ডিজিটেল ডেস্কঃ ভাৰতৰ বিৰুদ্ধে অনুষ্ঠিত হ’বলগীয়া এলানি শৃংখলাত দক্ষিণ আফ্ৰিকাৰ দলটোত কেইবাজনো প্ৰতিভাৱান ক্ৰিকেটাৰৰ উন্মেষ ঘটিব। সদ্যসমাপ্ত ২০২২ চনৰ আইপিএলত তেওঁলোকৰ একাংশ খেলুৱৈয়ে আকৰ্ষণীয় প্ৰদৰ্শনো আগবঢ়াইছে। সেয়েহে আইপিএলত খেলা খেলুৱৈসকলে ভাৰতৰ বিৰুদ্ধে আগন্তুক ছিৰিজতো ধাৰাবাহিকতা অব্যাহত ৰাখিব বুলি আশাবাদী প্ৰটিয়াছ শিবিৰ। নতুন দিল্লীত ৯ জুনত আৰম্ভ হ’বলগীয়া মেন ইন ব্লুৰ বিৰুদ্ধে পাঁচখন মেচৰ টি-২০ ছিৰিজৰ বাবে সাজু হৈছে দক্ষিণ আফ্ৰিকা। অৱশ্যে, ভাৰতীয় যুৱ খেলুৱৈক লৈ উদ্বিগ্ন দক্ষিণ আফ্ৰিকা।
ভাৰতৰ আনকেপড তাৰকা উমৰাণ মালিকক লৈ উদ্বিগ্ন প্ৰটিয়াছ শিবিৰ। উমৰাণৰ বলৰ গতিবেগৰ সন্মুখীন হোৱাটো যে সহজ নহ’ব সেই কথা স্বীকাৰ কৰিছে টেম্বা বাভুমাই। ২০২২ চনৰ আইপিএলত দুৰন্ত প্ৰদৰ্শন আগবঢ়োৱাৰ পিছত প্ৰথমবাৰৰ বাবে টি-২০ শৃংখলাৰ বাবে ভাৰতৰ বিৰুদ্ধে খেলিবলৈ সুযোগ পোৱা দুগৰাকী খেলুৱৈৰ ভিতৰত তেওঁ অন্যতম।
ছানৰাইজাৰ্ছ হায়দৰাবাদৰ হৈ খেলিছিল উমৰাণ মালিকে। প্ৰতিযোগিতাখনৰ ১৫ সংখ্যক সংস্কৰণত উমৰাণৰ বিস্ময়কৰ গতিৰ লগতে উইকেট লোৱাৰ ক্ষমতাত হতচকিত ক্ৰীড়াবিশ্ব।
দক্ষিণ আফ্ৰিকাৰ অধিনায়ক টেম্বা বাভুমাই স্বীকাৰ কৰিছে যে, ‘কোনো বেটছমেনে প্ৰতি ঘণ্টাত ১৫০ কিলোমিটাৰতকৈ অধিক গতি প্ৰদান কৰা বলাৰৰ সন্মুখীন হ’ব নিবিচাৰিব। ১৫০ তকৈ অধিক বেগত বলিং অব্যাহত আছে উমৰাণৰ।’
সাংবাদিকৰ সৈতে হোৱা কথোপকথনত দক্ষিণ আফ্ৰিকাৰ অধিনায়ক টেম্বা বাভুমাই কয় যে, উমৰাণ মালিক ভাৰতীয় দলৰ বাবে এজন গুৰুত্বপূৰ্ণ উদীয়মান পেচ বলাৰ। ভাৰতীয় ক্ৰিকেটৰ বাবে আইপিএল অনন্য প্ৰতিযোগিতা। কাৰণ, তেওঁলোকে এই সকলোবোৰ দ্ৰুত বলিং বিকল্প বিচাৰি উলিয়াবলৈ সক্ষম হৈছে। মই ভাবো আমি দক্ষিণ আফ্ৰিকাত দ্ৰুত বলাৰৰ সন্মুখীন হৈয়ে ডাঙৰ হৈছো। তথাপি, কোনো বেটছমেনে প্ৰতি ঘণ্টাত ১৫০ কিলোমিটাৰতকৈ অধিক বেগত কৰা বলৰ সৈতে মোকাবিলা কৰিবলৈ ভাল নাপায়। কিন্তু আমি প্ৰস্তুতি চলাই গৈছো।’
Continue Reading
