শিৱসাগৰত চাৰিলেনযুক্ত পথ নির্মাণত মইমতালি

ডিজিটেল ডেস্ক: লিখি থাকিলেও ওৰ নপৰা অৱস্থা শিৱসাগৰত নিৰ্মীয়মাণ অৱস্থাত থকা চাৰিলেনযুক্ত পথ নির্মাণত নিয়োজিত নিৰ্মাণকাৰী সংস্থাসমূহৰ কাম-কাজৰ কথা। নিৰ্মাণৰত পথটোৰ তিনিটাকৈ ভি ইউ পিৰ তলত জমা হৈ থকা বৰষুণৰ পানীৰ ওপৰেদি অব্যাহত আছে যাতায়াত। কিয়নো ভি ইউ পি নে পুখুৰী একো চিনিব নোৱাৰি।

গৌৰীসাগৰৰ নৱনিৰ্মিত ফ'ৰলেন পথৰ তিনিখনকৈ ভি ইউ পিত বাৰিষা-খৰালি একাঁঠু বোকা-পানীৰে উপচি থকাত যাতায়াতকলৈ চূড়ান্ত মইমতালিৰ পৰিচয় দি আহিছে নিয়োজিত ঠিকাদাৰী প্ৰতিষ্ঠানসমূহে। সমীপৱৰ্তী ভটিয়াপাৰৰ নির্মীয়মাণ ভি ইউ পিৰ কাষৰীয়া পথটো আধৰুৱাকৈ পেলাই ৰখাৰ ফলত বোকা-পানীৰ উৎস হৈ পৰি থাকিব লগা হৈছে। 

বিগত ১৪ টা বছৰ ভীষণ সমস্যাৰ সন্মুখীন হ'ব লগা হৈছে জনসাধাৰণ। ভি ইউ পি হৈছে (ভেহিকল আণ্ডাৰ পাছ)। সাধাৰণতে ৰাষ্ট্ৰীয় ঘাইপথেদি চলাচল কৰা তীববেগী যান-বাহনত যাতে কোনো বাধাপ্রাপ্ত নহয় তাৰ বাবে ৰাষ্ট্ৰীয় ঘাইপথ সংযোগী উপ-পথৰ লগত সংযুক্ত কৰি এই ভি ইউ পিসমূহ নিৰ্মাণ কৰা হয়। আনহাতে, ৩৭নং ৰাষ্ট্ৰীয় ঘাই পথটো শিৱসাগৰ জিলাৰ জাঁজীৰ পৰা ডিমৌলৈকে ফ'ৰলেন পথলৈ উন্নীত কৰণৰ পাছতে গৌৰীসাগৰ অঞ্চলত তিনিখনকৈ এনধৰণ ভি ইউ পি নিৰ্মাণ কৰা হৈছিল। তাৰ এখন দিখৌমুখ বৰ আলি সংযোগী গৌৰীসাগৰ নগৰৰ মাজমজিয়াত, দ্বিতীয়খন নিৰ্মাণ কৰা হৈছিল অ' এন জি চিৰ বলিয়াঘাট এক নং জি জি এছ সংযোগী পথত আৰু তৃতীয়খন নিৰ্মাণ কৰা হৈছিল ভটিয়াপাৰৰ এটি ৰ'ড সংযোগী স্থানত। 

ইতিমধ্যে আটাইকেইখন ভি ইউ পিৰ তলেদি যান-বাহন চলাচলৰ বাবে মুকলি কৰি দিয়া হৈছে। কিন্তু তিনিওখন ভি ইউ পি নির্মীয়মাণ উপ- পথসমূহতকৈ চাপৰ হোৱাৰ উপৰি তাৰ গাঁতবোৰত বৰষুণৰ পানীসমূহ জমা হৈ পৰে। বাৰিষা-খৰালি জমা হৈ থকা এনেধৰণৰ ডোঙা ডোঙা পানীত এনেদৰে যান-বাহনসমূহ চলাচল কৰিবলৈ দিয়াত ভীষণ সমস্যাই দেখা দিছে।ইফালে, খোজকাঢ়ি যাতায়াত কৰা যাত্ৰীসকলেও একেধৰণৰ সমস্যাত ভুগিব লগা হৈছে। ইফালে, বাৰ-তেৰটা বছৰেও নিৰ্মাণ সম্পূর্ণ নোহোৱা ফ'ৰলেন পথটোৰ গৌৰীসাগৰত নিৰ্মাণ কৰা উক্ত ভি ইউ পি তিনিখন জি ডি চি এল নামৰ প্রতিষ্ঠানটোৱে নিৰ্মাণ কৰিছিল। 

ইতিমধ্যে প্রতিষ্ঠানটোৱে নিৰ্মাণ কৰা নামদাং নদীৰ ভি অ' পিখনৰ এটা অংশ চলিত বৰ্ষৰ জানুৱাৰী মাহত ভাগি পৰাত ব্যাপক প্রতিক্ৰিয়াৰ সৃষ্টি হৈছিল। তাৰ সমান্তৰালকৈ একেটা প্রতিষ্ঠানে নির্মাণ কৰা উক্ত ভি ইউ পি তিনিখনৰ আন্তঃগাঁথনিক লৈও ৰাইজৰ প্ৰশ্ন উত্থাপন হৈছিল। লগতে এন এইচ আই ডি চি এলকো ৰাইজে ক্ষুৰধাৰ সমালোচনা কৰিছিল।

আনহাতে, ভাগি পৰা নামদাং নদীৰ ভি ইউ পিখনৰ সন্দৰ্ভত এক উচ্চ স্তৰীয় তদন্তৰ লগতে তাৰ প্ৰতিবেদন ৰাজহুৱা কৰিবলৈও দাবী জনাইছিল। কিন্তু চাৰিটাকৈ মাহ অতিক্ৰম কৰাৰ পাছতো এন এইচ আই ডি চি এলে তদন্তৰ প্ৰতিবেদন ৰাজহুৱা নকৰিলে। আনহাতে ভি ইউ পি তিনিখনৰ এনে দুৰৱস্থাৰ পাছতো এন এইচ আই ডি চি এলে চকুমুদা কুলিৰ ভাও ধৰি থকা বিষয়টোৱেও ৰাইজক ক্ষুব্ধ কৰি তুলিছে। একাংশ সচেতন ৰাইজে জিলা আয়ুক্তগৰাকীক এই ক্ষেত্রত যাৱতীয় ব্যৱস্থা গ্ৰহণ কৰাৰ দাবী জনাইছে।

উৎস: দৈনিক জনমভূমি