ডিজিটেল ডেস্কঃ অসমৰ প্ৰাকৃতিক ইতিহাসত এক সোণালী অধ্যায় সংযোজন কৰি কোকৰাঝাৰ জিলাৰ ৰাইমোনা ৰাষ্ট্ৰীয় উদ্যানত বিজ্ঞানীসকলে এটা নতুন প্ৰজাতিৰ গেকো (জেঠী সদৃশ সৰীসৃপ) আৱিষ্কাৰ কৰিছে।
এই বিৰল আৱিষ্কাৰে অসমৰ চহকী জীৱ-বৈচিত্ৰ্যক বিশ্বৰ দৰবাৰত পুনৰবাৰ প্ৰতিষ্ঠা কৰিছে।
নতুনকৈ আৱিষ্কৃত এই গেকো প্ৰজাতিটোৰ বৈজ্ঞানিক নাম হৈছে 'Cyrtodactylus raimonaensis'। ৰাষ্ট্ৰীয় উদ্যানখনৰ নামৰ সৈতে সংগতি ৰাখিয়েই এই নামকৰণ কৰা হৈছে, যিটোৱে অঞ্চলটোৰ পৰিৱেশতন্ত্ৰৰ অনন্যতাক সূচাইছে।
পৰিৱেশবিদসকলৰ মতে, এই আৱিষ্কাৰ কেৱল এটা নতুন প্ৰজাতিৰ চিনাক্তকৰণেই নহয়, বৰঞ্চ ই ৰাইমোনা ৰাষ্ট্ৰীয় উদ্যানৰ অস্পৰ্শ প্ৰকৃতি আৰু ইয়াৰ সংৰক্ষণৰ প্ৰয়োজনীয়তাকো প্ৰমাণ কৰে।
এই আৱিষ্কাৰে বিজ্ঞানসম্মত গৱেষণা আৰু পৰিৱেশ সংৰক্ষণৰ ক্ষেত্ৰত নতুন দিশ উন্মোচন কৰাৰ লগতে প্ৰাকৃতিক বাসস্থানসমূহ সংৰক্ষণৰ গুৰুত্বকো পুনৰ উজ্জ্বল কৰি তুলিছে।
ৰাজ্য চৰকাৰে ইতিমধ্যে জীৱ-বৈচিত্ৰ্য সংৰক্ষণ আৰু গৱেষণাক আগবঢ়োৱাৰ প্ৰতিশ্ৰুতি পুনৰ ব্যক্ত কৰিছে, যাতে অসমৰ প্ৰাকৃতিক ঐতিহ্য ভৱিষ্যৎ প্ৰজন্মৰ বাবে সুৰক্ষিত ৰাখিব পৰা যায়।
এই আৱিষ্কাৰে পুনৰ এবাৰ অসমৰ প্ৰাকৃতিক সৌন্দৰ্য আৰু বৈচিত্ৰ্য বিশ্বমঞ্চত প্ৰতিফলিত কৰিলে।
Continue Reading
