আৰব সাগৰত ভাৰত-পাকিস্তানৰ মুখামুখি যুদ্ধ অনুশীলন

ভাৰতে পহলগামৰ আক্ৰমণৰ প্ৰতিশোধ লোৱাৰ বাবে যিকোনো সময়তে আক্ৰমণ কৰিব পাৰে বুলি পাকিস্তান শংকিত হৈ থকাৰ সময়তে ভাৰতীয় নৌসেনাই আৰব সাগৰত নিজৰ শক্তি প্ৰদৰ্শন কৰে। সামুদ্রিক সুৰক্ষা শক্তিশালী কৰাৰ লক্ষ্যৰে এই অনুশীলন কৰা হৈছে। 

বাতৰি প্রতিষ্ঠান এ এন আয়ে প্ৰতিৰক্ষা সূত্ৰৰ উদ্ধৃতি দিয় কয় যে আৰব সাগৰত যুঁজাৰু জাহাজ মোতায়েন কৰা হৈছে আৰু হাই এলার্ট জাৰি কৰা হৈছে। ভাৰতীয় নৌসেনাই সামাজিক মাধ্যমত প্রকাশ কৰা অনুসৰি ক্ষেপণাস্ত্ৰৰে যুঁজাৰু বিমান তথা যুঁজাৰু জাহাজ ধ্বংস কৰাৰ অনুশীলন কৰা হয়। যুদ্ধৰ সময়ত লক্ষ্যস্থানত নিখুঁত আক্রমণ, প্ৰতিৰক্ষা তথা আক্ৰমণত ব্যৱহাৰ কৰা প্ৰণালীসমূহ আৰু চালক দলৰ তৎপৰতা প্ৰদৰ্শন কৰাৰ আৰু সম্ভাব্য ভাবুকি প্ৰতিৰোধৰ অনুশীলন কৰা হৈছে। এই প্রস্তুতিৰ সম্পৰ্কত কোৱা হৈছে যে সেনাৰ আন দুটা বাহিনীৰ দৰে নৌসেনায়ো যিকোনো সময়ত পাকিস্তানৰ বাবে সংকটৰ সৃষ্টি কৰাৰ বাবে সম্পূৰ্ণৰূপে সাজু হৈছে। আনহাতে ভাৰতীয় উপকূলৰক্ষী বাহিনীয়ে নিৰীক্ষণ বৃদ্ধি কৰা আৰু নৌসেনাৰ সৈতে সমন্বয় ৰক্ষাৰ বাবে গুজৰাট উপকূলত সাগৰীয় সীমাত জাহাজ মোতায়েন কৰিছে। ইফালে ভাৰতীয় নৌসেনাৰ ক্ষেপণাস্ত্ৰৰে যুঁজাৰু বিমান তথা জাহাজ ধ্বংসৰ অনুশীলনে আৰব সাগৰত যুদ্ধসদৃশ পৰিৱেশৰ সৃষ্টি কৰাৰ সময়তে মাত্র ১৫৭ কিল 'মিটাৰ ব্যৱধানত পাকিস্তানী নৌসেনায়ো ব্যাপক অনুশীলন কৰি আছে। দুয়োপক্ষৰ অনুশীলনৰ শব্দই ৰজনজনাই - আছে আৰব সাগৰ। অৱশ্যে এই ক্ষেপণাস্ত্র আক্রমণ পৰস্পৰৰ বিৰুদ্ধে নহয়, অনুশীলনতহে কৰা হৈছে।

ইয়াৰ বাবে দুয়োখন দেশৰ নৌসেনাই 'নটাম' (নটিচ টু এংগাৰ মিছন) জাৰি কৰে। পাকিস্তানে আৰব সাগৰত - ক্ষেপণাস্ত্রসহ অনুশীলন কৰাৰ বিষয়ে জনাই জাৰি কৰা নটাম কালি বিয়লিৰ পৰা আজি শেষ নিশা তিনি বজালৈকে কাৰ্যকৰী হৈ থাকিব। উল্লেখযোগ্য যে ভাৰতীয় নৌ সেনায়ো একেধৰণৰ নটাম জাৰি কৰিছে। নটাম আন্তঃৰাষ্ট্ৰীয় পৰ্যায়ত কাৰ্যকৰী হৈ থাকে আৰু এই সময়ছোৱাত নিজ নিজ অঞ্চলত বিমানৰ উৰণ সম্পৰ্কীয় তথ্য থাকে। 

ভাৰতীয় নৌসেনাই ইয়াৰ আগতে আৰব সাগৰত পৃষ্ঠভাগৰ পৰা আকাশলৈ নিক্ষেপ কৰিব পৰা মধ্যম দূৰত্বৰ ক্ষেপণাস্ত্ৰৰ পৰীক্ষা কৰিছিল। ইফালে ভাৰতীয় নৌসেনাৰ যুঁজাৰু জাহাজ আই এন এছ-ছুৰাত প্ৰথমবাৰৰ বাবে ছুৰাটৰ হজীৰা বন্দৰত মোতায়েন কৰা হৈছে। এ এন আয়ে দিয়া বাতৰি মতে, পশ্চিম সীমান্তত ভাৰতীয় নৌ বাহিনীয়ে সকলো যুঁজাৰু জাহাজ তথা ছাবমেৰিন হাই এলার্ট কৰি ৰাখিছে৷