ৰাষ্ট্ৰভাষা বিতৰ্কত ঘিউ ঢালিলে কংগনাই; সংস্কৃতক ৰাষ্ট্ৰভাষা কৰাৰ দাবী

ডিজিটেল ডেস্ক : 'সংস্কৃত ভাৰতৰ ৰাষ্ট্ৰীয় ভাষা হ'ব লাগে' অভিনেতা অজয় দেৱগন আৰু কিচ্চা সুদীপৰ মাজত হিন্দীক লৈ সৃষ্টি হোৱা বিতৰ্কৰ পাছত অভিনেত্ৰী কংগনা ৰাণাৱটে শুকুৰবাৰে এই মন্তব্য কৰে৷ 

'হিন্দী আমাৰ ৰাষ্ট্ৰভাষা আছিল, ৰাষ্ট্ৰভাষা হয় আৰু সদায় ৰাষ্ট্ৰভাষা হৈ থাকিব' বুলি তাৰকা অভিনেতা দেৱগনে কৰা মন্তব্যৰ সমৰ্থন কৰি ৰাষ্ট্ৰীয় বঁটা বিজয়ী অভিনেত্ৰীগৰাকীয়ে কয় যে হিন্দীক ৰাষ্ট্ৰীয় ভাষা হিচাপে অস্বীকাৰ কৰাটোৱে সংবিধানক অস্বীকাৰ কৰিছে। 'আজি দেশৰ ভিতৰত আমি ইংৰাজীক যোগাযোগৰ মাধ্যম হিচাপে ব্যৱহাৰ কৰি আছোঁ। সংবিধান অনুসৰি হিন্দী হৈছে ৰাষ্ট্ৰীয় ভাষা' তেওঁ কয়। কানাড়া অভিনেতা কিচ্চা সুদীপে কৈছিল যে হিন্দী কেতিয়াও ভাৰতৰ ৰাষ্ট্ৰীয় ভাষা নহয়। হিন্দীত লিখা এটা টুইটত দেৱগণে সুদীপক টেগ কৰি কয়, ‘ভাই, যদি আপোনাৰ মতে হিন্দী আমাৰ ৰাষ্ট্ৰীয় ভাষা নহয় তেন্তে আপুনি আপোনাৰ চিনেমাবোৰ হিন্দীত ডাব কৰি কিয় মুকলি কৰে? হিন্দী আমাৰ মাতৃভাষা আৰু ৰাষ্ট্ৰীয় ভাষা আৰু সদায় ৰাষ্ট্ৰভাষা হৈ থাকিব।' 

কৰ্ণাটকৰ মুখ্যমন্ত্ৰী বাসবৰাজ বোম্মাই, কংগ্ৰেছ নেতা সিদাৰামাইয়া আৰু প্ৰাক্তন মুখ্যমন্ত্ৰী এইচ ডি কুমাৰস্বামীয়ে সুদীপক তেওঁৰ মন্তব্যৰ বাবে সমৰ্থন জনাইছিল।