ডিজিটেল ডেস্কঃ মানৱ জাতিৰ লগতে সমগ্ৰ বিশ্বৰ বাবে গভীৰ ভাবুকিৰ সৃষ্টি কৰিছে মাইক্ৰ’প্লাষ্টিকে৷ শেহতীয়াকৈ ডাৱৰতো মাইক্ৰ’প্লাষ্টিক পোৱা গৈছে৷
জাপানৰ বিজ্ঞানীসকলে এই তথ্য লাভ কৰিছে৷ বিজ্ঞানীসকলে প্ৰকাশ কৰা অনুসৰি ডাৱৰত মাইক্ৰ’প্লাষ্টিক উদ্ধাৰে সামুদ্ৰিক পাৰিপাশ্বিৰ্ক তন্ত্ৰ আৰু জলবায়ু পৰিৱৰ্তনত গুৰুতৰ প্ৰভাৱ পেলাব পাৰে৷ তেওঁলোকৰ মতে, ই এক গুৰুতৰ সতৰ্কবাণী আৰু অচিৰেই মাইক্ৰ’প্লাষ্টিকক লৈ গুৰুত্বপূৰ্ণ পদক্ষেপ গ্ৰহণৰ প্ৰয়োজন আহি পৰিছে৷ তেওঁলোকৰ মতে, সময় থাকোঁতেই মাইক্ৰ’প্লাষ্টিকৰ বিৰুদ্ধে উপযুক্ত ব্যৱস্থা গ্ৰহণ নকৰিলে মানৱ জীৱনৰ প্ৰতিও গুৰুতৰ ভাবুকিৰ সৃষ্টি কৰিব৷
ৱাছেদা বিশ্ববিদ্যালয়ৰ অধ্যাপক বিৰোশ্বী ওকাছিৰ নেতৃত্বত গৱেষকৰ দল এটাই কৰা অধ্যয়নৰ পৰা এই কথা জানিব পৰা গৈছে৷ গৱেষকৰ দলটোৱে ডাৱৰৰ পৰা সংগ্ৰহ কৰা পানীৰ ৪৪টা নমুনা পৰীক্ষা কৰিছিল৷ ইয়াৰে প্ৰতিটোত তেওঁলোকে কমেও ৪৪টা মাইক্ৰ’প্লাষ্টিকৰ কণা পাইছিল৷
এই নমুনা তেওঁলোকে সংগ্ৰহ কৰিছিল কানাগাৱাৰ য়ক’হানাৰ পশ্চিমৰ মাউণ্ট ফুজিৰ শিখৰ আৰু পাদদেশ তথা মাউণ্ট তঞ্জাবা-ওয়ামাৰ উচ্ছ পাহাৰৰ শিখৰৰ পৰা৷ তেওঁলোকে অধ্যয়নৰ প্ৰতিবেদনত উল্লেখ কৰে যে প্ৰথমবাৰৰ বাবে ডাৱৰৰ পানীত মাইক্ৰ’প্লাষ্টিকৰ তথ্য লাভ কৰিছে৷ এই তথ্য উল্লেখ কৰা এইখনেই প্ৰথম প্ৰতিবেদন বুলিও তেওঁলোকে দাবী কৰে৷
তেওঁলোকে লগতে এইবুলি সতৰ্ক কৰি দিয়ে যে সকলোৱে মিলি যদি ডাৱৰত মাইক্ৰ’প্লাষ্টিকৰ উপস্থিতি নিয়ন্ত্ৰণ কৰা নহয়, তেতিয়া ই বিৰূপ পৰিস্থিতিৰ সৃষ্টি কৰিব৷ ইয়াৰ গুৰুতৰ প্ৰভাৱ পৰিব জলবায়ুত৷ মানুহৰ শৰীৰৰ অংগবোৰতো ই গুৰুতৰ প্ৰভাৱ পেলোৱাৰ আশংকা কৰা হৈছে৷ গৱেষকসকলৰ মতে, ডাৱৰত থকা মাইক্ৰ’প্লাষ্টিকে গ্ৰীন হাউছ গেছৰ বৃদ্ধিতো সহায় কৰিব পাৰে৷
Continue Reading
