিদাৰক কৰুণ ঘটনা সংঘটিত হৈছে। যিখন ঘৰত আনন্দ-উল্লাস আৰু সুখ-হাঁহিৰে বিয়াৰ উখল-মাখল পৰিৱেশ বিৰাজ কৰিব লাগিছিল, সেইখন ঘৰ এতিয়া বুৰ গৈছে গভীৰ শোকৰ সাগৰত। বায়েকৰ বিয়াৰ মণ্ডপত পবিত্ৰ হোমাগ্নি জ্বলি উঠাৰ পাছতেই আনফালে জ্বলিল একমাত্ৰ ভাতৃৰ চিতাগ্নি।
ডিমাকুছি আৰক্ষী থানাৰ অন্তৰ্গত ৰজাগড় ধৰমজুলিৰ বাসিন্দা সুৰেশ ৰাজভৰৰ ঘৰত আছিল কন্যা পূজা ৰাজভৰৰ শুভ বিবাহৰ দিন। ঘৰৰ জীয়ৰীৰ বিয়াক লৈ সকলো ব্যস্ত আছিল আৰু এই সকলো কামৰ মাজত আগভাগ লৈছিল কইনাৰ ভাতৃ সুধামা ৰাজভৰে। বায়েকৰ বিয়াৰ যাৱতীয় কাম-কাজ সুচাৰুৰূপে কৰিবলৈ সুধামাই মটৰ চাইকেলেৰে ৰজাগড়লৈ ওলাই গৈছিল। কিন্তু কোনে জানিছিল যে এই যাত্ৰাই হ’ব তেওঁৰ জীৱনৰ অন্তিম যাত্ৰা!
কাম শেষ কৰি ঘৰলৈ ওভতাৰ পথতে সুধামা এক ভয়ংকৰ পথ দুৰ্ঘটনাত পতিত হয়। সংকটজনক অৱস্থাত তেওঁক ততাতৈয়াকৈ গুৱাহাটী চিকিৎসা মহাবিদ্যালয় হাস্পতাললৈ (GMCH) প্ৰেৰণ কৰা হয় যদিও চিকিৎসাধীন অৱস্থাতে তেওঁ শেষ নিঃশ্বাস ত্যাগ কৰে।
এফালে ঘৰত চলি আছিল বায়েকৰ বিয়াৰ মাংগলিক নিয়ম, আনফালে হাস্পতালৰ পৰা আহি পালে ভাতৃৰ নশ্বৰ দেহ। বিয়াৰ আনন্দ আৰু মাংগলিক উৰুলিৰ সলনি সমগ্ৰ অঞ্চলটো প্ৰতিধ্বনিত হৈ পৰিল আত্মীয়ৰ হিয়াভগা কান্দোনত। নিয়তিৰ কি যে নিষ্ঠুৰ খেল— এফালে বায়েকৰ সংসাৰৰ নতুন যাত্ৰা আৰম্ভ হৈছে, আৰু আনফালে ভাতৃৰ জীৱন যাত্ৰাৰ চিৰদিনৰ বাবে অন্ত পৰিছে।
অৱশেষত, কইনাৰ সাজেৰেই দুৰ্ভগীয়া বায়েকে নিজৰ মৰমৰ ভায়েকক কান্দি কান্দি শেষ বিদায় জনালে। ভাতৃৰ চিতাৰ জুইয়ে দহি থৈ গ’ল বায়েকৰ অন্তৰ। এই অভাৱনীয় আৰু মৰ্মান্তিক ঘটনাই এতিয়া সমগ্ৰ ডিমাকুছি আৰু ৰজাগড় অঞ্চলত গভীৰ শোকৰ ছাঁ পেলাইছে। প্ৰতিজন প্ৰত্যক্ষদৰ্শী তথা স্থানীয় ৰাইজৰ চকু এতিয়া কেৱল চকুপানীৰে সেমেকি উঠিছে।
Continue Reading
