ডিজিটেল ডেস্কঃ অলিম্পিক পদকজয়ী মনু ভাকেৰ পৰিয়াললৈ হঠাতে নামি অহিল অমানিশা৷ দুদিন পূৰ্বে ৰাষ্ট্ৰপতিৰ পৰা খেল ৰত্ন বঁটা লাভ কৰাৰ অনন্দৰ মাজতে আহিল দুঃসংবাদ! পথ দুৰ্ঘটনাত পতিত হৈ মৃত্যুক আঁকোৱালি লয় খেলুৱৈগৰাকীৰ আইতাক আৰু মোমায়েকে৷
১৯ জানুৱাৰী দেওবাৰে মহেন্দ্ৰগড় বাইপাছ ৰোডত পুৱাৰ ভাগত স্কুটাৰ আৰু ব্ৰেজা গাড়ীৰ সংঘৰ্ষত পতিত হয় অলিম্পিক পদকজয়ী মনু ভাকেৰৰ আইতাক আৰু মোমায়েকৰ। এই ভয়াবহ পথ দুৰ্ঘটনাত থিতাতে মৃত্যু হয় খেলুৱৈ গৰাকীৰ অইতাক আৰু মোমায়েকৰ৷
ঘটনা সন্দৰ্ভত খবৰ লাভ কৰাৰ পিছতে ঘটনাস্থলীত আৰক্ষী উপস্থিত হয় যদিও আৰক্ষী আহি পোৱাৰ সময়লৈকে ব্ৰেজা গাড়ীখনৰ চালকজনে পলায়ন কৰে। ইয়াৰ পাছতে দুয়োদৰাকী ব্যক্তিৰ মৃতদেহ মৰণোত্তৰ পৰীক্ষাৰ বাবে অসামৰিক চিকিৎসালয়লৈ লৈ যোৱা হয়। ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে৷
উল্লেখ্য যে মনু ভাকেৰক দুদিন পূৰ্বে ১৭ জানুৱাৰীত ৰাষ্ট্ৰপতি দ্ৰৌপদী মুৰ্মুৱে মেজৰ ধ্যানচান্দ খেলৰত্ন বঁটা প্ৰদান কৰিছিল। ২০২৪ চনৰ পেৰিছত অনুষ্ঠিত গ্ৰীষ্মকালীন অলিম্পিকত ভাকেৰে দুটা ব্ৰঞ্জৰ পদক লাভ কৰিছিল। মহিলাৰ ১০ মিটাৰ এয়াৰ পিষ্টল ইভেণ্টত ব্ৰঞ্জৰ পদক লাভ কৰি অলিম্পিকত পদক লাভ কৰা ভাৰতৰ প্ৰথমগৰাকী মহিলা শ্বুটাৰ হিচাপে পৰিগণিত হয়। ইয়াৰ পিছত তেওঁ মিক্সড ১০ মিটাৰ এয়াৰ পিষ্টল দলীয় ইভেণ্টত সৰবজোৎ সিঙৰ অংশীদাৰিত্বত আন এটা ব্ৰঞ্জৰ পদক লাভ কৰি, ভাৰতৰ স্বাধীনতাৰ পাছত অলিম্পিকত দুটাকৈ পদক লাভ কৰা প্ৰথমগৰাকী ভাৰতীয় হিচাপে পৰিগণিত হয় মনু ভাকেৰ।
Continue Reading
