এবছৰতে ৪৭৭ কোটিৰ বৰঙণি পালে বিজেপিয়ে, কংগ্ৰেছে পালে মাত্ৰ ৭৪ কোটি

ডিজিটেল ডেস্ক : ধনৰ যেন সোঁত বৈছে ভাৰতীয় জনতা পাৰ্টীলৈ। বছৰটোতে শ শ কোটিৰ বৰঙণি লাভ কৰিবলৈ সক্ষম হৈছে দলটোৱে। তাৰ তুলনাত কংগ্ৰেছকে ধৰি বাকী দলবোৰে লাভ কৰা বৰঙণিৰ পৰিমাণ হৈছে তেনেই নগণ্য। ইলেকচন কমিছনে এই তথ্য প্ৰকাশ কৰিছে।

২০২০-২১ বৰ্ষত ভাৰতীয় জনতা পাৰ্টীয়ে ৪৭৭.৫ কোটি টকাৰ বৰঙণি লাভ কৰিবলৈ সক্ষম হৈছে। তাৰ বিপৰীতে কংগ্ৰেছে লাভ কৰিছে মাত্ৰ ৭৪.৫০ কোটি। এই ধন বিজেপিয়ে লাভ কৰা মুঠ বৰঙণিৰ মাত্ৰ ১৫ শতাংশ। দুয়োটা দলে বিগত বিত্তীয় বৰ্ষ লাভ কৰা বৰঙণিৰ পৰিমাণ দাখিল কৰে আৰু নিৰ্বাচন আয়োগে এই হিচাপ ৰাজহুৱা কৰে। বিজেপিয়ে এই সময়ছোৱাত বিভিন্ন প্ৰতিষ্ঠান, ইলেক্ট’ৰেল ট্ৰাষ্ট আৰু ব্যক্তি বিশেষৰ পৰা লাভ কৰা বৰঙণিৰ পৰিমাণ হৈছে ৪,৭৭,৫৪,৫০,০৭৭।

বিজেপিয়ে যোৱা ১৪ মাৰ্চতে নিৰ্বাচন আয়োগৰ ওচৰত তেওঁলোকে ২০২০-২১ বিত্তীয় বৰ্ষত লাভ কৰা বিপুল পৰিমাণৰ বৰঙণিৰ তথ্য প্ৰকাশ কৰে। কংগ্ৰেছে বিভিন্ন প্ৰতিষ্ঠান আৰু ব্যক্তি বিশেষৰ পৰা লাভ কৰা বৰঙণিৰ পৰিমাণ ৭৪,৫০,৪৯,৭৩১ বুলি প্ৰকাশ কৰিছে।

উল্লেখ্য যে, বিভিন্ন ৰাজনৈতিক দলে ২০হাজাৰ টকাতকৈ অধিক ধন দলৰ পুঁজিলৈ বৰঙণি লাভ কৰিলে সেয়া তেওঁলোকে নিৰ্বাচন আয়োগৰ ওচৰত দাখিল কৰিব লাগে। কেন্দ্ৰকে ধৰি দেশৰ সৰহসংখ্যক ৰাজ্যতে শাসনৰ গাদীত অধিষ্ঠিত হৈ থকাৰ সুবাদতে বিজেপিয়ে লাভ কৰা বৰঙণিৰ পৰিমাণ ব্যাপক হোৱা বুলি অনুমান কৰা হৈছে।