ডিজিটেল ডেস্কঃ আজি ৰঙালী বিহুৰ প্ৰথম দিন অৰ্থাৎ গৰু বিহু। আনন্দ- উল্লাহৰ মাজতে গোৱালপাৰা জিলাৰ কৃষ্ণাই অঞ্চলত সংঘটিত হৈছে এক কৰুণ ঘটনা।
গৰু গা ধোৱাবলৈ গৈ কৃষ্ণাই নৈত নিৰুদ্দেশ হোৱা দুই যমজ ভাতৃৰ মৃতদেহ পিছত উদ্ধাৰ কৰা হয়। মৃত দুয়ো ভাতৃ হৈছে মৰনৈ থানাৰ অন্তৰ্গত টেঙাবাৰী গাঁৱৰ নৱম শ্ৰেণীৰ ছাত্ৰ দীপাংকৰ নাথ আৰু দেৱাশীস নাথ। গৰু বিহুৰ পৰম্পৰা অনুসৰি গৰু সমূহক স্নান কৰাবলৈ দুয়ো ভাতৃ কৃষ্ণাই নৈত গৈছিল, কিন্তু দুখজনকভাৱে পানীত ডুবি মৃত্যুক সাৱটি লয়।
ঘটনাৰ পিছতে কৃষ্ণাই আৰক্ষী আৰু SDRF-ৰ দল ঘটনাস্থলীত উপস্থিত হৈ অভিযান চলাই দুয়ো ভাতৃৰ মৃতদেহ উদ্ধাৰ কৰিবলৈ সক্ষম হয়।
ইফালে স্থানীয় ৰাইজে এই ঘটনাক লৈ তীব্ৰ ক্ষোভ প্ৰকাশ কৰিছে। তেওঁলোকৰ অভিযোগ অনুসৰি, দীৰ্ঘদিন ধৰি কৃষ্ণাই নৈত অবৈধভাৱে বালি খনন চলি থকাৰ ফলত নৈখনত গভীৰ গাঁতৰ সৃষ্টি হৈছে, যাৰ বাবেই এই দুখজনক ঘটনাটো সংঘটিত হৈছে। স্থানীয় ৰাইজে শীঘ্ৰে এই অবৈধ বালি খনন বন্ধ কৰাৰ দাবী উত্থাপন কৰিছে। অন্যথা তেওঁলোকে নিজে ব্যৱস্থা ল’ব বুলি কঠোৰ সতৰ্কবাণীও প্ৰদান কৰিছে।
Continue Reading
