ডিজিটেল ডেস্কঃ ১৫ খন ৰাজ্যৰ পৰা ৫৭ খন ৰাজ্যসভাৰ আসন পূৰণৰ বাবে ১০ জুনত নিৰ্বাচন অনুষ্ঠিত হ'ব।কিন্তু নিৰ্বাচন অনুষ্ঠিত হোৱাৰ পূৰ্বেই কেইবাজনো ৰাজনীতিকে বিনাপ্ৰতিদ্বন্দিতাৰে নিৰ্বাচিত হৈছে৷
মুঠ ১১ গৰাকী ৰাজনীতিক বিনাপ্ৰতিদ্বন্দিতাৰে ৰাজ্যসভালৈ নিৰ্বাচিত হৈছে ৷বিনা প্ৰতিদ্বন্দিতাৰে নিৰ্বাচিত সাংসদসকলৰ ভিতৰত উত্তৰ প্ৰদেশৰ বিজেপিৰ আঠজন সদস্য আছে৷
বিজেপিৰ উক্ত আঠজন সদস্য হৈছে লক্ষ্মীকান্ত বাজপাই, ড০ ৰাধা মোহন দাস আগৰৱালা, সুৰেন্দ্ৰ নগৰ, ড০ কে লক্ষ্মণ, মিথিলেশ কুমাৰ, বাবুৰাম নিশাদ, সংগীতা যাদৱ আৰু দৰ্শনা সিং। কংগ্ৰেছ দলৰ প্ৰাক্তন নেতা কপিল চিবালো নিৰ্দলীয় প্ৰাৰ্থী হিচাপে নিৰ্বাচিত হৈছে৷
ৰাষ্ট্ৰীয় লোক দলৰ সভাপতি জয়ন্ত চৌধুৰীকো নিৰ্বাচিত ঘোষণা কৰা হৈছে। সমাজবাদী পাৰ্টিৰ জাভেদ আলীও নিৰ্বাচিত হৈছে। ৰাজ্যসভাৰ ৰিটাৰ্ণিং বিষয়া ব্ৰজ ভূষণ দুবেই এই কথা প্ৰকাশ কৰিছে। ইতিমধ্যে ৰাজ্যসভাৰ নিৰ্বাচনত আৰজেডি প্ৰধান লালু প্ৰসাদৰ কন্যা মিছা ভাৰতীকে ধৰি বিহাৰৰ পাঁচজন প্ৰাৰ্থী বিনা প্ৰতিদ্বন্দিতাৰে নিৰ্বাচিত হৈছে।
বিনা প্ৰতিদ্বন্দিতাৰে নিৰ্বাচিত আন চাৰিজন প্ৰাৰ্থী হৈছে ফৈয়াজ আহমেদ (আৰজেডি), খিৰু মাহতো (জনতা দল ইউনাইটেড), সতীশ চন্দ্ৰ দুবে আৰু শম্ভু শৰণ পেটেল (বিজেপি)। ঝাৰখণ্ডত বিজেপিৰ আদিত্য চাহু আৰু ঝাৰখণ্ড মুক্তি মৰ্চাৰ (জেএমএম) ড০ মহুয়া মাঝি বিনা প্ৰতিদ্বন্দিতাৰে নিৰ্বাচিত হৈছে ।
বাকী আসনৰ বাবে ১০ জুনত নিৰ্বাচন অনুষ্ঠিত কৰা হ’ব৷ৰাজ্যসভাৰ পৰা অৱসৰ গ্ৰহণ কৰিবলগীয়া সকলৰ ভিতৰত অন্যতম কেইগৰাকীমান ৰাজনীতিক হৈছে কেন্দ্ৰীয় মন্ত্ৰী মুখতাৰ আব্বাছ নকভি, কংগ্ৰেছ নেতা অম্বিকা চোনি, জয়ৰাম ৰমেশ, কপিল চিবাল আৰু বিএছপিৰ সতীশ চন্দ্ৰ মিশ্ৰা আদি।
Continue Reading
