দেশদ্ৰোহিতাৰ পোষ্ট লিখি গ্ৰেপ্তাৰ হ’ল এজন যুৱক

পশ্চিম বংগৰ পূব ৱৰ্ধমান জিলাত ভাৰত বিৰোধী পোষ্ট কৰাৰ অপৰাধত মিলন শ্বেখ (৩২) নামৰ যুৱক এজনক গ্ৰেপ্তাৰ কৰে কাটোৱা আৰক্ষীয়ে। অভিযুক্তই ফেচবুকত লিখিছিল যে ভাৰতে যুদ্ধ নকৰাকৈয়ে পাকিস্তানৰ ওচৰত আত্মসমৰ্পণ কৰিছে। ইয়াৰ লগতে মিলন শ্বেখে বহু ভুৱা ছবিও পোষ্ট কৰিছিল। দেশদ্ৰোহকে ধৰি কেইবাটাও ধাৰাত অভিযুক্ত মিলন শ্বেখৰ বিৰুদ্ধে গোচৰ ৰুজু কৰি চাৰিদিনীয়া আৰক্ষীৰ জিম্মালৈ প্ৰেৰণ কৰা হৈছে।

আৰক্ষীৰ মতে, অভিযুক্তই ফেচবুকত আপত্তিজনক আৰু বিভ্ৰান্তিকৰ পোষ্ট কৰি লিখিছিল যে ‘যুদ্ধত যোগদান নকৰাকৈয়ে ভাৰতে পাকিস্তানৰ সন্মুখত পৰাজয় মানি লৈছে। ইয়াৰ সমান্তৰালকৈ তেওঁ যুদ্ধবিধ্বস্ত অঞ্চলৰ ভুৱা আৰু আপত্তিজনক ছবিও শ্বেয়াৰ কৰি মানুহক বিপথে পৰিচালিত কৰাৰ লগতে ভাৰতীয় সেনাৰ মনোবল ভাঙিবলৈ চেষ্টা কৰিছিল বুলি অভিযোগ উঠিছে।

এই পোষ্টটো ক্ষন্তেকতে ছ’চিয়েল মিডিয়াত ভাইৰেল হৈ পৰাত যথেষ্ট ক্ষোভৰ সৃষ্টি হয়। এই সন্দৰ্ভত কাটোৱা থানাত এজাহাৰ দাখিল কৰাৰ পিছতে আৰক্ষীয়ে অভিযুক্তক গ্ৰেপ্তাৰ কৰে। আৰক্ষীয়ে তেওঁৰ বিৰুদ্ধে ভাৰতীয় দণ্ডবিধিৰ ১৪৯, ১৫২, ১৯৬, ১৯৭, ২৯৯, ২৫২, ২৫৫ বিএনএছএছ ধাৰাত গোচৰ ৰুজু কৰিছে।

এই ধাৰাত দেশদ্ৰোহ, জাতীয় বিৰোধী উচতনিমূলক বক্তব্য, দেশৰ সাৰ্বভৌমত্বক ভেঙুচালি কৰা আৰু সেনাৰ মনোবল ক্ষতিগ্ৰস্ত কৰা আদি গুৰুতৰ অভিযোগ উত্থাপিৃত হৈছে। কাটোৱা মহকুমা আদালতত হাজিৰ কৰোৱা হৈছে অভিযুক্ত যুৱকজনক। আৰক্ষীয়ে ৭ দিনৰ জিম্মাত বিচাৰিছিল যদিও আদালতে অভিযুক্তক চাৰি দিনৰ আৰক্ষী জিম্মালৈ প্ৰেৰণ কৰাৰ নিৰ্দেশ দিয়ে।

উল্লেখযোগ্য যে অভিযুক্ত মিলন শ্বেখৰ পক্ষ ল’বলৈ কোনো অধিবক্তাই আদালতত হাজিৰ নহ’ল, যাৰ ফলত সামাজিক ক্ষোভৰ মাত্ৰা স্পষ্ট হৈ পৰিল। মিলন শ্বেখে ​​আৰক্ষীক জনোৱা মতে, তেওঁ এই কথা অজানিতে আৰু ভুলতে পোষ্ট কৰিছিল। আৰক্ষীয়ে বিষয়টো গুৰুতৰ ষড়যন্ত্ৰ বুলি তদন্ত কৰি আছে। সমগ্ৰ বিষয়টোৰ বিতং তদন্ত অব্যাহত আছে।