ব্ৰেষ্ট কেন্সাৰত আক্ৰান্ত মহিমা চৌধুৰী! কেম’থেৰাপিৰ বাবে সৰি গ’ল সকলো চুলি

ব্ৰেষ্ট কেন্সাৰ কথা মহিমাই সকলোৰে পৰা লুকুৱাই ৰাখিছিল আনকি পিতৃ-মাতৃৰ পৰাও। তেওঁৰ ৰোগৰ বিষয়ে প্ৰথমে গম পাইছিল অনুপম খেৰে। অনুপম খেৰে তেওঁৰ ছবি 'দ্য ছিগনেচাৰ’ৰ বাবে মহিমালৈ ফোন কৰিছিল। সেই সময়ত মহিমাই অনিচ্ছাস্বত্বেও নিজৰ ৰোগৰ কথা অনুপম খেৰক জনাবলগীয়া হৈছিল। ভিডিঅ’টোত মহিমাই চকুলো টুকি কৈছিল কেতিয়া আৰু কেনেকৈ কেন্সাৰত আক্ৰান্ত তেওঁ হৈছিল। মহিমাই কৈছিল যে ‘‘মোৰ কোনো লক্ষণ দেখা নাছিল। মই প্ৰতি বছৰে ৰুটিন চেকআপ কৰো, য’ত ব্লাড টেষ্ট, ছ’ন’গ্ৰাফী সকলো কৰা হয়। মোৰ ছ’ন’গ্ৰাফী কৰা ডাক্তৰে মোক ক’লে যে আপুনি ডাঃ মন্দৰক এবাৰ দেখুৱাটো ভাল হ’ব। আৰু তাত দেখুৱাওতে মোৰ কেন্সাৰ ধৰা পৰে। যি কথাই মোক খুব ভয় খুৱালে। কেন্সাৰ বুলি কলে সকলোৱে ভয় খায় সেয়ে মই এই কথাটো মা-দেউতাৰ পৰাও লুকুৱাই ৰাখিলো।’’ 

কিন্তু বৰ্তমান এই কথা সকলোকে জনোৱাটো উচিত বুলি ভাবিলে ৪৮ বছৰীয়া অভিনেত্ৰীগৰাকীয়ে, যাতে তেওঁক দেখি আন কেন্সাৰ ৰোগীসকলেও মনত সাহস পায়। উল্লেখ্য যে পূৰ্বতকৈ সুস্থ হৈ উঠিছে মহিমা। সেয়ে তেওঁ 'দ্য ছিগনেচাৰ’ৰ কামত ব্যস্ত হৈ পৰিছে। মহিমাই উইগ পিন্ধি ফটোশ্বুট আৰু চিনেমাৰ কামত ব্যস্ত হৈ আছে যাৰ বাবে কোনোৱে তেওঁৰ এই অৱস্থাৰ বিষয়ে জানিব পৰা নাছিল। মহিমাই শ্বেয়াৰ কৰা ভিডিঅ’টোত অনুপম খেৰকো দেখা গৈছে। অনুপম খেৰে মহিমাক ’ৰিয়েল হিৰ’ বুলি অভিহিত কৰিছে আৰু মহিমা যাতে সম্পূৰ্ণ সুস্থ হৈ উঠে তাৰ বাবে সকলোৰে পৰা আশীৰ্বাদ, প্ৰাৰ্থনা কামনা কৰে অনুপম খেৰে।