ডিজিটেল ডেস্কঃ ৰাজহুৱা স্থানত ধূমপান সম্পূৰ্ণৰূপে নিষিদ্ধ কৰাৰ সিদ্ধান্ত গ্ৰহণ কৰিছে ফ্ৰান্স চৰকাৰে। বিশেষকৈ শিশু আৰু সাধাৰণ মানুহৰ স্বাস্থ্যৰ প্ৰতি লক্ষ্য ৰাখি চৰকাৰে এই পদক্ষেপ গ্ৰহণ কৰিছে।
ফ্ৰান্সৰ স্বাস্থ্য আৰু পৰিয়াল মন্ত্ৰী কেথেৰিন ভ’ট্ৰিনে বৃহস্পতিবাৰে ঘোষণা কৰে যে ফ্ৰান্সে শিশুৱে যাব পৰা সকলো মুকলি ঠাইত ধূমপান নিষিদ্ধ কৰিব, এই স্থানসমূহৰ ভিতৰত বিল, উদ্যান আৰু বাছ ষ্টপ আদিও আছে।
ফ্ৰান্স নিজৰ সুন্দৰ ৰাস্তা আৰু কেফে সংস্কৃতিৰ বাবে বিখ্যাত। ইয়াত কেফেত ধূমপান কৰা বা ৰাজপথত খোজ কঢ়াটো সাধাৰণ কথা। কিন্তু যোৱা কেইবছৰমানৰ পৰা ৰাজহুৱা স্থানত ধঁপাত ব্যৱহাৰৰ ওপৰত নিষেধাজ্ঞা কটকটীয়া কৰা হৈছে। মন্ত্ৰী কেথেৰিন ভ’ট্ৰিনে কয় যে ১ জুলাইৰ পৰা এই নতুন নিয়ম কাৰ্যকৰী হ’ব।নতুন নিয়মে শিশু অহা যোৱা কৰা সকলো ঠাইকে সামৰি লৈছে, য’ত বিল, উদ্যান, ৰাজহুৱা বাগিচা, বাহিৰৰ বিদ্যালয়, বাছ ষ্টপ আৰু ক্ৰীড়া স্থান আদি অন্তৰ্ভুক্ত কৰা হৈছে।
আঞ্চলিক অ’ৱেষ্ট-ফ্ৰান্সৰ দৈনিক কাকতখনে নিজৰ ৱেবছাইটত ভ’ট্ৰিনৰ সৈতে হোৱা এক সাক্ষাৎকাৰত প্ৰকাশ কৰিছিল, য’ত তেওঁ কৈছিল, “য’ত শিশু আছে তাৰ পৰা ধঁপাত নিষিদ্ধ হ’ব লাগিব।
এই নিষেধাজ্ঞা বিদ্যালয়ৰ ক্ষেত্ৰতো প্ৰযোজ্য হ’ব, যাতে মানুহে বিদ্যালয়ৰ সন্মুখত ধূমপান কৰিব নোৱাৰে। নিয়ম উলংঘা কৰাসকলক ১৩৫ ইউৰো (প্ৰায় ১৩ হাজাৰ টকা) পৰ্যন্ত জৰিমনা বিহা হ’ব বুলি ভ’ট্ৰিনে কয়।
কেফে টেৰেচত ধূমপান নিষেধাজ্ঞা
অৱশ্যে মন্ত্ৰীগৰাকীয়ে কয় যে এই নিষেধাজ্ঞা ফ্ৰান্সৰ আইকনিক কেফে টেৰেচৰ ক্ষেত্ৰত প্ৰযোজ্য নহ’ব। যোৱা কেইবছৰমানৰ পৰা ফ্ৰান্সত অতি জনপ্ৰিয় হৈ পৰা ইলেক্ট্ৰনিক চিগাৰেটকো এই নিষেধাজ্ঞাৰ অধীনত ৰখা হোৱা নাই।
উল্লেখ্য যে ফ্ৰান্সত ইতিমধ্যে কৰ্মক্ষেত্ৰ, বিমানবন্দৰ, ৰেল ষ্টেচন, খেলপথাৰ আদি ৰাজহুৱা স্থানত ধূমপান নিষিদ্ধ কৰা হৈছে।
বিশ্ব স্বাস্থ্য সংস্থাৰ তথ্য অনুসৰি ফৰাচী জনসংখ্যাৰ ৩৫ শতাংশই ধূমপান কৰে বুলি অনুমান কৰা হৈছে, যিটো ইউৰোপৰ ২৫ শতাংশ আৰু বিশ্বৰ ২১ শতাংশৰ গড়তকৈ বহু বেছি। অনুমান কৰা হৈছে যে ফ্ৰান্সত প্ৰতি বছৰে প্ৰায় ৭৫ হাজাৰ লোক ধঁপাত সম্পৰ্কীয় ৰোগত আক্ৰান্ত হৈ মৃত্যুমুখত পৰে।
শেহতীয়াকৈ কৰা এক মতামত সমীক্ষা অনুসৰি ১০ জন ফৰাচী লোকৰ ভিতৰত ছয় জন অৰ্থাৎ প্ৰায় ৬২% জনসংখ্যাই ৰাজহুৱা স্থানত ধূমপান নিষিদ্ধ কৰাৰ পক্ষপাতী।
Continue Reading
