তেলেংগনাত ৰাষ্ট্ৰীয় এলিট মহিলা বক্সিং ; ‘টপ’ক প্ৰতিনিধিত্ব কৰি খেলিব দুই অসম কন্যা লাভলিনা-অংকুশিতাই

ডিজিটেল ডেস্ক : অলিম্পিক পদক বিজয়ী লাভলিনা বৰগোঁহাই, দুবাৰৰ বিশ্ব চেম্পিয়ন নিখাত জাৰীণ, পূৰ্বৰ বিশ্ব যুৱ চেম্পিয়ন অংকুশিতা বড়োসহ ১৫ টা শীৰ্ষ দলৰ অংশগ্ৰহণৰে ২৭ জুনৰ পৰা তেলেংগনাত অনুষ্ঠিত হ’ব ৰাষ্ট্ৰীয় এলিট মহিলা বক্সিং প্ৰতিযোগিতা৷

ভাৰতীয় বক্সিং ফেডাৰেচন আৰু তেলেংগানাৰ ক্ৰীড়া প্ৰাধিকৰণৰ তত্বাৱধানত তথা তেলেংগানা বক্সিং ফেডাৰেচনৰ উদ্যোগত আয়োজিত এই প্ৰতিযোগিতাখনত কিন্তু দুই অসম কন্যা লাভলিনা আৰু অংকুশিতাই ৰাজ্যৰ পৰিবৰ্তে ‘টপ’ আঁচনিৰ তৰফৰ পৰাহে অংশ লৈছে৷

উল্লেখ্য যে ইতিমধ্যে হৈ যোৱা ছিনিয়ৰ ৰাষ্ট্ৰীয় বক্সিং প্ৰতিযোগিতাত যি বাৰটা দলে শীৰ্ষস্থান লাভ কৰিছিল সেই দল কেইটাৰ লগতে আয়োজক তেলেংগনা, ছাই আৰু টপসহ মুঠ ১৫ টা দলকহে এই প্ৰতিযোগিতাত খেলাৰ সুযোগ দিয়া হৈছে৷ সেই অনুসৰি ৰে’লৱে, হাৰিয়ানা, অল ইণ্ডিয়া পুলিচ, ছাৰ্ভিচেছ, পঞ্জাৱ, চণ্ডীগড়, উত্তৰ প্ৰদেশ, দিল্লী, ৰাজস্থান, মহাৰাষ্ট্ৰ, তামিলনাডু আৰু ছিকিমৰ মহিলা বক্সাৰে প্ৰতিযোগিতাত খেলাৰ বাবে যোগ্যতা অৰ্জন কৰিছে৷ দহটা ওজন শাখাত হ’বলগা প্ৰতিযোগিতাৰ প্ৰত্যেক শাখাৰে স্বৰ্ণ আৰু ৰূপৰ পদক বিজয়ীসকলে পাটিয়ালাৰ ৰাষ্ট্ৰীয় শিবিৰলৈ যোগ্যতা অৰ্জন কৰিব৷