ডিজিটেল ডেস্কঃ ৰাষ্ট্ৰীয় অনুসন্ধান সংস্থাই এতিয়া পেহেলগাম হত্যাকাণ্ডৰ তদন্ত আৰম্ভ কৰিছে। ইয়াৰ ফলত ২৬ জন নিৰীহ লোকে প্ৰাণ হেৰুৱালে। নিহতসকলৰ ভিতৰত আছে ২৫ জন ভাৰতীয় আৰু এজন নেপালী নাগৰিক। এই গোচৰত এটা ডাঙৰ সূত্ৰ পোৱা গৈছে। খবৰ অনুসৰি আক্ৰমণৰ সময়ত ভাৰতত নিষিদ্ধ কৰা এটা চেটেলাইট ফোন পেহেলগাম অঞ্চলত ব্যৱহাৰ কৰা হৈছিল। সূত্ৰ অনুসৰি এই ফোনটো চীনৰ কোম্পানী হুৱেইৰ।
হুৱেইৰ টেলিকম সঁজুলি ভাৰতত ৫জি নেটৱৰ্কৰ বাবে বিক্ৰীৰ অনুমতি নাই। যদিও সম্পূৰ্ণ নিষেধাজ্ঞা নাই, তথাপিও ভাৰতীয় টেলিকম কোম্পানীসমূহেও তেওঁলোকৰ ৫জি নেটৱৰ্কত হুৱেই আৰু জেডটিইৰ দৰে চীনা কোম্পানীৰ সামগ্ৰী ব্যৱহাৰ কৰা নাই। কাৰণ এই কোম্পানীবোৰে চৰকাৰৰ ‘বিশ্বাসযোগ্য উৎস’ৰ চৰ্ত পূৰণ নকৰে। চীনৰ টেলিকম সঁজুলিক লৈ নিৰাপত্তাৰ চিন্তা। সেইবাবেই ভাৰতীয় কোম্পানীসমূহে ইউৰোপীয় সামগ্ৰী ব্যয়বহুল হ’লেও ব্যৱহাৰ কৰিবলৈ সাজু।
উল্লেখ্য যে চীনৰ কোম্পানী হুৱেইৰ ওপৰত আমেৰিকা আৰু ইউৰোপতো বহু ধৰণৰ নিষেধাজ্ঞা আৰোপ কৰা হৈছে। ২০২২ চনৰ জুলাই মাহত আমেৰিকা আৰু ব্ৰিটেইনৰ নিৰাপত্তা সংস্থাৰ শীৰ্ষ বিষয়াসকলে যৌথ সংবাদমেল অনুষ্ঠিত কৰি চীনৰ বিৰুদ্ধে সকীয়াই দিছিল। তেওঁ কৈছিল যে চীন অৰ্থনৈতিক আৰু ৰাষ্ট্ৰীয় নিৰাপত্তাৰ প্ৰতি ভাবুকি। অৱশ্যে চীনে এই অভিযোগক মিছা বুলি অভিহিত কৰিছিল। আমেৰিকা, ব্ৰিটেইন, অষ্ট্ৰেলিয়া আৰু নিউজিলেণ্ডৰ দৰে দেশেও হুৱেইক ৫জি নেটৱৰ্কৰ পৰা বাদ দিছে।
NIA-এ যৎপৰোনাস্তি চেষ্টা কৰিছে
উল্লেখযোগ্য যে পেহেলগামত সংঘটিত হোৱা এই আক্রমণ কাশ্মীৰত যোৱা কিছু বছৰত সংঘটিত হোৱা অন্যতম বিপজ্জনক আক্রমণ আছিল৷ শান্তিপূৰ্ণ বৈসাৰণ উপত্যকা পৰিদৰ্শন কৰিবলৈ অহা নিৰীহ লোকক লক্ষ্য কৰে আক্ৰমণকাৰীয়ে। এন আই এ এতিয়া ফৰেনছিক বিশেষজ্ঞ আৰু কাৰিকৰী তথ্যৰ সহায়ত এই আক্ৰমণৰ তদন্ত আৰম্ভ কৰিছে। এই সংস্থাটোৱে এই চেটেলাইট ফোনটোও ট্ৰেক কৰিবলৈ চেষ্টা কৰিছে, পশ্চিমীয়া দেশসমূহৰ সহায়ত, যিটো আক্ৰমণৰ সময়ত ব্যৱহাৰ কৰা হৈছিল। এই আক্ৰমণৰ দায়িত্ব স্বীকাৰ কৰিছে পাকিস্তানৰ সন্ত্ৰাসবাদী সংগঠন দ্য ৰেজিষ্টেন্স ফ্ৰণ্টে।
TRFৰ ভাবুকি...
ইয়াত ৮৫ হাজাৰতকৈ অধিক বাহিৰৰ লোকক বসতি স্থাপন কৰা হৈছে বুলিও টি আৰ এফে জনাইছে। ইয়াৰ জৰিয়তে জম্মু-কাশ্মীৰৰ জনসংখ্যাৰ ভাৰসাম্য সলনি কৰাৰ প্ৰয়াস কৰা হৈছে। এই সংগঠনটোৱে হুংকাৰ দিছে যে ইয়ালৈ আহি মালিক হ’বলৈ চেষ্টা কৰাসকলৰ বিৰুদ্ধে হিংসাত্মক কাৰ্যকলাপ চলোৱা হ’ব। এই আক্ৰমণৰ প্ৰত্যক্ষদৰ্শীয়ে প্ৰকাশ কৰিছে যে পাঁচজনতকৈ অধিক আক্ৰমণকাৰী আছিল। NIA-এ এইবোৰ বিষয়ৰ তদন্ত কৰি আছে৷ জ্যেষ্ঠ আৰক্ষী বিষয়াসকলেও সেই স্থান পৰিদৰ্শন কৰি প্ৰমাণ সংগ্ৰহ কৰি আছে। জম্মু-কাশ্মীৰত আত্মগোপন কৰি থকা সন্ত্ৰাসবাদীৰ সহায়কাৰীৰ ওপৰতো তদন্ত অব্যাহত আছে।
ইতিমধ্যে জম্মু-কাশ্মীৰ আৰক্ষীয়ে তিনিজন সন্দেহযুক্ত লোকৰ স্কেচ্চ প্ৰকাশ কৰি প্ৰত্যেকৰে তথ্যৰ বাবে ২০ লাখ টকাৰ পুৰস্কাৰ ঘোষণা কৰিছিল। সন্ত্ৰাসবাদী ষড়যন্ত্ৰ উদঙাই দিবলৈ সম্পূৰ্ণ শক্তিৰে কাম কৰি থকা বুলি প্ৰকাশ কৰিছে NIA-এ। ফৰেনছিক দলে আক্ৰমণৰ স্থানৰ তদন্ত অব্যাহত ৰাখিছে। এন আই এয়ে এক বিবৃতিযোগে কয় যে গৃহ মন্ত্ৰণালয়ৰ নিৰ্দেশ অনুসৰি পেহেলগাম সন্ত্ৰাসবাদী আক্ৰমণৰ গোচৰটো নিজৰ হাতত লৈছে। দোষীক ধৰি শাস্তি দিয়াৰ প্ৰতিশ্ৰুতি দিছে সংস্থাটোৱে।
Continue Reading
