ৰাছিয়াৰ অহংকাৰে থৰক-বৰক কৰিলে বিশ্ব-বাণিজ্য: প্ৰেক্ষাপটত আকস্মিক আত্মপ্ৰকাশ কিম জং-উনৰ

ডিজিটেল ডেস্ক: ৰাছিয়াই ইউক্ৰেইনৰ ওপৰত চলোৱা সামকিক অভিযানে তেৰদিন অতিক্ৰম কৰিলে৷ ৰাষ্ট্ৰসংঘৰ বৈঠক আৰু দুই ৰাষ্ট্ৰৰ শান্তি আলোচনাই এই পৰ্যন্ত কোনো সৰ্বসন্মত সিদ্ধান্তত উপণীত হ’ব পৰা নাই৷ ৰাছিয়াই ইউক্ৰেইনত চলোৱা ধ্বংসলীলাৰ বিৰুদ্ধে এতিয়া আমেৰিকা যুক্তৰাষ্ট্ৰকে ধৰি কেইবাখনো দেশে ৰাছিয়াৰ পৰা খাৰুৱা তেলৰ আমদানি নিষিদ্ধ কৰিছে৷ পেপছী, মেকড’নাল্ডচ, ষ্টাৰবাকচেও ৰাছিয়াত বন্ধ কৰিলে ব্যৱসায়৷ সামৰিক সংঘাতে এতিয়া বিশ্বৰ বাণিজ্যক্ষেত্ৰলৈ কঢ়িয়াই আনিছে চৰম অনিশ্চয়তা৷ আৰু, তাৰ মাজতে প্ৰেক্ষাপটত উত্তৰ কোৰিয়াৰ কিম জং-উন... ২০২১ত কিম জং উনৰ কঠোৰ সীমান্ত নিয়ন্ত্ৰণৰ বাবে ৰাছিয়া আৰু উত্তৰ কোৰিয়াৰ মাজত বাণিজ্য জিলচলৈ আহিছিল, যাতে ক’ভিডৰ সংক্ৰমণ প্ৰতিহত কৰা যায়। কিন্তু, সেয়া এতিয়া সলনি হ’ব পাৰে৷ কিয়নো, ৰাছিয়াই বাণিজ্যৰ নতুন পথৰ সৈতে পশ্চিমীয়া নিষেধাজ্ঞাৰ বিৰুদ্ধে যুঁজ দিবলৈ সাজু হৈছে। আমেৰিকা যুক্তৰাষ্ট্ৰৰ নিউজ ৱেবছাইট এন কে নিউজে প্ৰকাশ কৰিছে যে, শূন্য ৰপ্তানিৰ উপৰিও ৰাছিয়াই মাত্ৰ ৪০,০০০ ডলাৰ মূল্যৰ সামগ্ৰী আমদানি কৰিছিল, যাৰ ৯৫ শতাংশ প্ৰসাধন আছিল। ২০২০ত দুয়োখন দেশৰ মাজত ৪৩ নিযুত ডলাৰৰ বাণিজ্যিক পৰিসংখ্যাৰ পৰা এইটো এক ডাঙৰ হ্ৰাস আছিল। উত্তৰ কোৰিয়াই ২০২১ত চীনৰ সৈতে বাণিজ্য অব্যাহত ৰাখিছিল, কিন্তু সেই সংখ্যাটোও কেইবাদশকত দুয়োখন দেশৰ মাজত সৰ্বনিম্ন ৩২০ নিযুত ডলাৰ আছিল৷ বিশেষজ্ঞ এন্থনী ৰিন্নাই ভৱিষ্যদ্বাণী কৰিছে যে, ভ্লাদিমিৰ পুটিনে এতিয়া উত্তৰ কোৰিয়াৰ ওপৰত আন্তৰ্জাতিক নিষেধাজ্ঞাক ‘মুকলিকৈ অৱজ্ঞা’ কৰিব পাৰে আৰু সেই দেশৰ সৈতে বাণিজ্য আৰম্ভ কৰিব পাৰে বুলি এন কে নিউজে সদৰী কৰিছে। প্ৰতিবেদনখনত ২০২১ৰ নৱেম্বৰৰ পৰা উত্তৰ কোৰিয়াৰ উত্তৰ সীমান্তত নতুন ৰেল নিৰ্মাণৰ উপগ্ৰহ ছবিৰ কথা উল্লেখ কৰা হৈছিল। অদূৰ ভৱিষ্যতে ৰাছিয়াৰ সৈতে অভাৰলেণ্ড ৰে’ল বাণিজ্য পুনৰ আৰম্ভ হোৱাৰ সম্ভাৱনাৰ বিষয়ে প্ৰতিবেদনত কোৱা হৈছে। ইপিনে, ৰুবুলৰ মূল্য হ্ৰাসে প্ৰভাৱিত কৰিছে উত্তৰ কোৰিয়াক৷ ৰুবুলৰ মূল্য হ্ৰাস হোৱাৰ অৰ্থ হৈছে উত্তৰ কোৰিয়াৰ শ্ৰমিকসকলে চৰকাৰক তেওঁলোকৰ উপাৰ্জনৰ এটা অংশ পৰিশোধ কৰিবলৈ সক্ষম হোৱা নাই, যিটো বাধ্যতামূলক৷ এইবৰ্ষৰ জানুৱাৰীৰ পৰা আগষ্টলৈ উত্তৰ কোৰিয়াৰ প্ৰতিজন নিৰ্মাণকৰ্মীয়ে ৬,৫০০ ডলাৰ প্ৰেৰণ কৰিব বুলি আশা কৰা হৈছিল, সেয়া আছিল ৭,১০,০০০ ৰুবুলৰ সমান৷ ২০২১ৰ অক্টোৱৰত ৬,৫০০ ডলাৰ ৪,৬০,০০০ ৰুবুলৰ সমান আছিল, যেতিয়া বিনিময় হাৰ প্ৰতি ডলাৰত ৭০ ৰুবুল আছিল। ইয়াৰ অৰ্থ হৈছে উত্তৰ কোৰিয়াৰ লোকসকলে এতিয়া প্ৰয়োজনীয় প্ৰেৰণ কোটা পূৰণ কৰিবলৈ ৩০%ৰ পৰা ৪০% অধিক উপাৰ্জন কৰিব লাগিব৷ তদুপৰি, ৱাল ষ্ট্ৰীট জাৰ্নেলৰ মতে, যদিও ৰাছিয়াৰ ওপৰত নিষেধাজ্ঞা এখন বৃহৎ দেশৰ বাবে অভূতপূৰ্ব, তথাপিও চীনৰ বন্দৰত উত্তৰ কোৰিয়াৰ জাহাজৰ দ্বাৰা চলি থকা কয়লাৰ চোৰাং ব্যৱসায়ৰ অৰ্থ হ’ব পাৰে যে যদি চীনে ৰাছিয়ালৈ এনে বজাৰ প্ৰৱেশৰ পুনৰাবৃত্তি কৰে, তেন্তে এই নিষেধাজ্ঞাৰ আকাংক্ষিত প্ৰভাৱ নপৰে। বিশ্বৰ দ্বিতীয় সৰ্ববৃহৎ অৰ্থনীতি আৰু ইয়াৰ শীৰ্ষ বাণিজ্যিক ৰাষ্ট্ৰ হিচাপে, চীনৰ নিষেধাজ্ঞাৰ ওপৰত নিজা পথ নিৰ্ধাৰণ কৰাৰ উপায় আছে আৰু ইয়াৰ চৰকাৰ আমেৰিকা যুক্তৰাষ্ট্ৰৰ নেতৃত্বত শাসন প্ৰস্তুত কৰাৰ প্ৰতি অবিশ্বাসী।