ছানিয়া মিৰ্জালৈ বিশেষ আহ্বান পাকিস্তানৰ খেলুৱৈৰ; সহায় বিচাৰিলে পতি ছোৱেব মালিকক

অৱশ্যে চিংগলছতকৈ কেৰিয়াৰত এগৰাকী ডাবলছ খেলুৱৈ হিচাপেহে অধিক সফল আছিল ছানিয়া। ছানিয়াই মহিলাৰ ডাবলছ আৰু মিক্সড ডাবলছৰ কেৰিয়াৰত ৬ টাকৈ গ্ৰেণ্ডশ্লেম অৰ্জন কৰিছে। ডাবলছৰ বিশেষজ্ঞ খেলুৱৈ হিচাপে সুনাম অৰ্জা ছানিয়া মিৰ্জাই ডাবলছ ৰেংকিঙত শীৰ্ষস্থানো দখল কৰিছিল। ভাৰতৰ এই টেনিছ চাঞ্চল্যগৰাকীয়ে ২০১০ চনত পাকিস্তানৰ ক্ৰিকেটাৰ ছোৱেইব মালিকৰ সৈতে বিবাহপাশত আৱদ্ধ হৈছিল। অৱশ্যে বিবাহসূত্ৰে পাকিস্তানী হ’লেও ছানিয়াই এতিয়ালৈকে ভাৰতৰ হৈছে আন্ত:ৰাষ্ট্ৰীয় টেনিছত প্ৰতিদ্বন্দিতা আগবঢ়াই আহিছে। ইতিমধ্যে ৩৫ বৰ্ষীয় তাৰকাগৰাকীয়ে চলিত বৰ্ষৰ পাছতেই টেনিছ কেৰিয়াৰ সামৰাৰ পৰিকল্পনা কৰিছে বুলি জানিব পৰা গৈছে।

ছানিয়াৰ এই পৰিকল্পনাৰ কথা প্ৰকাশ পোৱাৰ পাছতে পাকিস্তানৰ এগৰাকী শীৰ্ষ টেনিছ তাৰকাই ছানিয়ালৈ আগবঢ়াইছে এক বিশেষ আহ্বান। আৰু এই আহ্বানৰ প্ৰতি সঁহাৰি জনাবলৈ ছানিয়াৰ স্বামী মালিককো অনুৰোধ জনাইছে তাৰকাগৰাকীয়ে। মেহক খোখা নামৰ এই পাকিস্তানী টেনিছ খেলুৱৈগৰাকীক দেশখনৰ শীৰ্ষ-৪ গৰাকী মহিলা টেনিছ খেলুৱৈৰ ভিতৰত স্থান দিয়া হয়। মেহাকেই এতিয়া পাকিস্তানৰ বোৱাৰী তথা ভাৰতীয় তাৰকা ছানিয়া মিৰ্জাক এক বিশেষ আবেদন জনাইছে। 

এক সাক্ষাৎকাৰত ভাগ লোৱাৰ সময়ত মেহাকে ছানিয়া মিৰ্জাক পাকিস্তানী খেলুৱৈসকলক প্ৰশিক্ষণ দিবলৈ আহ্বান জনাইছে। সাক্ষাৎকাৰটোত মেহাকে কয়, “ ভাৰতীয় খেলুৱৈগৰাকী প্ৰায়ে পাকিস্তান ফেড কাপকে ধৰি বিভিন্ন আন্তঃৰাষ্ট্ৰীয় প্ৰতিযোগিতাৰ বাবে পাকিস্তানলৈ যায়। মই ছানিয়া মিৰ্জাক পাকিস্তান মহিলা দলৰ খেলুৱৈসকলক প্ৰশিক্ষণ দিবলৈ অনুৰোধ জনাইছো যাতে আমি তেওঁলোকৰ অভিজ্ঞতাৰ সুবিধা ল'ব পাৰো। '

মেহকে এই আহ্বান ছানিয়াৰ স্বামী ছোৱেব মালিকৰ সন্মুখতো উপস্থাপন কৰিব বুলি জানিবলৈ দিয়ে। তেওঁ কয় যে ছানিয়া বৌক পাকিস্তান টেনিছ দলক প্ৰশিক্ষণ দিয়াৰ ক্ষেত্ৰত সঁহাৰি লাভৰ বাবে আমি ছোৱেব মালিককো অনুৰোধ জনাম। ছানিয়া মিৰ্জাৰ দৰে এগৰাকী অভিজ্ঞ খেলুৱৈৰ পৰামৰ্শই পাকিস্তানৰ টেনিছ খেলুৱৈসকলক যথেষ্ট লাভান্বিত কৰিব বুলি মেহাকে মত পোষণ কৰে।